ADVERTISEMENT

This area is available for advertisement. Please contact for details.

Arnivang
Get Adobe Flash player

Longki Hanse 150 km cycle pen vangsi Karbi Language Certificate Course kangpu amai along kachetong dun

Alangliphan poho pen Longsing Teron archo

IMG-20180607-WA0021 (1)DIPHU, Vosik 7: Methang alam-aki kachinghon lapen ingthur nangji pu aning arlo chethap thotsi Longki Hanse pu inut abangphu Bordongka ahem pen arnikangsam porphai 6 pen nangbarsi 150 km lapen ghonta 14 cycle nangvek letsi KAAC conference hall along kapado Karbi Language Certificate Course kangpu amai along kachetong dun lo. ALangli amek jangje jopangthang cycle nangdongsi Diphu nang pale lo. Kamanghu meme ke alangli ghonta 14 cycle nangdon pen ta mai along mesen pen alohi atum pen lam arju dun pame un lang. West Karbi Anglong district Bordongka arong amekar Noren Hanse asopo Longki Hanse alangli Vosik niphai pho arni arnikangsam porphai trok pen ahem pen cycle kevek pangchengsi Vosik niphai trok arni adap porphai kep apor Diphu arongsopi nangpalesi alangli Dibrugarh University pen Assam University Diphu Campus along Karbi alam kethanji akitap kangpu amai along chetong dun lo.
Karbi alam pachan nang lapen Karbi alam ingthur nang pu akemang pen kaike ta karjap thip abangphu Hanse asangho alangli Rangsina English M.E School alongsi Karbi lam thanbang asaisi chongdat dun bom. Karbi alam kapachanji pu aning aklong kedo eh ajok kedamtang 2008 aningkan pensi alangli Karbi alam thanbang klem pangcheng dun lo. Chiklo ejon abainong suri nerkep vet pusitame keklem chepaduk dun lo. Apor ateng pen bainong kelongle ajoine penang akisung lapen suri nerkep vet chot ke chepangreng chetorok pu voiphit setame emethang elam aki kachinghon kedokok ajoinesi chirip dunverlo pusi Hanse asangho chethan. Karbi Languge Teacher ke kithirthip kalilang. Chiklo jon kre isi aphansi lamdon chetok chot lapen non kevangji Vosik niphai 31 arni lote lamdon kachetok kijut lo, lasi kopi pone puta alangli ningrisi KAAC kachari jabang atum Karbi Language Teacher anghoi pathirthip asonte mesenji puta alangli ningje. Halapu Karbi alam somindar adang pachethang dun thekji aphan Society for Promotion of Karbi Language (SPKL) kabor-i lapen kemang thek aphuthak ta alangli ning aklong pen kachoro pajir.
Karbi alam kachinghon ajoine West Karbi Anglong district Dongkamukam pen Diphu arongsopi la-an ajak kiding ta methang sonsuri asai che-o bubsi cycle kevek lok pen nangpalesi Thekar chapbang lapen Dibrugarh University EC bangphu lapen AUDC along member secretary abangphu Longsing Teron alangli  kachepaduk pen bangso amo kapapleng thek apot pu aningkangsam pen kachoro damji aphan alangli mathasi Diphu Rongkhelan ahem damsi chetongdam pen kachoro lapen kurvangthu pajirdam. Teron asangho alangli kachesong ahut kisung-keboi alam kachethan ahut Hanse asangho aning duk chepaklang lo. Longki Hanse methang alam lapu an kachinghon thek apot alangliphan aman pisi Karbi a poho pen Teron asangho archo dun lo.

Leave a Reply

Your email address will not be published. Required fields are marked *

June 2018
M T W T F S S
« Apr    
 123
45678910
11121314151617
18192021222324
252627282930  
Archives