ADVERTISEMENT

This area is available for advertisement. Please contact for details.

Arnivang
Get Adobe Flash player

DDS atovar kaselam km 17 pangjok tekang kok

Diphu, There 31: Memorandum of Settlement (MoS) atangka pen Diphu, Dillai Sarihajan (DDS) atovar kaselam asai deng lo. Laso ateng Dillai pen Sarihajan adak kedamtang penang arni pen selam bom lo.
Ningduk meme alam ke, Dhansiri Constituency kekrongput DDS atovar kaselam along Birla along kachetok dun National High Way pen Rongplimplam an Km 17 anbak selemlesi pangjok tekang kok. 
DDS atovar ajak kiding angbong Birlo National Highway kachetok pen Rongplimplam adak tovar kahenonai alom pangjok tekang kok. Laso ajok havar mate Birla pen Rongplimplam adak kedon ongdung rong arat atum tovar kacheleng penang an akisung do lo. Laso atalom kado kave Karbi, Nepali, Adivasi lapen kaprek kaprek akhei pangrumpet rong 50-60 anbak doji. Pinpurme, Dhansiri constituency angkang angbong Karbi akhei atum kedo ke-ongnai ahavar pule jongdam seta henone. Karbi atum kedo ke-ongnai lapen Constituency angkang angbong kachingthur kavenai puta pudam un.
DDS atovar kaheno chot kali bonta rong 50-60 sose arat kachingrum ahavar along ingdeng 10 an kacharli longji aphan School ihumta ave. DDS atovar ari  ratpangri a school, LP pen ME pangrumpet hum 8 anbak do lapen Jongjong pen kangpu (private) school hum 6  kado kave hum kre pli
angbak  school do. La-an chot kali Medical sub-centre ta humni anbak tovar ari along do.
Tovar kaheno pik ajoine charli osomar atum pen chenglok thanbang lapen kaprek kaprek asai aphan arnivang tovar kahelat atum aphan thedung akatora do. Laso atovar jongsi mesen pulote Dillai, Sarihajan lapen kaprek kaprek atum phan Diphu kevang ahut penang an akajoi doji anthe penang an ajak ke Manja kedonput National Highway pen pangbar lote akithi do.
Pinpur thume, laso adak kaselampo pusi DDS atovar kaselam a contractor atum pen penang an kipun lapen kaprek kaprek asatlang kelang asai klem lo. Seta non kaselam ahut ke pangjok tekang kok.
Laso adak tovar kaselamji aphan tangka kedorde dokok ajoinesi kapangjok tekang puta birta long.
Diphu LA constituency kaparlo Dhansiri angkang Karbi akhei ke-ongnai ahavar mate ongdung arat achethe angbong atovar kapaselamji aphan MLA Sum Ronghang ardi pi dun nangji lapen state ratpangri atum pen tame nang chingki pidun nangji pusi havar arat atum choningri.

Leave a Reply

Your email address will not be published. Required fields are marked *

April 2018
M T W T F S S
« Mar    
 1
2345678
9101112131415
16171819202122
23242526272829
30  
Archives