ADVERTISEMENT

This area is available for advertisement. Please contact for details.

Arnivang
Get Adobe Flash player

Pini Ekal Vidyalaya Anchal Acharya Sanmilan amai kangni

IMG-201..80408-WA0009IMG-20180408-WA0008Diphu, Jangmi 8: Diphu Government Girls Higher Secondary School along pini Ekal Vidyalaya Anchal Acharya Sanmilan amai kangni.
Mai along alohi sarpo aman pen Karbi Anglong Autonomous Council a CEM Tuliram Ronghang, KAAC Chairman Horen Sing Bey, EM Jagat Sing Ingti, Prodip Rongpi lapen Ratan Teron, MAC Mongal sing Timung, Richard Tokbi lapen Ramsing Timung lapen kaprek-kaprek man kedo atum chetong dun.
Mai along Hidipi, Silonijan, Baithalangso, Dokmoka, Hamren, Phuloni lapen kaprek-kaprek adim pen ta Ekal Vidyalaya klembang atum chetong dun.
Anchal Abhiyan Promuk Kanti Boro kachepahemphu amai along Anchal Pravari Birendra Hanse kejai ke, kadure ajoine ajahak osomar atum loh kacharli longle pen chenglok ason-ason akisung chechak nang lo. Lahai a osomar atum aphan kisung pen kapajokji anparta kacharli avarsai kipiji aphan pusi Karbi Anglong angkang kaprek-kaprek a Ekal Vidyalaya School than bom lo.
Ekal Vidyalaya akerap pen ajahak a osomar atum Jharkhand along anta loh kacharli avarsai long dun lo.
Karbi Anglong arlo non amat 270 an Ekal Vidiyalaya School dolo lapen non kevangji arni hum 540 ingpu thu alang puta alangli jai.
Loh charli ahin kapachingthurji aphan Karbi Anglong Autonomous Council pen ta un-an cherap dunji pusi KAAC CEM Tuliram Ronghang jai. Ekal Vidyalaya pen osomar aphan loh kapathekji aphan kabor-i apot KAAC CEM ningkangsam chepaklang. Ekal Vidyalaya School atum a ot adur kemesen ajoine kaprek school atum phodunde puta CEM than. Lasi kaprek-kaprek akisung along kacherap dunji aphan chingvai ponpo pusi CEM chechak tekang.
Jongjung pen kangpu atum thedung akisung do, athe latum ke osomar atum kipi atangka aphansi choton ding anvet lo. Osomar atum aphan loh kapathek asai along kado kave atum ta cherap-cheto dun nangji puta CEM choningri.
Karbi Anglong arlo monsam kapadoji lapen kapachingthurji aphan loh kacharli ahin kapaprang kenangsot. Laso aphan kado kave ning isi kedo pen keklem-kedam rappet kenangsot puta mai along Karbi Anglong Autonomous Council a CEM Ronghang asangho jai.
School kikimji aphan longle kave aphuthak ketok pen kachoningri aloh nangpi noi anke KAAC pen longle nangpi po pusi CEM chechak tekang.

Leave a Reply

Your email address will not be published. Required fields are marked *

April 2018
M T W T F S S
« Mar    
 1
2345678
9101112131415
16171819202122
23242526272829
30  
Archives