ADVERTISEMENT

This area is available for advertisement. Please contact for details.

Arnivang
Get Adobe Flash player

Sai keklem paprap nang po, anparta asai mesen nangji: Piyush Hazarika

Diphu, Vosik 6: Kedamtang 2012 aningkan pen kikim kerangbom a Assam Hills Medical College and Hospital kikim-kerang kapatang dapprangji apharman Assam Health and Family Welfare Minister Piyush Hazarika nang kelangchari.
Laso ahut Sai keklem bom a contractor atum pen chingki-chethan tekang. Laso ahut Contractor atum pen keton-kelang kapangchingji aphuthak chethan dun. La-an chot kali longle kepek atengke chiri 150 seta a longle adang kedo 125 anvet. Lasi kenangji alongle prapjin pen kipiji mate ajahak atum longle kacherai atum aphan prapjin pen ketharleji aphan ta chethan dun.
Laso ateng lang adung kaselamji aphan CEM Tuliram Ronghang chechak dun. SP aphan Minister Piyush Hazarika chingki-chethansi keton-kelang kapangchingji

aphan ta pachini. Laso ateng Assam Hills Medical College along police outpost kibiji alam klang. La-an chot kali Agriculture a colony ajahak katharleji alam ta kachingvai along klang.
Ratpangri pen kopi akerap nangji lang ma puta minister pen contractor atum aphan arju. Kerap nangji dolang pulote nangrap dun po seta sai keklem patang serak nang po lapen asai mesen nangji pusi Minister Piyush Hazarika pachini tekang.
Pinpurme, kecheng ahut Assam Hills Medical College and Hospital kikim kerangji aphan sika crore 156 panong lo. Laso aphi kedorde detji angring kedo kok ajoine puthot tangka sika crore 53 pabat lo. Laso ateng Hills Medical College and Hospital kikimji aphan kado kave sika crore 209 panong lo pusi Brahmaputra Insfratructure Ltd. atum than.
Council pen minister atum pen kikim kapatang serakji aphan pachini tekang, seta barla arve kejang ahut ke kikim-kerang asai aphan katora thedung. Lasi kevangji aningkan There achiklo an malomsi patang unji puta Brahmaputra Infrastructure atum than.
Laso kahumri ahut KAAC Medical EM Khonsing Rongpi, PHE a EM Prodeep Rongpi, Education a EM Jagatsing Ingti, EM Ratan Teron, EM Kache Rongpipi lapen MAC atum Richard Tokbi, Mongal Timung, Horen Sing Bey, Lunsing Teron lapen Longki Timung anparta kaprek-kaprek atum chetong dun.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives