ADVERTISEMENT

This area is available for advertisement. Please contact for details.

Arnivang
Get Adobe Flash player

Nilip pen Duarbagori Constituency apharman ongdung kachingthur asai CEM kangpu

Diphu, Vosik 7: Nilip pen Duarbagori Constituency hini apharman pini Nilip constituency arlo Chokihola High School along Vikash Utsav amai kangni ahut CEM Tuliram Ronghang arideng pen ongdung ketangtang scheme ingpu, anparta ongdung kachingthur asai keklemji aphan long-eh som lo.
Laso ahut Nilip Constituency along MAC Pabitra Rongpi kachepatirpi pen keklem kapatangtang asai 39 CEM arideng pen pangpu lo. Laso along amat non akimi kachingthur asai long 26 keklemji aphan ta CEM long-eh som tekang lo.
Laso amat along amat Duarbagori Constituency angkang keklem kapatangtang son 6 scheme alangli inpu lo lapen non akimi keklemji kachingthur asai long 26 apharman ta CEM Tuliram Ronghang long-eh som tekang.
Suresh Tisso kachari Vikash Utsav amai along Nilip MAC Pabitra Rongpi pensi kedeng alamthe mai along jai. Laso ahut alangli kejai ke, ‘2017-18 keklem kapatangtang lapen non 2018-19 keklemji apharmansi pini CEM arideng kangpu lapen long-eh som lo’. CEM Tuliram Ronghang kejalin kemesen lapen inut katangkring ajabang kedo ajok Nili Constituency angkang aprang pen asapso kachingthur mate kachelar chethek long lo puta jai.
Lasi kedamtang kacherap asonsi non kevangji arni ta rat atum nang cherap dun nang po. Jongsi lapuson rat atum nang cherap dun bom pulote Nilip-Duarbagori ahavar along ta thedung kachelar thek long po puta MAC Pabitra Rongpi jai.
Kedeng alamthe jai det aphi kedamtang 2017-18 dihin aningkan angbong keklem asai ketangtang lapen non 2018-19 dihin aningkan keklem kachingthur asai apharman CEM Tuliram Ronghang arideng pen ingpu lapen long-eh som lo.
Mai along kachetong dun BJP-East Karbi Anglong District Committee dun meiphu Bharat Kr. Timung pen CEM Tuliram Ronghang sai keklem kachepaduk lapen ajat asai ta apor ateng kapatangji aphan keklem apot rat athengno ro.
India adang kachari PM Narendra Modi lapen Karbi Anglong along Tuliram Ronghang kachari BJP ratpangri atum pensi sai keklem paklang lo.
Alangli pen ASDC atum pen Autonomous State kehang alam ta mai along pinpur. Laso ahut alangli kejai ke, ‘Lok Sabha lapen Rajya Sabha along 500 sose MP atum aphan ilitum kachetoi dun MP inutvet pakroi un-eh, lasi BJP along kedo dun lapen kachepame dunsi pen Autonomous State apharman pakroi unchotji’.
Constituency a MAC atum along rat atum cherap dun nangji lapen bidi-sore pidun nangji athe BJP a ratpangri ke rat akar-i atengsi sai keklem pusi Prodeep Rongpi jai. La-an chot kali BJP atum madu adhorom aphan ta kelangret kelang-ai ave, laso ajoinesi kachingthur asai kipi heihui ta dhorom langle pinsi kado kave aphan pachetang lo puta EM Prodeep Rongpi jai.
BJP ahut hen lo KAAC along kachari along kave MAC kave pin ke pusi CEM jai. La-an chot kali rat atum State, kachingthur lapen voreng avarsai ajoinesi BJP aphan ning kachethe. Laso ateng keklemji aphansi netum bor-i bom lo, laso angthek ladak MAC Pobitra Rongpi ningkan isi angbong lapu-an asai keklem pensi klangdak lo. Lasi kevangji arni la-an sose kachingthur asai keklem thekji lapen rat aning kethek ason an kapapleng thek pameji aphan rat atum nang cherap dun bom nangji puta CEM Tuliram Ronghang jai.
Constituency aphan ketang asai kedo-an kachingthur asai pen chenglok voreng avarsai heihui anta constituency a MAC atum alongsi ajakong dolo. Ladak ke madu ta nang chejok dun longle lo, lasi EM, MAC ajakong ke isivet lo puta alangli jai.
Nilip pen Duarbagori Constituency hini along tovar kaselamji aphan loksi Sika crore 56.46 atangka panong lo, laso ahut CPDMK atovar kapatangji aphanta alangli pinpur.
Mai along hemprek alamta alangli pinpursi, hemprek hangbom nangji, laso ahut kachingthur asaita klem bom nangji puta jai.
Lahai akemang lapen kachingthur asai la-an sose keklem thekji aphan non kevangji MP kilik ahutta rat atum BJP pen kachetoi dun abangphu aphan kerap pidun nangpo puta alangli mai along jai.
Mai along EM Jagatsing Ingti, EM Amarsing Tisso, EM Kache Rongpipi, CEM achor Kache Teron, MAC Richard Tokbi, MAC Mongalsing Timung, MAC Longki Timung, MAC Prabhat Chandra Taro, MAC Horen Sing Bey atum pen chenglok BJP ajabang Rolen Killing, Mudhuram Lekthe lapen kaprek kaprek man kedo abangphu atum chetong dun.

Leave a Reply

Your email address will not be published. Required fields are marked *

June 2018
M T W T F S S
« Apr    
 123
45678910
11121314151617
18192021222324
252627282930  
Archives