ADVERTISEMENT

This area is available for advertisement. Please contact for details.

Arnivang
Get Adobe Flash player

Ingdeng 3 KARAA mahang kethek arni katalon

IMG-20180405-WA0015Diphu, Jangmi 5: Karbi Anglong Rong Asar Amei pini Diphu Lorulangso Hacha Kekan aklam along ingdeng 3 mahang kethek arni katalon.
Jaimek ateng todap porphai 10 apor malom sankur chunbang Dhonsing Ronghang jalinsi meiphu Ram Terang arideng pen song alam pachipur lo. Laso aphi mai along ahirjume kedoji aphan karkli kaphejo asai klem lo. Cho-arkli chophejo det aphi meiphu Ram Terang pen amat jalinsi karlitang atum aphan chikimo lo.
Anerlo porphai 2 apor malom pen Karbi Anglong Rong Asar Amei ingdeng 3 kepleng katalon rat amaipi pangni. Ram Terang kachepahemphu amai along sankur chunbang Dhonsing Ronghang mai kepha alamthe kejai lapen alohi kapachini apor en.
Mai along BJP songja Semson Terang pen chenglok kaprek-kaprek man kedo atum anparta kaprek-kaprek arong pen kevang arong asar atum chetong dun. Mai along kaprek arong asar atum pen kosonsi rong kachelang nangji lapen mekar kachepangri nangji alam mai along chethan rinti. Lason ahut Birla Hemari Bey arong arong asar Jensing Bey pen rong arat do-an aphan kelang kapachingbar nangji alam mai along jai. Lason thakthaksi kaprek-kaprek arong asar atum pen mai along penang rong-rup kacchepameji aphan mai along bidi-sore chepachoi.
Mai along ongdung alam chingki-chingvai det aphi non kevangji Chiti achiklo nipha 8 arni Singhason constituency angkang Longnit along Karbi Anglong Rong Asar Amei atum krungchingsai amai kangniji aphan cheparai lo. La-an chot kali adontin pen sika 30 kachirung nangji alam pen chenglok kaprek-kaprek kenangsot alamrai dengsi ingdeng 3 mahang kethek arni katalon amai pachekak lo.

Leave a Reply

Your email address will not be published. Required fields are marked *

April 2018
M T W T F S S
« Mar   Jun »
 1
2345678
9101112131415
16171819202122
23242526272829
30  
Archives