ADVERTISEMENT

This area is available for advertisement. Please contact for details.

Arnivang
Get Adobe Flash player

DU pen AUDC along Karbi Language Certificate Course Prof. Rongbong Terang arideng pen kangpu

Diphu, Vosik 6: Karbi alam kapachanji lapen kaprek-kaprek school, college along kapadengji aphan ajir dingklui pen akemang ateng Thekar chapbang Longsing Teron lapen SPKL atum kebor-i along Karbi Anglong Autonomous Council a CEM Tuliram Ronghang lapen EM Higher Education Jagatsing Ingti kacherap dun ajoine pini anke Dibrugarh University pen Assam University Diphu Campus along Karbi Language Certificate Course kibiji aphan pini ingpu lo.
Karbi Anglong Autonomous Council a CEM Tuliram Ronghang kachepahemphu kangpu amai along KAAC principal secretary Mahadananda Hazarika si kedeng alamthe jai. Laso ahut PS Mahadananda Hazarika kejai ke, non akai ahut khei barim atum alam kapaprang jumhek khangjang seta laso apor ahut Karbi alam lapuson angdeng kele dun ke pini arni Karbi akhei aphan kemepik arni lo.
MoS along ta Karbi alam kapachanji aphan penang an alam kejong do, lasi Karbi alam ke la-an sose chan po puta Mahadanada Hazarika jai.
Key Note alamthe kejai ahut Dibrugarh University a executive member lapen AUDC social advisory board a member secretary Longsing Teron pen laso asai kapachun along kacherap dun Dibrugarh University a VC,  AUDC a PVC, KAAC CEM lapen KAAC Higher Education a EM lapen kaprek-kaprek ardi kedoklong kacherap dun abangphu-phi atum aphan kachoro pajir.
Laso ahut non kevangji arni alangli lapen SPKL atum Class X along ta MIL along Karbi a subject kapalut dunji aphan bor-i bom pu alamta jai. Laso kapachun along Karbi Anglong Autonomous Council penta nang cherap dun po pusi ningthe lo puta Longsing Teron mai along jai.
Karbi Language Certificate Course kapachunji aphan ajat asai along ta nang cherap dun po pusi mai along Dibrugarh University VC Nava Kumar Handique chechak. Tai ahom alam penta lapuson certificate course kibi alam pen chenglok longri angkang kedo kaprek-kaprek khei barim mate kheiso atum alamthe aphuthak alangli jai.
Mai along Dr. Binod Chandra Bora pen Karbi Language Certificate Course kacharli longji aphan kopipisi kenangji pu heihui alam mai along jai. Laso ahut alangli kethan atengke, 12 ki-un atumsi charli dun longji lapen bang 30 atum aphansi non amat amen kethapji aphan kapathik anparta kethom a course pen 300 mark doji pu heihui alam jai. Aron atang ke University atum kapathik atengsi klem nang po puta pachini. Laso along Karbi hamphang asong lapen kaprek-kaprek ajakong kedo atum nang cherap dun nangji puta alangli mai pen choningri.
SPKL ameiphu Welcome Teron pen laso asai kapachun along kacherap KAAC CEM Tuliram Ronghang pen chenglok kitap ketok Benzamin Ingti Kathar, Meerklar Teronpi lapen Biren Hanse anparta kaprek-kaprek kacherap dun atum aphan kachoro pajir. 
Pini amai along Padmashree Rongbong Terang ning arong chepaklang, kedamtang arni Kt. Longkam Teron lapen nelitum bang hini kemang asai pini anke kechun asonsi thek long lo. Lasi Karbi alam la-an sose aprang kapaprang dun thekji aphan KAAC Education EM Jagatsing Ingti klempon nang po pusi alangli choningri. La-an chot laso asai kapachunji aphan kachepadukpik apot Thekar Chapbang Longsing Teron aphan kachoro pajir.
Laso kichun apot neta ning arongpik lo, lasonsi Ru Semson Sing Ingti, Kt. Longkam Teron atumta aning arongpo puta alangli jai. Karbi alam pen certificate course ke-en dun chot ke chokche, Karbi alam pen ketok kelangta thekvek nangji puta alangli jai.
Maiphu alamthe kejai ahut Karbi Anglong Autonomous Council a CEM Tuliram Ronghang kejai ke, Karbi alam kapachanji aphan kenangji ason do-an nang cherap dunji.
Karbi atum UPSC pen chenglok kaprek-kaprek kachepate asatlang along Karbi atum MIL Assamese kalite Hindi ke-en nangkok titi ajok penang an katora do. Kevangji arni Karbi alam penta MIL ketok longji aphan tiri ratpangri atum pen aphong-aphong lo kachingki dam puta than.
Karbi alam Dibrugarh pen AUDC alongchot kali bonta Guwahati University lapen Silchar University heihui along palut dun long nangji puta alangli. State longvek nangji puke neli kemang kethenai alamlo, seta laso aprang ilitum emethang alam aki ta chepangcho vek nangji. Laso aphan ke ilitum methang pen amat Karbi alam ningje thek pame nangji puta CEM Tuliram Ronghang jai. Longsing Teron kachepaduk aphuthak ta CEM kachoro pi.
Mai along alohi sarpo Prof. Rongbong Terang arideng pen Benzamin Ingti Kathar, Meerklar Teronpi lapen Biren Hanse atum chelangpet ketok akitap ‘Karbi Alam Charlinang’ pu akitap ingpu lo.
Mai along Dibrugarh University pen kapaklang akitap mai along kachetong ajahak atum aphan pajir. KAAC pen Jambilee Athon lapen KAAC pen SPKL chelangsi mai along kachetong dun atum aphan momentos pajir dun lo. Mai along Karbi Anglong Autonomous Council a EM, MAC do-an lapen kaprek kaprek man kedo abangphu atum chetong dunsi mai ardi pidun.
Mai along Assam University Diphu Campus a Pro Vice Chancellor Prof. Sivasish Biswas, Dibrugarh University, School of Humanities and Social Science a Dean Prof. Nava Kumar Handique, KAAC Higher Education EM Jagatsing Ingti, Karbi Anglong Autonomous Council a EM, MAC chopha alohi aman pen chetong dun.
Dibrugarh University, Executive Council member lapen AUDC Social Advisory Committee a Member Secretary Longsing Teron, Dibrugarh University, Centre for Studies in Language a chairperson Prof. Arpana Konwar, AUDC Department of Commerce a HoD Prof. Ratan Barman, Dibrugarh University Joint Registrar (Academic), Dr. Binod Chandra Borah, AUDC Department of Life Science a Asst. Prof. Dr. Rabindra Teron atum manpeng alohi aman pen chetong dun.

Leave a Reply

Your email address will not be published. Required fields are marked *

June 2018
M T W T F S S
« Apr    
 123
45678910
11121314151617
18192021222324
252627282930  
Archives