ADVERTISEMENT

This area is available for advertisement. Please contact for details.

Arnivang
Get Adobe Flash player

Monsam apharman inglong aso ahamphang asong atum kachoningri

Diphu, Vosik 12:  Kedamtang Vosik 8 arni Dokmoka police station angkang Panjuri Kachari arong along phangkodong kitin ajoine isi kethedung ahoni dokok lo. Laso ahoni along bang hini adai kave arisomar atum apran chepangbo nangkok lo.
Laso ahoni ajoine Karbi Anglong arlo chot kali bonta Assam adang hur chodut pen khei angbong kacharvoji ason ansi angring dolo.  Laso ahoni aphuthak ahok alam kachiniji aphan pusi HTL along kedo hamphang asong atum honi kepho adim along kahumri damji pusi Karbi Anglong a Deputy Commissioner aphan pachinisi dam lo. Laso ateng Dokmoka an palesi Dokmoka police Station along OC. J.S. Khoubung pen chengki chethan lo. La-an chot kali haladak amatta Deputy Commissioner aphanta chingki chethan lo. Seta kachingki chethan ahut honi kepho adim along non amat kiri katarlip asai deng bom lang lasi madu aphanta haladak kapadamji aphan thu un-eh pusi DC, OC atum pachini lo.
Laso ahut thoi ahavar along kedo dun kaprek kaprek inglong aso ahamphang asong atum pen chetongsi Dokmoka Forest IB along arsik amai ingni.
Mai along NKSA, Amri Karbi, Sonowal Students Association, Dimasa Students Association, AIKSU, KSYC, KFA pen chenglok HTL along kedo ahamphang asong atum chetongsi non malom Assam angkang kedamtang Vosik 8 arni Dengaon Panjuri kachari arong along ahoni pen ajok soluk sodak kedo aphuthak chingki chethan. Laso ahut kaprek kaprek District along loh kacharli dam Karbi aosomar atum kaphere lapen kisung kepho alam heihui chethan.
Laso ateng prapjin pen laso atemon kosonsi kachepangsam thekjima pu aphuthak mai along chingvai. Penang an chingvai det aphi kithi lot Nilotpal lapen Abhijit Nath atum aphan Karbi Anglong arlo kedo kaprek kaprek hamphang asong asongja atum kahumri damji lapen Assam angkang kedo kethedung kethedung hamphang asong atum pen kachetong damji anparta Guwahati along pherangke amai kapangniji aphan mai along cherai lo.
Mai along Guwahati along non amat thedung kisung kepho ave lang pusi AIKSU sankur chunbang Dhoromsing Ronghang pachini.
Mai along HTL Convenor Saising Rongpi, Convenor Khorsing Teron, KSYC meiphu barim Rajendra Kramsa, KSYC ameiphu Prakash Terang, chunbang Bipul Tisso, KFA ameiphu Samsing Hanse, chunbang Tingku Ingti atum pen chenglok kaprek kaprek song jabang atum mai along chetong dun.
Pini Dokmoka along kangni amai pen Assam angkang lapen Karbi Anglong angkang monsam pen kedoji aphan hamphang asong atum pen choningri.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives