ADVERTISEMENT

This area is available for advertisement. Please contact for details.

Arnivang
Get Adobe Flash player

PWD atovar kaselam amen pen kachopanglim aphuthak NSM pherangke amai kangni

IMG-20180409-WA0001DIPHU, Jangmi 9: CEM Tuliram Ronghang arideng kachibi PWD asaikam along tovar kaselam amen pen tangka kapanglim aphuthak pini Nagarik Suraksha Manch (NSM) pherangke amai pangni. District Press Club asaihem along pherangke amai kepha ahut NSM ameiphu Mahajon Kro kaningje ke, CEM Tuliram Ronghang kacheparideng PWD asaikam along tovar kaselam amen pen penang-an ke chopanglim lo pusi akoi van. Kro asanghoi kaningje ke kedamtang 2017-18 dihin aningkan kechengsi angkung (1st half) Diphu roads division aphan sika 16 crore ra 68 lakh, Dokmoka roads division aphan sika 5 crore ra 99 lakh lapen Baithalangso roads division aphan sika 4 crore ra 95 lakh atangka Karbi Anglong Autonomous Council pen kedamtang 2017 aningkan Aru achiklo niphai 20 angbong pajir lap lo. Lason thak thaksi adunthu angkung (2nd half ) Baithalangso roads division aphan sika 7 crore ra 64 lakh, Diphu division aphan sika 3 crore ra 24 lakh, Dokmoka division aphan sika 2 crore ra 27 lakh, Hamren roads division aphan sika 2 crore ra 20 lakh, Borpathar roads division aphan sika 2 crore ra 2 lakh, Bakalia roads division aphan sika 1 crore ra 39 lakh, Kohora roads division aphan sika 99 lakh lapen Umpanai roads division aphan sika 1 crore ra 83 lakh atangka KAAC pen laso aningkan There achiklo 31 aprang pajir lo. Halapu building division aphan sika 46 lakh, electrician ahin sika 30 lakh lapen mechanical ahin sika 30 pajir lo. Lasi NSM kalakha pen kelong ateng pulote PWD asaikam along 2nd half ahut pangrumpet sika 23 crore ra 80 lakh atangka KAAC  pen pajir lo lapen laso angbong ajahak ke preng-arvo kipi dolo. Lahai atangka KAAC pen pajir lo setame tovar kaselam kapachingthurji amen pen kapanglim ta dolo. CEM Tuliram Ronghang Irrigation asaikam pavirdet aphi non PWD asaikam along ta kapanglim dolo puta NSM ameiphu Kro asangho arboksi alangli kaningje thuke tovar kaselam amen pen PWD asaikam along kapanglim angthek nelitum kahumri dam ahut kethek dam long ke Diphu roads division kaparlo Diphu ahithi kachekoinot Harilal basti pen Men Ronghang arong adak 500 metre atovar JCB pen masapso nordung hut prui-prui ansi asai chirimjoi lo setame tangka sika 30 lakh ke pajir etlo. Lason thak thaksi Barlangpher tovar krongthom kachetok pen lang kangsam adak an tovar kaselamji aphan tangka panong lo setame saikam atum keklem damde det ajok rong arat atum chithur pultsi tovar cheselam nangkok lo anparta Diphu arongsopi BTC pen Gita Ashram adak black topping atovar kaselam nangji ke 2.6 km setame 9.13 metre jumdet lo lapen tangka abang ke sika 78,78,554 atangka lo-et lo. Chandrasing High School pen Rongmirdan adak ta km isi sose kaselam nangji alar 700 metre anbak jumdet lo. Lasonsi Baithalangso roads division kaparlo Basa Kro pen Dera Nihang adak km kethom selam nangji setame km hini sose anchot selamsi pangton kok lo lapen laso adak pangrum pet long 13 culvert kedo nangji alar long thom vet lapen tangka abang ke sika 87 lakh pajir etlo. Labangso atovar MAC Mongolsing Timung asopo Umtang Timung amen pensi kaselam puta NSM ameiphu Kro asangho akoi vansi PWD asaikam normal fund along tovar kaselam amen pen penang an atangka panglim lo pusi akoi van. Kro asangho kaningje thu ke NSM pen kejong adim heihui along an komane EM, MAC, Engineer lapen saiphu atum kaselam patang lo pu angthek nangpaklang un pulote nelitum rat athengno diya chohangji lapen nangkangsai aling ta chechakji pusi ningje.
NSM ameiphu Kro asangho Irrigation aphuthak angthek kapaklang ke, NLCPR pen AIBP Karbi Anglong apharman 2013 pen 2015 aningkan an pangrum pet 174 Irrigation scheme apharman non amat ke sika 250 crore sose atangka do. Lasi CEM Tuliram Ronghang kacheparideng Irrigation scheme asai heihui atangka pen kopi tong kiviji lone chini dunde detlo.
Assembly along lam keklang tang ke Karbi Anglong komat kachari ahutsi lamki kedo lo mate ma, ma amensi lamhoi kedolo pu karju ahut CEM Tuliram Ronghang amen ta klangdun lo setame alangliphan kapatarlipji aphan Assam ratpangri atum khang cheklo. Lasi Sarbananda Sonowal kachari aratpangri along kapanglim ahin angkur aphelong helang lapji pu kachechak along kosonsi lahai alamki aphuthak khangchek lo. BJP along dolo pulote tarliple lapen akaprek ratchari along dolo pulote patarli po pulote koson akangsai lo puta NSM ameiphu Kro asangho ningje.

Leave a Reply

Your email address will not be published. Required fields are marked *

BREAKING NEWS
April 2018
M T W T F S S
« Mar   Jun »
 1
2345678
9101112131415
16171819202122
23242526272829
30  
Archives