ADVERTISEMENT

This area is available for advertisement. Please contact for details.

Arnivang
Get Adobe Flash player

Bokajan along ITI pen transport aphuthak session along Momin karju dun

DIPHU, Jangmi 5: Assam Assembly budget session kapadobom along Karbi Anglong, jasemet Bokajan LAC constituency arlo ratpangri pen kacheparideng ason-ason asai ketang-ketangte aphuthak Bokajan MLA Dr. Numol Momon chardunron pen arju dun bom lo. Lason thak thaksi Jangmi 4 arni ITI pen transport aphuthak arju dun. MLA Dr. Numol Momin Transport asaikam minister Chandramohon Patowary aphan ketok pen karju ke, Bokajan LAC kaparlo Sarihajan along ITI asai keklem kopi aphansi pangton kok lo lapen labangso asai puthot komantulo kapangcheng thuji anparta komantusi kapachun po pusi arju lo. MLA Momin karju alamthe minister Patowary kejai ke Sarihajan along ITI ke Annual Operation Plan ateng pen Creation of 50 new ITI & 50 new ITC parlo lo lapen kikimji aphan kedamtang 2013-14 dihin aningkan kado kave sika 326.45 lakh atangka administration pen pajir lo setame finance asaikam pen sika 100.00 lakh ansi dihin aningkan pen long dun lo. Laso angbong pen non amat ke sika 99.69952 lakh atangka padam lo, amut atangka kelongle det ajok ITI kikim-kerang ington kok lo setame administration pen kelo atangka jongsi finance asaikam atum nang lo lo pulote prapjin pen labangso ITI ahem patang po. Laso atangka aphan 2018-19 dihin aningkan along cherai lo. Dr. Numol Momin karju thu ke ITI aphuthak saikam atum kopi-pi asai lo kacheparideng ke pu karju ahut minister Patowary kethak thuke Sarihajan ITI kapachunji aphan 2014-15 dihin aningkan sika 226.75 lakh atangka keloji aphan supplementary demand kacherai alamthe finance asaikam along pajir dun lo. Puthot 2016-17 dihin aningkan Draft Annual Plan along sika 226.75 lakh atangka kacheparai alamthe finance asaikam along palelo. La anchot ta kali sika 25.00 lakha atangka supplementary demand along kacherai alamthe pajir lo. 2017-18 dihin aningkan sika 226.75 lakh atangka (civil works) pen sika 220.00 lakh (Tools & Equipment) SOPD along sika 25.00 lakh atangka supplementary semand along kapajirji aphan cherai lo. Angsong kejong alamrai heihui aphuthak finance asaikam pen longle det lo. 2018-19 dihin aningkan sika 226.75 lakh atangka (Civil Works) pen sika 225.00 lakh atangka (Tools & Equipments) atangka finance asaikam along kachekroi alamthe kacherai dolo.
ITI alamthe arju det aphi puthot MLA Dr. Momin transport aphuthak arju lo. Ketok pen alangli transport asaikam a minister Chandramohon Patowary aphan karju ke, NH-39 pen 36 atovar along akele hormu karthang a truck atum aphuthak saikam pen kopi asai lo kedeng pu karju ahut saikam a minister Chandramohon Patowary kejaike NH-39 pen 36 atovar athak kacheleng akele hormu karthang a truck aphuthak sai deng lo, lake kado kave a district DC, SP lapen transport asaiphu atum pachingrumsi committee isi seng lo lapen laso aphuthak prapjin pen sai kedengji aphan lo palelo. Kamrup district transport asaiphu aphan laso aphuthak aron ateng pen sai kedengji aphan lamjai kapajirji aphan pinkhat lo anparta kado kave district transport asaiphu atum aphan U/S-3 pen 4 of the Prevention of Damage to Public Property Act. 1984 ateng pen halahai police station along lamhoi kipiji aphan pinhkat lo. Akele hormu karthang a gari atum GST kapachobai pu akoi nangkele dolo, lasi laso aphuthak sai kedengji aphan Central GST commissioner pen state GST tax commissioner, Assam along ahokpet asai kedengji aphan choningrisi loh palelo. Video conference penta kado kave transport asaiphu atum aphan kapachini tang alamthe hehui keklem pamekaji aphan ta sodak pinkhat lo. Laso ajoine 2017-18 (26-03-02 an) dihin aningkan sika 10,35,89,715 atangka akele karthang atum along adai kitu anam long lo. MLA Dr. Numol Momin karju thuke Bokajan pen Lahorijan along NH-36 pen 39 along MVI check point pangnisi abat karthang a truck heihui atum aphan kekhang asai klemji ma pu karju ahut minister Patowary kethak ke, abat karthang a truck heihui kekhangji aphan kaprek-kaprek asai deng lo. Lasi Bokajan pen Lahorijan along NH-39 pen 36 along MVI check point kapangniji aphan klemkle.
Halapu Bokajan Khatkhati atalom along inter state bus terminus & inter state truck terminus aphan ratpangri pen sai kedeng doloma lapen halabangso atalom along inter state bus terminus & inter state truck terminus kikimji aphan a project cheparideng jima pusi ketok pen karju ahut saikam a minister Chandramohon Patowary kejai ke Bokajan Khatkhati atalom along inter state bus terminus & inter state truck terminus aphan ratpangri non amat ke thangta cheparidengde lang lapen ratpangri pen laso aphuthak non amat ke kamatha avelang pusi thak.

Leave a Reply

Your email address will not be published. Required fields are marked *

April 2018
M T W T F S S
« Mar    
 1
2345678
9101112131415
16171819202122
23242526272829
30  
Archives