ADVERTISEMENT

This area is available for advertisement. Please contact for details.

Arnivang
Get Adobe Flash player

Phangkodong pu kitin ajok bang hini ariso apran kedam nang

Lamki along bang 5 arisomar atum aphan kangnang

Diphu, Vosik 9: Non malom Social Media along phangkodong pu alam kachethangpik ajok Karbi Anglong arlo hurchodut lo. Phangkodong pu ajok ongdung jasemepet rong arat atum kaphere ajo amek jangje keton-kelang asai anta keklem atum do. Lapuson phangkodong pu kachethang lapen hur kechodut apor ahut Bhomta arni Dokmoka police station angkang Panjuri Kochari arong along bang hini Guwahati pen Kangthilangso nang kijui aphan kevang bang hini a risomar atum aphan phangkodong kitin ajok rat atum theng hurhur amat pathilot.
Kithi bang hini atum aphan Guwahati Shilpukhuri kedo Gopal Chandra Das pen Radhika Das atum asopo Nilotpol Das (29) lapen Ajit Kr. Nath asopo Abhijit Kr. Nath pusi pangthek long.
Kithilot Nilotpol Das ke inut Sound Engineering kacharli tang abangphu lapen non amat alangli designing asaisi klem bom lapen Semaluna.com pu amethang a company ta do pusi apo Gopal Ch. Das than. Pirthe adang amonit atum Mars along kedamji aphansi keklem loklo seta ilitum Assam arlo ke nonputa monit atum thek longle ahormu aphan loksi kekroi atum ta dolang. Lasi Karbi Anglong Autonomous Council pen ta lahai aphuthak cheroktok amai pangnisi than rat aphan than pare nangji puta kithilot Nilotpol Das asarbura Gopal Chandra Das ningje.
CEM ketoi ateng EM Prodeep Rongpi kithi Nilopal pen Abhijit asarbura atum aphan chetong dunsi aning pathe dun. Laso ahoni aphuthak alangli sodak pinrem lapen adai kedo atum aphan kenepji aphan tarlip nangji pusi jai.
Ne sopo kopine kechokche dokok puseta thengra police aphan hodai kok asonte thangta ning kiduk athai ave detji apotlo puta Gopal Chandra Das ningje.
Nilotpol Das pen Abhijit Nath atum aphan phangkodong kitin pen apran karmut det aphuthak Assam police atum pen non an bang pho aphan nep ingnang etlo pusi birta long dun.
Nilotpal Das pen Abhijeet Nath aphan apran karmut alamki pen ajok Kankan Basumatary, Deepjyoti Basumatary, Sarukan Swargiary, Babu Rongpi lapen Anuj Timung atum aphan nep ingnang lo. Laso aphuthak nonta police atum kiri tarlip bom lang. Laso alamki aphuthak katarlipji aphan DGP Mukesh Agarwal si kacheparideng puta birta long.

Leave a Reply

Your email address will not be published. Required fields are marked *

BREAKING NEWS
June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives