ADVERTISEMENT

This area is available for advertisement. Please contact for details.

Arnivang
Get Adobe Flash player

Tuliram Ronghang kejalin pen Karbi Anglong chingthurpik lo: Piyush Hazarika

IMG-20180603-WA0022Diphu, Vosik 3: Kopili MAC Pawam Kumar Rai chari ponsi Kheroni along BJP Vikash Utsav amai kapangni.  Mai along alangli pen amatsi alohi kapachini apor en lo. Laso along BJP West Karbi Anglong District Committee ameiphu Arun Terang si kedeng alamthe jai. Laso ahut alangli Kheroni 30 Bedded Model Hospital kangpu long apot kachoro pajir. La-an chot kali Karbi Anglong arlo la-an sose kachingthur asai keklem thekji aphan kado kave atum KAAC aphan jakong pi dun nang po lapen BJP along cherap-cheto dun nang po pusi jai.
Kheroni arat chot kali West Karbi Anglong arat kehang ateng ajirding klui aphi ilitum pini 30 Bedded Model Hospital long lo pusi jai. La-an chot kali Hamren along Polytechnic, Rongkhang Constituency along engineering college kikimji aphan ta sikdang bom lo athe Congress atum ason alam kaningje ke dopik lo seta asai klemkle pen ningje chot abang ke BJP ke klemkle. BJP atum lam ningje o-eh, seta asai keklem ke dopik pusi MLA Dr. Mansing Rongpi jai.
West Karbi Anglong arlo state highway pen chenglok kaprek-kaprek kachingthur asai kedengji aphan ta klem bom lo. Lasi kevangji arni la-an sose kachingthur asai keklem bomji lapen keklem bom asai do-anta kapatang thekji aphan rat atum cherap dun nang po pusi MLA Dr. Mansing Rongpi jai.
BJP ke parivartan aratpangri, laso atengsi kachingthur kapaprang anatthu akachelar asaisi klem bom lo pusi KAAC CEM Tuliram Ronghang jai. Article 244(A) lapen kachingthur asai kelongji aphan nelitum PM Narendra Modi aphan chetong damsi kado kave alam chingki-chethan dam. Laso ateng alangli tongsekot Karbi Anglong aphan sika crore 94.11 atangka nanglo phit lo. Laso atengsi stadium long ni lapen kaprek-kaprek kachingthur asai klem lo pusi mai CEM pinpur.
CEM kaprek-kaprek atangka nang kele aphuthak than. Laso ahut a constituency tin aphan sika crore isi nang keleji alam ta pinpur. Non kevangji Vosik 7 arni pen

Karbi Anglong arlo kaprek-kaprek kachingthur asai kedengji aphan long-eh kesom lapen ketangtang asai kangpu pangcheng lo. Laso long-eh kesom asai Nilip Constituency pensi pangchengji puta Tuliram Ronghang jai.
Mai along Congress lapen ladak amahang kethek asong aphan pave det khangjang nang po. Kedamtang MAC kilik ahut constituency 26 angbong BJP si inghoi 24 chepahai lo, seta opposition avedet lo. Jongjung pen kachepahai dun bang hini atum ta non ke BJP alongsi dolo puta alangli jai.
Kedamtang Karbi Anglong ason kali, thedung kachelar thek longlo. Lahai ke kaike amat CEM Tuliram Ronghang Karbi Anglong kapachingthur mate Karbi Anglong aphan kopene-pena keklemji aphan aning kehang-eh ajoine lo. CEM Tuliram Ronghang kejalin pame ajok Karbi Anglong chingthur pik lo pusi Minister Piyush Hazarika jai.
Kikim-kerang bom medical college prapjin pen ingpu. Laso along ladak kedo loh kethek ariso-okorjang atum ongdung chokamar anghoi long dun po puta minister Hazarika jai.
Minister Piyush Hazarika pen BJP atum kedeng keso det atum aphan Atal Amrit, SHG atum aphan tangka 25,000 kipi, sai katiki atum aphan tractor, charli osomar atum aphan anam en-eh pin pen men kapachethap asai BJP atum pen klem lo. La-an chot kali voreng kave a ok-karjang (Youth) atum aphan loan kipi lapen AYUSMAN pu scheme BJP atum pen kedeng aphuthak than. Lahai asai BJP atum pensi klem chot Congress atum pen klemkle puta alangli jai tekang.
Tiri along BJP kachari ningkan pli pleng etlo, state along ningkan hini pleng etlo seta pini arni komatne BJP atum kopene atangka chopanglim det pu kaningje ajakong doma? Ave athe BJP ke kachopanglim kejok a ratpangri kachari puta minister Piyush Hazarika jai.
Laso aphi MAC Pawan Kumar Rai pen kado kave atum aphan kachoro pajirsi mai ingsamjin pachekak lo.

Leave a Reply

Your email address will not be published. Required fields are marked *

June 2018
M T W T F S S
« Apr    
 123
45678910
11121314151617
18192021222324
252627282930  
Archives