ADVERTISEMENT

This area is available for advertisement. Please contact for details.

Arnivang
Get Adobe Flash player

Kachethang thap alam kroi pangtar nangne: Tingkreng Rongpi

DIPHU, Vosik 17: Non malom phangkodong do pu pen social media along pachethang plup ajok rong atok ano laso atemon langno kapacheho along non ovemi atum cheroktoksi khang dun nangji pusi ove kimi rat asai klembang Tingkreng Rongpi ningje.
Pinpurme, kedamtang Vosik 8 arni bang hini Guwahati arisomar atum Kangthilangso nang kijui pen kacherui ahut phangkodong kitin ajok Panjuri Kachari arong along rat tengkheng dunsi apran armut det lo.
‘Non kithurmi ove atum methang amat chethur plutsi anuttin ta methang-methang arong along chethan-chepare nang po. Athema ilitumsi kevangji arni chari po, lason dengrong mate kroi pangtar patherong pulote paprang dun thekthe lo’ puta Rongpi ningje.
Kapaprang ahavar along ilitum charli dunsi emethang alongri kapachingthurji aphan kado kave ta keklem nangji arpu do. Athema ili akethek kere ke methang along chibijoi nangne lo puta alangli ningje. Alangli kaningje thuke, ahok lo non akai ke keme-kaheno ta pirthe along do seta pangthek pamesi law and order arideng hodai nangji. Pangthek thekthe amonit rong arlo nanglut pulote arju patini dun nangji, jongsi honthe meme pulote police aphan birta pachini nang po.
Lasi kevangji arni Panjuri Kachari arong along ason maduta men-men keklemkle detji aphan choningri lo anparta khei alam kevanve detji aphan ta Tingkreng Rongpi choningri.
Ahok lo, Guwahati arisomar bang hini Nilotpal pen Abhijit atum aphan lapuson apran karmut det ke ningduk meme binong. Lasi alanglitum aphan apran karmut asai along adai kedovek atum aphan nep ingnangsi aron ateng ingsai nangji puta inut ove kimi rat asai klembang Tingkreng Rongpi jai.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives