ADVERTISEMENT

This area is available for advertisement. Please contact for details.

Arnivang
Get Adobe Flash player

Kachepangthir aphuthak pini Deputy Commissioner cheroktok amai kepha

Jangmi 8 arni kado kave chelangpet kapangthir asai klemji: DC

20180404_120637Diphu, Jangmi 4: Karbi Anglong arongsopi angkang chepangthir et nangji pu akemang pen Karbi Anglong a Deputy Commissioner Mridul Kr. Mahanta pini Diphu Circuit house along cheroktok amai kephai.
Deputy Commissioner Mridul Kr. Mahanta kachepahemphu amai along Town Committee a Executive Engineer Nipu Dutta, Town & Country Planning a asaiphu Ruben Ronghang, School Inspector Rowelson Rongpi atum pen chenglok kaprek kaprek kedo abangphu atum chetong dun.
Mai along Karbi Anglong a Deputy Commissioner Mridul Kr. Mahanta pen Karbi Anglong arongsopi Diphu ahithi angkang pen chenglok Karbi Anglong angkang kapangthir etji aphan mai along pachini. Laso ahut alangli kejai ke non kevangji 2018 Pre achiklo Mahatma Gandhi kethek arni kangthir et a India le nong-eh pinang pu India Prime Minister Narendra Modi kaningje ateng Karbi Anglong ta isi kapangthir et a district paman nangpo pusi jai.
Mai along jasemetpet Diphu ahithi kapangthirjirji aphuthaksi kachingvai ardi pi. Mai along kachetong dun Diphu Town Committee a Engineer Nipu Dutta pen kejai ke, Town Committee atum det ke Diphu ahithi pangthir un-eh. Lasi Diphu ahithi kapangthir along kado kave atumta nang cherap dun nangji pusi alangli choningri.
Laso aphi Town & Country Planning asaiphu Ruben Ronghang pen mesen mesen abidi pachon dun. Laso ahut alangli kejai ke, Diphu ahithi kapangthirjirji aphan ahemtun ahem along dampen keter heihui ahormu keroi asai klemme, jongsi lapuson klem lote midu ta longpo lapen hithita ingthir muchot pusi alangli pachini.
Karbi Anglong arongsopi Diphu ahithi angbong kili put alangroi akung alongle jongjung atum kacherai et aphuthak DC kepha amai along Pherangke Sonju Bora pachini dun. La-an chot kali Town Committee atum kopipi klem nangjima pu alamta alangli mai along jai dun.
Mai along kachetong man kedo abangphu atum hithi kapangthir etji aphan monit atum kamatha chelarvek nangji, athe monit atum kamatha chelarle tik ke un-an pangthirji puseta un-eh pu heihui alam mai along jai rinti.
Mai along penang an chingki chethan det aphi non kevangji Jangmi 8 Bhomkuru arni kado kave chelangpet kapangthir asai kedengji aphan Deputy Commissioner pen lamrai pilo. Laso arni school, College lapen kaprek kaprek asaikam atum kapangthir asai along cherap dun nangpo puta mai along DC pangdak.
Kachepangthir asai kapachihungji aphan kangthirnai arong, kangthirnai asaihem lapen kangthirnai akulat atum aphan Paipai 15 det kejokvang arni katalon ahut nong-eh kipi lapen laso kapalangchariji aphan isi amei kesengji aphan DC mai along pinpur. La-an chot kali mai along kali kalanglang adim barpi kedo kapave detji aphanta mai along Deputy Commissioner paklang.

Leave a Reply

Your email address will not be published. Required fields are marked *

April 2018
M T W T F S S
« Mar    
 1
2345678
9101112131415
16171819202122
23242526272829
30  
Archives