ADVERTISEMENT

This area is available for advertisement. Please contact for details.

Arnivang
Get Adobe Flash player

Kheroni 30 Bedded Model Hospital kangpu

IMG-20180603-WA0027Diphu, Vosik 3: Kedamtang 2011 aningkan state minister Dr. Himanta Biswa Sharma long-eh kesom tekang Kheroni 30 Bedded Model Hospital ahem kikim-kerang patangsi pini Health & Family Welfare a minister Piyush Hazarika arideng pen kapangpu.
Kheroni 30 Bedded Model Hospital ingpu det aphi hospital along malomso aphan mai pangni. KAAC Health & Family Welfare a EM Khonsing Rongpi kachepahemphu amai

along Joint Director of Health Services a Superintendent Dr. Kareng Rongpipi aloh kapachini lapen mai kepha alamthe jai.
Hospital along non amat specialist doctor kave det ajoine model hospital along keklem nangji ateng ke un-eh detji pusi mai kepha alamthe kejai ahut Dr. Kareng Rongpipi jai.
Mai along kachetong dun MLA Dr. Mansing Rongpi Kheroni 30 Bedded Model Hospital nang keplang aphurkimo thihek pen than. Laso a hospital along ajahak kenangsot ahormu kenangji alam ta alangli mai along paklang.
Laso ahut Karbi Anglong Autonomous Council a CEM Tuliram Ronghang pen Kheroni 30 Bedded Model Hospital along kavelang gynaecologist pen chenglok kaprek-kaprek kenangji ason do-an state ratpangri pen nang pi nangji pusi pachini dun.
State ratpangri pen Karbi Anglong arat aphan nang mathasi Kheroni, Balijori, Deithor along 30 bedded hospital nangpi lo. Kethom angbong pen pini ladak Kheroni alongsi ingpu paprang lo. Non kevangji Jakhong achiklo angbong ingpu pusi mai along pangdak.
La-an chot kali Kheroni 30 Bedded Model Hospital kelang pameji lapen kaike kapangthir etji aphan pachini tekang. La-an chot kali laso a hospital along keklem a nurse, doctor lapen kaprek-kaprek asaiphu-saikhi atum amethang asai kacheklem pen rat aphan kerap kipiji aphan ta CEM Tuliram Ronghang pachini tekang.
Alohi sarpo minister Piyush Hazarika pen hospital kapangthir etji alam pen chenglok laso a hospital kedo pen rat atum kerap kelongji alamthe jai tekang. Laso ahut alangli Assam arlo kado kave long 76 adim along 30 Bedded Model Hospital kevangji chiklo jontrok angbong ingpu po pusi pangdak. Lasi pini Kheroni 30 Bedded Model Hospital kangpu kecheng lo pusi mai along jai.
Laso aphi Khonsing Rongpi meiphu alamthe jaisi mai ingsamjin pen pachekak lo. Mai along KAAC EM atum Rupsing Teron, Amor Sing Tisso, Prodeep Rongpi lapen Kache Rongpipi, MAC atum Horen Sing Bey, Richard Tokbi, Pawam Kumar Rai,  Mongal Sing Timung, Reena Terangpi lapen Prabhat Chandra Taro atum ta mai along chetong dun. Bangso amai along BJP West Karbi Anglong District Committee ameiphu Arun Terang pen chenglok kaprek-kaprek song klembangphu-phi atum ta chetong dun.

Leave a Reply

Your email address will not be published. Required fields are marked *

BREAKING NEWS
June 2018
M T W T F S S
« Apr   Jul »
 123
45678910
11121314151617
18192021222324
252627282930  
Archives