ADVERTISEMENT

This area is available for advertisement. Please contact for details.

Arnivang
Get Adobe Flash player

AUDCTA son 20 Charter of Demand kapaplengji aphan kachesong

IMG-20180409-WA0016IMG-20180,409-WA0018Diphu, Jangmi 9: Assam University Silchar atum kelong ateng Assam University Diphu Campus along kelong dunde det aphuthak AUDCTA atum ningkangsamse chepaklangsi pini kachesong asai deng.
Kedamtang arni pen kapajir tang son 20 Charter of Demand Assam University along ajakong kedo atum pen kapaplengple det aphuthak ningkangsamse chepaklangsi pini charli osomar atum aphan loh thandet pen kesang apor khamkhe asai deng lo.
Laso ahut kedamtang arni kapajir a demand a charter aloh pini puthot pro vice chancellor arideng pajir thu lo.
Charter of Demand along kejong dun ke, 2007 aningkan AUDC seng det pen Assam University Silchar lapen Diphu Campus apharman koansi tangka nang kele paklang dak nangji, AUDC thanbang atum aphan Assam University abarim thanbang atum a list along palut dun nangji, Planning Committee lapen Building Committee heihui along AUDC penta pharman bangphu pon nangji, akaprek BPGS pen school board lapen BRS/Academic Council/EC Meeting along Diphu Campus pen ta pharman bangphu pon nangji, CAS/GPF/pension heihui pen kacherap asai an AUDC along ajakong kedo atum pensi klem et nangji, Diphu Campus aphan akaprek research cell pen examination branch do nangji, Data Entry Operator lapen loh kethan asaikhi atum aphan kithirthip anghoi pek nangji, Assamese, Anthropology, Geography, Political Science lapen Hindi heihui asaikam along kithirthip thanbang lapen alohi a thanbang dorplup do nangji pu heihui alam pen chenglok kado kave son 20 kehang alamthe jong dun.
Laso AUDC aphan panongsi bang kethom-pli atum aphan chokamar anghoi pek lo seta Assam University Silchar along pon et aphuthak ta ningkan kangsamse chepaklang. La-an chot kali AUDC along non amat kado kave bang 900 charli osomar do seta thanbang ke bang 50 anbaksi do chot puta AUDCTA atum chethan.
Silchar Campus along ke isi asaikam mate isi a subject kethanji aphan bang 12-17 an thanbang do, seta Diphu Campus along ke Hindi saikam along loh kethan athanbang inutvet, lason thakthaksi kaprek-kaprek asaikam along ta bang kethom bang pli ansi thanbang do chot. Lapuson kapachingbarbe aphuthak Assam University Diphu Campus Teacher’s Association atum pen ningkangsamse chepaklang.
Neli methang amat ta inut a thanbang lo, lasi nangtum kachesong along neta dolo lapen nang tum kachesong ke ahokpet lo. Kedamtang nangtum nang kipi a Charter of Demand aloh neli pale et lo lapen lata pale thu po pusi PVC pen AUDCTA atum aphan chechak.
La-an chot kali non kevangji Jangmi 17 arni Vice Chancellor Diphu Campus along vangji laso ahut kado kave alam angton pen chingki-chingvai dun long po puta PVC pachini.
Jongsi kehang ateng prapjin pen pachunche lapen AUDC aphan ardipipe bom pulote la-an sose ahir katang kachesong asai dengji pusi AUDCTA ameiphu Dr. Kh Narendra Singh lapen chunbang Dr. Vulli Dhanaraju atum pherangke athengno ningje. La-an chot kali kevangji kachesong along charli osomar lapen kaprek-kaprek hamphang asong atum kacherap dunji aphan ta alangli choningri.

Leave a Reply

Your email address will not be published. Required fields are marked *

April 2018
M T W T F S S
« Mar    
 1
2345678
9101112131415
16171819202122
23242526272829
30  
Archives