ADVERTISEMENT

This area is available for advertisement. Please contact for details.

Arnivang
Get Adobe Flash player

Phangkodong kitin ajok bang hini apran kedam aphuthak Karbi Anglong ningduk kachipi

Diphu, Vosik 10: Kedamtang Vosik 8 arni Dokmoka police station angkang Panjuri Kachari arong along adai kave bang hini Guwahati pen kevang arisomar atum aphan phangkodong kitin ajok apran karmut det aphuthak Karbi Anglong arat atum ningduk kachipi.
Ahokhe alam kekroi pen rat atum bang hini Nilotpal pen Abhijit Nath atum aphan phangkodong tinsi theng chok pen apran armut det lo. Laso aphuthak ning duk chepaklang Karbi Anglong angkang kaprek-kaprek adim along melur kekai lapen melur armu chejengsi apran kedamjui Nilotpal pen Abhijit atum aphan chikimo lo.
Lason ahut Karbi Anglong arongsopi Diphu ahithi along KSA, AASU, KNCA, ASDC Youth Front lapen kaprek-kaprek hamphang asong anparta rongsopi arat atum cheto dunsi melur armu chejeng pen ningduk chepaklang lo.
Lason thakthak Kheroni Sangbadik Shanstha atum penta Kheroni along Nilotpal pen Abhijit atum apran kedam aphuthak ningduk chepaklangsi melur armu chejeng lo. Laso ahut Sangbadik Shanstha ahin kachoningri ke, Social Media Facebook pen WatApps along kevangji arni lapuson thangbakbe alam pachethang thapthe det nangji, athe non Assam angkang lapuson soluk-sodak kedo ke ahokhe alam social media along kapachethang varet ajoine lo pusi Kheroni Sangbadik Shanstha atum jong.
Den Arong angkang khei, dhorom kacheprek alam chipupe pin ongdung arat chingrumsi phangkodong kitin ajoine bang hini apran kedam nangjui Nilotpal Das pen Abhijit Nath atum aphan chikimo.
Adai kave Nilotpal pen Abhijit atum apran kedam nang aphuthak ningduk chepaklangsi ingsamri pen melur armu chejeng lo. Laso along Nagarik Suraksha Manch, KCS lapen Dengaon Bazar Committee atum pensi laso kachikimo asai patirpi lo.
Lason thakthak Bokolia ahithi along Jirpo NGO atum patirpisi Nilotpal pen Abhijit atum apran kedam nang aphuthak ningduk chepaklangsi hithi angkang melur armu kachejeng.
Laso alam pen ajok akaprek atum kevangji arni kisung kepho jokplotji aphan Assam angkang amonit do-an monsam pen kedoji aphan Jirpo NGO atum pen choningri pusi Jirpo NGO ameiphu Sapsing Timung birta nangpale.
Bokajan along Bokajan Press Club, Bokajan Auto Driver Association, AJYCP, KSA,  Mahila Samity, Shankardev Sisu Neketan atum pen chenglok kaprek-kaprek atum pen kedamtang arni Phangkodong kitin ajoine Nilotpal Das lapen Abhijit Nath atum apran kedam nang aphuthak ningduk chepaklangsi melur kai pen ningduk chipi rinti lo.
Lason thakthak Hanjanglangso tovar krongthom kachetok along AASU, Sarihajan Bazar Committee, AASAA Regional Committee atum chelangsi adai ave pin pen apran kedam nang kijui bang hini arisomar Nilotpal pen Abhijit atum aphan chikimo.
Karbi Anglong district hini angkang kaprek-kaprek adim along ningduk kachipi melur kekai lapen melur armu kachejeng atum pen Nilotpal pen Abhijit atum aphan apran karmut atum ke madu akhei ta kali, lake kechokche atum lasi ladak khei alam vangve pin pen Assam arat an arjap rappet nangji pusi Diphu ahithi along armu kachejeng ahut AASU Karbi Anglong aro asongja Tridev Bora, KSA ameiphu Bijoy Bey lapen KSA ameiphu Semion Rongphar atum jai.
Laso alam pen ajok khei angbong kachelangseletji lapen khei angbong kacharvoji alam vangve. Lasi Assam angkang arat do-an monsam pen kedoji aphan ta alanglitum pen choningri.

Leave a Reply

Your email address will not be published. Required fields are marked *

BREAKING NEWS
June 2018
M T W T F S S
« Apr    
 123
45678910
11121314151617
18192021222324
252627282930  
Archives