ADVERTISEMENT

This area is available for advertisement. Please contact for details.

Arnivang
Get Adobe Flash player

Session along home department alamjai kapaklang

Kedamtang ningkan 13 angbong state arlo kacholangrem, dowry, daini kahonthe pen bang 1,773 atum apran kedam

GUWAHATI, Jangmi 2: Kacharli ahin chingthur lo setame state arlo non anta kacholangrem, dowry lapen daini kahonthe alamki pen apran karmut aphai jumje lang. Lason alamki pen kijumji kalisi aphi-ong bat thu ong lo. Asitin aratpangri ta laso aphuthak kekhangji aphan kilik ahut chechak bom lo setame pini arni anta khang un-eh det lo. Laso ajoine lapuson alamki aphurn-phurun kedobom ajok state arlo hamphang phalangno dak lo. Pini laso aphuthak MLA Kamali Basumatary ketok pen karju ahut home department pen state arlo lapuson alamki bat bom lo pusi chekobir lo. MLA Kamali Basumatary karju aphuthak home department pen minister Chandramohon Patowary kaningje ke, kedamtang 2006 aningkan pen laso aningkan There 23 arni an Assam along kacholangrem, dowry lapen daini kahonthe alamki pen apran karmut aphai bang 1,773 an dolo. Halahai alamki kapajumji aphan ratpangri pen kaprek-kaprek asai dengsi nonhetjong 181 akejoi pen helpline a number ingpu lo. Minister Patowary lamjai kipi ke kedamtang 2006 aningkan dowry alamki pen Kamrup metro district along apran karmut aphai ongnai lo lapen adunthu ke Nagaon pen Dhubri hen lo. Kamrup along phong 21 alamki pen apran karmut aphai dopik lo. Phong 12 alamki pen Kamrup metro district along lapuson alamki aprangsi lo kedo dun. Laso angbong dowry alamki pen apran karmut aphai ong nangnai lo. Laso aningkan adunthu ke Nagaon pen Dhubri district hen lo. Lason thak thaksi 2007 aningkan abang ke Nagaon district henlo lapuson alamki ke-ong nai, phong 14 lapen adunthu ke Karimganj hen lo. Karimganj along ke phong 12 an ledun lo. 2008 aningkan ta Nagaon district hen lo lapuson alamki keklang nai, phong 12 lapen adunthu ke Kamrup metro pen rural hen lo. La hini adim pen pangrum pet phong troksi, 2009 aningkan ta Nagaon district henlo lamki aphai ke-ongnai. Halaso aningkan ke kado-kave phong 13 lapen adunthu ke Karimganj hen lo. Lason thak thaksi 2010 aningkan ahut ta phong 16 lapuson alamki kedo pen Nagaon district kechengsi lapen phong 12 alamki kedo pen Bongaigaon adunthu lo. 2011 aningkan ahut phong 16 alamki dosi Nagaon kechengsi lapen adunthu 12 alamki pen Dhubri hen lo. 2012 aningkan phong 13 alamki pen Dhubri kechengsi lapen 12 alamki ke Barpeta. 2013 aningkan phong 22 alamki pen Barpeta ke kechengsi lapen 19 alamki pen Nagaon adunthu. 2014 aningkan phong 25 alamki pen Barpeta kechengsi adunthu ke Nagaon henlo. Hulaso ahut Nagaon along ke phong 20 dolo. 2015 aningkan ahut phong 22 alamki pen Barpeta kechengsi lapen 20 alamki pen Nagaon ke adunthu  lo. 2016 aningkan phong 24 Barpeta kechengsi lapen 16 alamki pen Nagaon adunthu, 2017 aningkan phong 20 alamki kedo pen Barpeta kechengsi lapen adunthu ke phong 13 Dhubri henlo lapen laso aningkan There 23 arni an phong kethom alamki pen Bongaigaon, Lakhimpur lapen Hojai district hen lo ke-ongnai lo.
Pinpurme 2006 aningkan pen 2015 aningkan an state arlo pangrum pet bang 37 so-arlo aphan kacholangrem alamki, bang 24 arta kangduk osopi aphan kacholangrem alamki, phong 1,253 dowry alamki pen apran karmut alamki lapen phong 71 daini kahonthe pen apran karmut alamki dolo. Lasonsi 2016 aningkan pen 2018 aningkan an kacholangrem alamki phong 26, dowry alamki pen 353 apran karmut alamki lapen daini kahonthe pen bang 9 aphan apran armut lo.

Leave a Reply

Your email address will not be published. Required fields are marked *

April 2018
M T W T F S S
« Mar   Jun »
 1
2345678
9101112131415
16171819202122
23242526272829
30  
Archives