ADVERTISEMENT

This area is available for advertisement. Please contact for details.

Arnivang
Get Adobe Flash player

Longle kejor kanghu a mondol longle kipun bom ahut KSA kenep dun

Mondol Bisewas Daimary pen Rupram Hasnu atum aphan asai pen ingthan nangji: KSA

IMG-20180407-WA0019BOKAJAN, Jangmi 7: Bokajan Sub Division angkang No. 21 Borjan MAC Constituency kaparlo Karagaon along antan aso atum longle kachojorji aphan bor-i si joi-joi pen mondol atum longle kipun bom ahut KSA pen KSYC atum nep dun chek lo. Birta kelong dun ateng ke todap adap porphai 11 apor malom Karagaon Block No. 4 Balijan along inut angtan aso lapen bang hini longle kejor a agent Bipul Roy pen Bapon Sharma atum Diphu pen bang hini a mondol Bisewas Daimary pen Rupram Hasnu atum aphan phasi longle kapapun bom ahut Balijan KSA pen rong arat atum thek dun longsi khamkhe dun lo.
Jongdamme, Lahorijan, Balijan, Karagaon lapen Khatkhati atalom malom kaike amat longle kejor-kenam alam kachethang plup lapen Nagaland mate Dimapur kedo Naga atum longle namsi phant 80% Naga atum nang chejok tang lo. Laso aphi ta agent (Dalal) Bipul Roy pen Bapon Sharma atum kaike ta krung dirdarsi pini lethot ta lakh-lakh atangka pen longle kapanamji aphan bidi kanglim keklem ahutsi nep dun chek lo. Hadak kedo arat lapen KSA atum kapachini ateng ke lahai ke-ongdung alongle Mondol pen SK atum akerap pen Karbi atum alongle thi bor-i si patta aloh selam po lapen laso aphi ador keso pen jor inghu po titi seta akoi abang ke Karbi atumsi longle chojor thai titi pu setame ahok pet alam abang ke hala hen lo.
Pinpurme Karbi atum jongsi mondol asaihem along dam pen register along amen chelangji pulote Bisewas Daimary pen Rupram Hasnu atum kapaklangji aphan aning hanghe lapen kopine alam pen chepajok plot titi. Alanglitum lapuson keklem bom ajok pini arni anta Karbi atum patta cheselamji puta cheselam long vangve det lo. Lasi KAAC longle arpu kedo atum CEM, EM lapen kethe-kiding atum laso alam aphuthak kelang ardi pira adai kedo Bisewas Daimary pen Rupram  Hasnu bang hini aphan asai pen ingthan pet nangji lapen longle kejor agent Bipul Roy pen Bapon Sharma, bang hini aphan ta nep ingnangsi adai adai en nangji lapen jail thap nangji pusi Balijan Bokajan, Balijan KSA aro atum hang. Laso along Diphu kedo penang an kethe-kiding atum amen ta keklang do.

Leave a Reply

Your email address will not be published. Required fields are marked *

April 2018
M T W T F S S
« Mar   Jun »
 1
2345678
9101112131415
16171819202122
23242526272829
30  
Archives