ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Traditional Sports Association ningkan isi kepleng katalon

IMG-20180409-WA0007IMG-20180409-WA0022Diphu, Jangmi 9: Karbi Traditional Sports Association ningkan isi kepleng katalon pen pachetonsi pini Diphu Lorulangso Rangsina Sarpo Cultural Hall along Karbi ajutang along kedo kapathu amokha aphuthak saikulat kapangni.
Todap porphai 8:30 apor meiphu Biren Hanse arideng pen song alama pachipursi katalon ajaimek pangcheng lo. Laso aphi chunbang Roshan Hanse jalinsi karlitang atum aphan chikimo lo.
Laso aphi todap porphai 10 pen Hambi kapathu lapen kaprek-kaprek jutang kapathu aphuthak saikulat amai ingni. Laso ahut Bimal Ronghang pen Joysing Rongpi atumsi hambi kapathu anparta Karbi pathu barim aphuthak mai along than lo. Laso ahut alanglitum hambi kapathu aron atang pen chenglok hako pen Karbi akhei atum kopi-pi asonsi kapathu bom aphuthak mai along than paklar.
Meiphu Biren Hanse chepahemphusi porphai 11:30 apor pen rat amaipi ingni, rat amaipi along alohi sarpo aman pen Karbi Anglong Autonomous Council a EM Rupsing Teron alohi sarpo aman pen chetong dun. Mai along pha pangjang alohi  aman pen Thekar chapbang Longsing Teron, KAAC EM barim Surjya Rongphar atum chetong dun. KCS ameiphu Chandra Sing Kro atum pen chenglok ongdung man-peng kedo atum alohi aman pen chetong dun.
Mai along alohi sarpo Rupsing Teron Karbi jutang kapathu kapachan nangji alam pen chenglok arlosomar atum sok ketok pachethang heihui asaisi hako ke chihung lo. La-an chot kali hambi lapen kaprek-kaprek jutang kapathu rong-aje along chot kali rongro kijui ahut ta pathu bom nangji pu heihui alam alangli jai.
Thekar chapbang Longsing Teron kejai ke, ‘Karbi jutang kapathu kapachanji aphan hambi kapathu pen chenglok kaprek-kaprek jutang kapathu school, college along anta ponsi kapathu pachepate nangji’. La-an chot kali non akai mate ove kimi atum methang alam kaningje jumbom lo, lasi pi alam kapachanji aphan ove kimi atum angbong pi alam kaningje kapachihungji aphan ta klem nangji pu alam pen chenglok ongdung ardi kedo klong alamthe jai tekang.
Mai along kachetong dun EM barim Surjya Rongphar hambi athengpi aklim KTSA atum aphan pajir tekang.
Kedamtang 43 Karbi Youth Festival-2018 ahut Hambi kapathu along kapathu ketheknai bang kethom atum aphan KTSA mahang kethek katalon amai along archo lo. La-an chot kali kengdongdang kekat kachebai along kekat keprap nai abangphu aphanta archo lo.
Mai kapajut ahut KTSA dun meiphu Sarsing Hanse kachoro alamthe pajirsi mai ingsamjin pen pachekak lo.

Leave a Reply

Your email address will not be published. Required fields are marked *

April 2018
M T W T F S S
« Mar    
 1
2345678
9101112131415
16171819202122
23242526272829
30  
Archives