ADVERTISEMENT

This area is available for advertisement. Please contact for details.

Arnivang
Get Adobe Flash player

Kangthilangso Panjuri alamki aphuthak monsam apharman mai kangni

Laso alam along khei alam vanve det nangji pusi mai along kacherai

IMG-20180610-WA0033Diphu, Vosik 10: Kedamtang arni Phangkodong kitin ajoine Kangthilang Panjuri Kachari arong along bang hini adai kave ariso Nilotpal Das pen Abhijit Nath apran dam nang lo. Laso ajoine Karbi Anglong anparta Assam adang hur kechodut pen khei angbong kacharvoji angring kedo kok ajoine tongsekot Karbi Anglong District Administration atum pen pini Diphu Circuit House along hamphang asong, ratchari lapen arleng kesar atum pen mai ingni lin lo.
Karbi Anglong a Deputy Commissioner Mridul Kumar Mahanta kachepahemphu amai along hamphang asong asongja atum pen methang-methang aning kamatha alamthe chepaklang rinti. Laso ahut kado kave atum pen Panjuri Kachari arong along kepho aphuthak ningduk chepaklangsi pinrem lo. Karbi Anglong along lapuson akepho kedo pu ajoine Karbi atum aphan kechokche pu akoi kipi varet ta chokche athe lake Social Medial along kachethang thap Phangkodong pu alam pen ajoksi lapuson kedo lo. Lasi laso along khei alam amatsi vangve puta ongdung asongja atum jai.
Lason ahut J.I Kathar IAS (Retd) pen Karbi Anglong administration sai keklem kanglen aphuthak ningkangsamse chepaklang, athe phangkodong pu alam Karbi Anglong arlo mate North East angkang kachethang penang an ajirding lo seta district administration pen thangta kacherok asai kedeng thek longle puta alangli jai.
KSA, AASU, DSA lapen kaprek-kaprek hamphang asong atum penta lason thakthaksi alamthesi mai along jai. Lasi kevangji arni lapuson akepho kedo thuthe detji anparta Assam angkang hur kechodut ajoine Karbi ariso-okorjang kaprek-kaprek a district along loh kacharli bom atum penang an kaphere pensi donang lo. Lasi lahai atum kisung kephophe detji aphan District Administration atum pen prapjin sai deng nangji puta pachini.
Laso ahut Deputy Commissoner Mridul Kr. Mahanta kapachini ke, ‘ne home secretary aphan laso alam aphuthak pachini et lo, laso ateng home secretary pen Karbi atum kedo adim along an kelangchari asai paklem bom lo’.
Nagaon along kedo Karbi loh charli osomar atum kisung kepho alamta haladak kedo law and order atum pen chingkisi pajok dun et lo lapen non ke thangthe lo puta DC Mridul Kr. Mahanta mai along pachini.
KAAC EM barim Ashok Teron mai along kaningje ke, kepho adim pen Den Arong an km 8-9 anbaksi dopo, gari pen dam lote minut kep krepho ansi apor enji. Vosik 8 arnikangsam laso kepho ahut kopi apotsi police atum apor ateng le dunde det lo pusi arju. Police atum arnivang ta anerlo porphai 2 pen arni kangsam porphai 8 an Den Arong ahithi along dover ante lahai a police atum kepho adim along kopi apot pale dunde det lo puta Ashok Teron arju.
Mai along kachetong dun Addl. SP Muzafar Hussain mai along kejai, laso akepho along adai kedo atum aphan nep ingnang etji lapen aron ateng ingsai po, la-an chot kali adai kedo atum aphan bail kapalongle detji aphan klem bom lo puta alangli jai. La-an chot kali Facebook, Watapps a group along komatne jongsi kaheno dak alam kapachethang thap dokok pulote group admin aphuthak lamhoi pabonsi nep ingnangji puta alangli pachini.
Padmashree Prof. Rongbong Terang pen Karbi Anglong lapen Assam arat atum non kisung apor ahut monsam pen kedoji aphan choningri. Laso akepho ave det nangji apotlo seta phangkodong pu kachethangplup ajoine rat atum kaphere aning arlo kethap dong avedet nangji seta dokok lo. Laso ajoine bang hini Guwahati pen kevang adai kave arisomar bang hini atum apran dam nangkok lo. Laso alam pen ajok Assam angkang meh ki-ur asonsi dolo. Lasi monsam do pen laso ameh kapamepji aphan kado kave chelangpet pen bor-i nang po puta Padmashree Rongbong Terang choningri.
Mai kapajut ahut police atum apor ateng kapale dunde det, kaprek-kaprek a district along kedo Karbi loh charli arisomar-okorjang atum aphan kaparaiji aphan lapen lahai kijui kelang adim along apor ateng kedamji aphan sign board ketar asai klem po pusi Deputy Commissioner Mridul Kr. Mahanta mai along chechaksi mai ta pachekak lo.
Mai along MLA barim Bidya Sing Ingleng, BJP KADC pen sankur chunbang Ajit Dey, HSDC pen sankur chunbang Laichan Ingleng, KNCA pen sankur chunbang Protima Inghipi, AASU pen Tridip Bora, KSU pen  ameiphu George Timung, ASDC Youth Front pen Rajiv Tokbi atum pen chenglok kaprek-kaprek man kedo song klembang atum mai along chetong dun.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives