ADVERTISEMENT

This area is available for advertisement. Please contact for details.

Arnivang
Get Adobe Flash player

Chepardun ron MLA Dr. Numol Momin Session along karju

Bokajan along Akshai Kumar Jaiswal a farm pen ningkan pho angbong government fertilizer subsidy 10970.2 metric ton kejor kanghu

DIPHU, There 28: Assam lapen Karbi Anglong apharman kiduk -kisung ason do-an isi pen isi alamthe Bokajan MLA chepardun ron Assam Assembly Session along arju dun lo. Bang kethom a MLA atum  methang jung jung ale aphan Session along do dunjoi pusetame Karbi Anglong arat apharman MLA Dr. Numol Momin abangke eson pen eson akisung alam heihui aphuthak hodun lo. Kedamtang arni Karbi Anglong hemprek apharman pen danglok Assam angkangpi ST (H) backlog post, Ok pran pen Khadi aphuthak arju det aphi pinike Agriculture  asaikam aphuthaksi hodun lo. Pini Assam Assembly budget session along MLA Dr. Numol Momin karju alamthe ke, kedamtang 2016 aningkan Assam aho-or (fertilizer) aronre pen angtan alongri kanghu pon ahut Khatkhati police station along chingnangchek alam ratpangri atum chini dun ma pu karju ahut saikam a minister mate Agriculture a minister Atul Bora kethak dunke 2016 aningkan Pre achiklo niphai 31 arni thoila 80 paras brand single super phosphate aho-or aronre pen Assam pen angtan alongri kepon ahut Khatkhati along kenep chini dun. Laso aphi MLA Dr. Numol Momin karju thuke halaso akanghu a ho-or aphuthak kanghap damchek apuru aphuthak kopi pi asaisi kacheparidenglo pu karju ahut Minister Atul Bora kethak dunthuke halabangso apuru kanghap ahut haladak kado kave thoila (bag) 4617 aho-or longlo.  Shree Joswal ho-or kejorji aphan loh kehang kachoningri ajoine Karbi Anglong district Chief Justice ahin pen labangso a ho-or heno etna pu mathasi kedamtang 2017 aningkan Chiti achiklo niphai 7 arni hukum kipi ateng pen thoila 4617 aho-or Akshoy Joyswal aphan kejorji ahukum pilo. Laso aphi MLA Dr. Numol Momin puthot karju ke lapuson aho-or aronre kejor kanghu aphuthak Assam angkangpi saikam ahin pen kopi pi asaisi kedenglo pu arjusi laso aphuthak angton pen a report nangpitha pusi hanglo. Laso ateng pen arpu kedo saikam a minister Atul Bora kethak dunke lapuson aronre ho-or kejor abeha Assam along nahok a district alongta kapaklem longle detji aphan district Agriculture asaiphu atum aphan kapinkhat dolo lake supplement (A) ratpangri pen kipi subsidy aho-or Manipur anat kapangno Khatkhati a police atum NH 39 Assam-Nagaland ahoi adung thoila 80 (lin 50 thoila isi along) nep dun lo. Lasonsi pu-pu a district administration atum ahok alam kelongji aphan tarlip lo.
Police asaiphu methang asai kacheklem bom ahut check gate along ajo porphai 8:30 apor kekhang dun ahut karthang no MN 01 6171 a truck lapen kasalon loh (challan) amokha Nagaland chari pensi rikdak pen seal ta do bonta truck aphan gate pen papar longle detlo. Seta laso aloh Bokajan along kedo Assam Sales Tax a check gate pen thangta ridak pen seal ta ave lapen athak ketokdak ke laso ahormu Guwahati pen Imphal an keponji aphansi kevan bonta vekbang pen kachekobir atengke Bokajan warehouse kachepahemphu Akshai Kumar Jaiswal pensi nang kethap pu. Ratpangri pen kipi subsidy a fertilizer aronre pen kachonghu asai keklem honthe si truck pen hormu ta police custody an van det lo. Khatkhati police pen lamhoi atengke Diphu court (GR Case 925/16 under section 411/420 of IPC vide Khatkhati police case no 118/16). Aphi klardak alam kelongji aphuthak District Agriculture Officer aphan Justice Naba Kumar Deka Barua pen pinkhat lo.
Kapinkhat atengke, District Agriculture Officer Mohesh Rajbongshi kethak dun ke, nelitum asaihem along thangta a record ave lapen komat a subsidized fertilizer aphansi kejor damji ta chini dunde. Alangli kapachini thuke, Khanapara, Director of Agriculture along Akshai Kumar Jaiswal pen dealership registration no. 1124 dated 08/03/2011 henlo. Alangli klardak pen asontin kethak a fertilizer ratpangri keron a subsidy ador sika 617.30 pen sika 548.70 (lin phokep pen mate thoila isi along). Ratpangri pen kipi aho-or a subsidy along Akshai Kumar Jaiswal a farm pen aronre beha asai keklem 13257.4 metric ton kapanahok along keklem honthe meme lapen ningkan pho angbong (Jangmi 2012 pen Paipai 2016) 10970.2 metric ton a fertilizer kejor chonghu lo. Dealer pen kapachetak atengke ho-r keronji aphan ratpangri pen sika 5228836.128 anbak ratpangri pen padam lo.
Police pen court atum kahonthe meme alam kapangdak ke, kelong vekji achotiki amen mate kelong dun nangji atum amen kacheparideng asaikam pen chelangle anparta ko-an si subsidy a fertilizer kelong lapen dealer atum kelong amokha ketokdak ave. Lasonsi dealer a registration ahut keklem kedam nangji aboron klardak ketok-ang ave anparta kasalon asanchom ketokdak ta ave. Kor alongta jor me jor no alam ta tokdak de (sah abari kalite ply wood factory heihui) pen danglok Nagaland pen Manipur kasalon dam me alam tokte. Lasi agriculture asaikam atum keron kebak mate kejor asai along thangta kekhang dun ave. Bokajan along inutvet a dealer pen la-an ke-ong government a subsidy koson pensi kelong dam lone puta arju meme. Ahokpet alam kelongji aphan katarlip apor nang alang puta tarlip abetung atum pachini.

Leave a Reply

Your email address will not be published. Required fields are marked *

BREAKING NEWS
March 2018
M T W T F S S
« Feb   Apr »
 1234
567891011
12131415161718
19202122232425
262728293031  
Archives