ADVERTISEMENT

This area is available for advertisement. Please contact for details.

Arnivang
Get Adobe Flash player

DGC charli osomar atum ador ateng pen amen chethap long po

Diphu, Vosik 4: Diphu Government College a Principal Dr. Nirab Kumar Sharma aning kehang aling klemsi Karbi Anglong Autonomous Council pen chenglok kado kave aphan kachongthuiji aphan bor-i lo.
Ratpangri pen kado kave a college along isi chingbarkre men kachethap anam ke-enji aphan seven member committee atum pen kipi recommendation aloh ensi DGC along amen kachethap anam pabat krak lo. Men-men men kachethap anam kapabatkrak aphuthak KSA hini, HPYA, AASU lapen SYJ atum chelangsi kachesong par-om pen hur pacho dut lo.
Laso ateng Karbi Anglong Autonomous Council, Higher Education EM Jagatsing Ingti ardi endunsi aphong-aphong hamphang asong lapen DGC a principal atum pen chingvai lin lo.
Laso ateng kedamtang arni amen kachethap anam sika 1160 an pasun lo. Laso aphuthak Halflong Government College lapen kaprek-kaprek ratpangri a college along amen kachethap anam pabatbe pu alam keklang thu ajoine hamphang asong atum pen kachesong asai deng thu lo.
Lason thotsi Higher Education EM Jagatsing Ingti ta ahin-ahin pen birta ensi ahok alam tarlip lo. Laso ateng kado kave alam pangrum et aphi pini hamphang asong lapen DGC principal atum aphan phasi EM Jagatsing Ingti mai ingnilin lo. Mai along KAAC secretary Nirola Phangchopi pen chenglok kaprek-kaprek man kedo atum chetong dun.
Mai along kado kave alam chingvai-chingsai det aphi ahok alam klang lo. Laso ateng akimi mate men kachethap anam vek ateng paklang thu lo. Akimi mate ahokvek amen kachethap anam 5th semester Arts & Commerce (pass) sika 1910, (hons) 2030 lapen Science (pass) sika 2335, (hons) sika 2615 pathik lo. 3rd Semester Arts & Commerce pass. sika 1910, Hon. sika 2030 lapen Science stream Pass. course sika 2335 lapen hon. ke sika 2615 ansi pathik lo.
TDC 5th semester along Commerce pen Education a charli osomar atum computer science a subject anam sika 300 pithu nangji lang pusi Higher Education EM Jagatsing Ingti pen kepha amai along cherai det lo.
Mai along DGC principal Nirab Kumar Sharma kachomatha kechokche alam paklang long lo. La-an chot kali Dr. Nirab Kumar Sharma pen Karbi Anglong arlo kedo kadure det charli osomar atum aphan kachenekji aphansi lapuson asai langno keklem pu alam ta klangdak lo pusi arnikangsam apor pherangke amai along KSA ameiphu Semion Rongphar jai.
La-an chot kali netum kachesong along Council pen ardi nang en dunsi aprang DGC principal Dr. N.K Sharma jongjung pen kapathik amen kachethap anam pen phant 60 anbak nangsun lo. Aprang NK Sharma kapathik ateng 5th semester along Sika 5000 sose lapen 3rd semester alongta sika 4000 sose pathik lo.
Karbi Anglong Autonomous Council pen netum kachesong along ardi nang kipi dun pen lapuson kichun apot hamphang asong atum KAAC aphan choro. Seta laso akichun ke kithirthip kali lasi kevangji arni hamphang asong atum kachesong along ta KAAC atum ardi nangpi dun nangji kali pulote Seven Member Committee atum a recommendation ateng chundet pulote ladak charli osomar atum kasiksak dokokji puta pherangke amai along KSA ameiphu Semion Rongphar jai.
Pherangke amai along HPYA ameiphu Enjoy Tisso, AASU Diphu Regional Union ameiphu Shyamanta Gogoi lapen DGCSUS pen chetongdun.

KAAC Higher Education a EM Jagatsing Ingti aphan karju ahut kethak ke penang an ke Council pensi papleng nangkok po. Seta neli ladak kacharli keboidet atum aphan mathasi keklemme anke neli klem bor-i pen pachun lo pusi than.

Leave a Reply

Your email address will not be published. Required fields are marked *

June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives