ADVERTISEMENT

This area is available for advertisement. Please contact for details.

Arnivang
Get Adobe Flash player

Jisu Kristo kithi pen kithur arni katalon

IMG-20180401-WA0001Diphu, Jangmi 1: Pirthe adang Jisu Kristo aphan kekroi Christian a dhorom kirim atum pini amethang-methang a church along Jisu Kristo kithi pen kithurthu arni talon.
Bible ateng ke Jisu Kristo pirthe amonit atum apap pen kapajokji Calvary anglong cross athak amethang apran chipi lo. Laso ateng Jisu Kristo kithi arni aphan Good Friday lapen alangli kaningje tang ateng ni thom aphi kithi pen puthot thurthu lo. Kithurthu arni aphan Easter Sunday pusi hok lo.
Laso atengsi pirthe adang kedo Christian a dhorom kirim atum pini Jisu kithi pen kithur arni katalon ason thakthak Diphu Area Baptist Fellowship angkang kedo Hidisajir Baptist Church along ta Jisu Kristo kithi pen kithur alam chethansi talon dun.
HIdisajir Baptist Church a Associate pastor Lowrence Taro kachepahemphu amai along Pastor Pitor Bey arnam alam than. Mai along kenangsot alam an HBC chunbang Larson Taro pensi paklang lo.
Mai along HBCYD lapen HBCWD a lunse asong atum pensi arjumesen arnam aphan kero a lun luncheto kilun parju. Lason thakthak HBC a Miracle Band, Revival Band lapen kaprek-kaprek abangphu-phi atum jumesen ase pen arnam aphan kero alun mai along parju.
Mai along ahirjume kachohang akardom lapen kachirung anparta kaprek-kaprek aphuthak mondoli ajabang atum pen jalinsi arnam ardom lo. Arnam alam kethan abangphu along HBC a dihin rimbang barim Jerimiah Rongpi bible keporhi cherap dun.
Mai along Pastor Pitor Bey jumesen arnam alam than. Lason ahut alangli kethan ke, Bible along aprang pen ketoktang alam kapachekokji aphansi Jisu Kristo pirthe hache lo. Bible along ketoktang atengsi alangli apran chipi lo lapen arisangho aphan kachethan mate rat athengno aprang pen kapachethang tang atengsi alangli ni thom aphi kithi pen thurthu lo pu heihui alam than.
Aphi Mondoli Deacon Sing Tisso arnam ahirjume hangsi Easter Sunday amai pachekak lo.
Lason thak thak Diphu Area Baptist Fellowship kaparlo Mondoli tin along ta pini Jisu Kristo kithi pen kithur arni alir alon chipisi talon dun.

Leave a Reply

Your email address will not be published. Required fields are marked *

April 2018
M T W T F S S
« Mar    
 1
2345678
9101112131415
16171819202122
23242526272829
30  
Archives