ADVERTISEMENT

This area is available for advertisement. Please contact for details.

Arnivang
Get Adobe Flash player

Panjuri alamki aphuthak KAAC abetung pen ningduk kachipi

Nilutpol pen Abhijit ahem asor atum aphan sika lak pho- pho, Kangthilangso along akumlin parjapji: CEM

DIPHU, Vosik 12: Kedamtang Vosik niphai 8 arni Panjuri Kachari arong along phangkedong kitin pen bang hini Guwahati asor Nilutpol Das pen Abhijit Nath atum aphan apran karmut aphuthak pini KAAC abetung pen CEM Tuliram Ronghang ningduk chipisi laso asai langno aphuthak sodak pinremsi adai kedo-an atum aphan nep ingnang etsi aron ateng pen sodak ingsai nangji pusi hang. KAAC Conferench hall along pherangke amai pangnisi CEM Tuliram Ronghang kejaike, Panjuri alamki lake ningduk meme anlo lasi lapuson alamki mo nonphi mo nongno kevanve detji aphan anutin ta cheroktok do nangji anparta laso alamki pen soluk sodak atemon vanvera monsam atemon kapathirji aphan CEM Tuliram Ronghang choningri. Laso alamki pen hur kecho dutji meme alam kapangdakde detji aphanta CEM Ronghang asangho pherangke atum aphan choningri. karlitang Nilutpol Das pen Abhijit Nath ahem asor atum aphan KAAC ahin pen sika lakh pho pho atangka kerap pajir damji lapen Kangthilangso along alanglitum bang hini aphanta akumlin kaparjapji aphan KAAC cherailo pusi ningje. Alangli kaningje thuke Karbi Anglong along aprang penta khei dhorom do-an phlakple pin pen ning isivet pensi dothak bomlo. laso atengsi kedamtang arnita KAAC along Assamese akhei pen Jivan Chandra Pathak aphan EM lapen non adihu setame Madhurjya Dhekial Phukan aphan EM lapen Dimasa penta inut anparta Bodo akhei penta inut EM pek ponlo. Lasi Karbi Anglong kedo-an khei ning isivet pensi kachingthur lapen monsam aphan klemlo bonta ajahak inut bang hini atum lapuson kekhamkhe mate temon langno nangkepajap dun abangke kopai kelangno asonlo lasi lapuson sai langno lapen bidi langno keklem atum aphan sodak pinremlo puta CEM Tuliram Ronghang ningje.
Lapuson alamki dokok aphita CEM angtan damjui pu akoi kevan aphuthak CEM Tuliram Ronghang kapaklar ke lapuson alamki doji puke maduta chinine lapen puthekthe lasi lahaike akoi nangkipi thap lo. Kedamtang ningkan krepho Congress chari ahut Karbi Anglong along ason ason alamki kepho mate Dimasa pen Karbi angbong kachepho ahut Charchim along apran kedam pen danglok Kuki pen kachepho ahut lapen Rengma Naga pen kachepho ahut ta apran kedam atum dopiklo setame hulaso ahut Chief Minister pen danglok inut bak a minister Karbi Anglong along vangma puta CEM arjusi Panjuri along alamki lake men mensi kepho lake maduta chipu un-eh lasi kopai kelangno pen lason kepholok abangke neli methangta ningduk pik lo pusi CEM ningduk chepaklang. Nagaon along Karbi hostel along ketherdam bang 24 lake Youth Congress atum saide lapen inut video heihui pen kapachethang Alfa Timung abangta aprang Youth Congress along kacherap dun abanglo lasi ladak pen langdam pulote  ratcharisi abidi langno keklem lo lputa CEM akoi pisi neli ghonta 24 angbong pen ghonta 12 ke Chief Minister lapen administrative law & order atum pen chibirta bomsi lahai keklem kedam asai do-an lapen monsam kevan thekjima aphan bor-i lo pusi ningje. Halapu Karbi Anglong DC kaningje alam pen hur kecho aphuthak ta pherangke atum karju ahut CEM kaningje ke, DC ta lapuson ningjeje det nangji aoptlo ladak alanglita kechokche chet ason  dokoklo pusi CEM Tuliram Ronghang ningje.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives