ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng kethom ‘Students & Youth Assembly’ amai kapangni

Diphu, Vosik 9: The Youth With a New Character and Vision pu athepi en pen Karbi Students & Youth Council (KSYC) atum Diphu Lorulangso Rangsina Sarpo Cultural Hall along pini ingdeng kethom Students and Youth Assembly-2018 amai pangni.
KSYC ameiphu Prakash Terang kachepahemphu amai along sankur chunbang Bipul Tisso mai kepha alamthe jai. Mai along alohi mate lam kejaiji aphan JACAS chairman Khorsing Teron pen Thekar Chapbang lapen Dibrugarh University bangphu Longsing Teron atum chetong dun. La-an chot kali mai along KSYC ameiphu barim Rajendra Kramsa pen sankur chunbang barim Johny Timung atum ta chetong dun.
Mai along lamthe kejai atum pen jasemetpet aron atang lapen ove kimi atum kacharli ahin kapaprang dun nangji alamsi kethan ardi pi.
Mai along alohi mate lam kejai abang Khorsing Teron Sixth Schedule ajakong lapen akenangsot alam than. La-an chot kali Citizenship Amendment Bill-2016 aphuthak ta alangli than.
Sixth Schedule ajakong thetan puvoiphit seta state pen apar le kethe kali. Laso ajoine Meghalaya atum ta state chehang nangkok lo. Sixth Schedule ajoksi KAAC along aron kaselam, keklem kapachun lapen kangsai ajakong long lo puta than.
Citizenship Amendment Bill AASU atum kekhamkhe along ilitum ta cheto dun nangkok atheke Assam along jongsi Bangladeshi atum nanglutpak  pulote Karbi Anglong arlo ta nang lutvek po. Lasi non kado kave kachesong ahut jongsi ilitum ta chesong dunde pulote mo ilitum det ke lahai atum aphan choplung thekthe.
Hamphang asong 24 atum kachesong tang aron ateng lo, lasi laso kachesong along ta kado kave ta cheto dun nangpo pu heihui alam ta Khorsing Teron jai.
Kacharli ahin kapaprang dun nangji lapen songja atum pulote aprang kopisi cheplangjima kamatha akenangsot pusi Thekar Chapbang Longsing Teron jai. Laso ahut alangli kejai ke, Karbi Anglong arlo thanbang angbong kachekoi seroi thek long. Laso kachekoi seroi amat aningkan vangta matric asatlang angthek ke aber pen ingdeng hini kethom alongsi do dunver lo.
UPSC pen APSC pen ke-en kaprek-kaprek kachepate asatlang aphuthak chinisi satlang heihui ta un dunji aphan bor-i nangji. Seta ilitum Karbi atum ke mobile le en seta lam arjan kelang lapen facebook, watapps pen akaprek ke langle det atumsi ke-ong puta alangli jai.
Songja atum pulote hamphang aphan kopisi keklem piji lapen kopi keklemsi kemeji lahai alam chini vek nangji. La-an chot kali songja kedo bom ahut hamphang mate khei aphan isibak mesen asai keklem piji aphan aning do nangji puta Longsing Teron mai along jai tekang.
Laso aphi KSYC jabang pen kachoro alamthe pajirsi mai ingsamjin pen pachekak lo.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives