ADVERTISEMENT

This area is available for advertisement. Please contact for details.

Arnivang
Get Adobe Flash player

Hamphang pachingthurji aphan Pherangke, KAAC,administration angbong kacherap do nangji: CEM

dpckaDIPHU, Thangthang 8:
Karbi Anglong kachingthur lapen monsam kapadoji aphan kaiketa pherangke, KAAC lapen DPCKA kechengsi mahang kethek arni talon administration angbong kacherap do nangji pusi pini District Press Club of Karbi Anglong (DPCKA) kechengsi mahang kethek katalon arni KAAC CEM Tuliram Ronghang jai. Diphu Former Growth Centre along atalon amai kangni ahut alohi sarpo aman pen kachetong dun KAAC CEM Tuliram Ronghang kejai thu ke kangkir ajutang Karbi Anglong
pen chepadi nang po lapen sai keklem ajutang abangsi rim nang po, lasi kangkir ajutang eson abang ke pherangke ahamphang atum ta pachethangthe detsi kemeji pusi nelichoningri ingtung pusi CEM Tuliram Ronghang choningri. Alangli kejai thuke jongsi team work ateng pen sai klem pulote ningkan 10-15 kachingthur un-eh adim ningkan pho angbong chingthur vekji pusi CEM lamchak chipi. Karbi Anglong kapachingthurji aphan keklem-kedam amo along konatne kechokche-kele dokok mate komane kachopanglim alamki angthek nangpaklang thek pulote halabangso adai kedovek atum aphan jail toiji puta CEM Ronghang asangho ningjesi kedamtang KAAC kilik aprangaprang neli phuthak akoi
nangkarvak alam pachethang lo setame neli thang ning ke-oi ave athe neli thang kechokche ave pusi paklar. Jongsi neli sopo lapen nelichor amen pen work order angthek nangpaklang pulote neli ratchari alongklam pen amatsi che-oh bupji puta CEM ningje. Asai tangte pen jongsi komane tangka endet pulote laphan ke KAAC pensi ingsai po puta alangli ningje. DPCKA a meiphu Kiri Ronghang kachepahemphu amai along alohi aman pen kachetong dun Karbi
Anglong a DC Adil Khan kaningje ke, kangkir ajutang masapso kijum en ajok kachingthur amohor nangdolo, lasi
kachingthurle do pulote monsam ta nangdo po. Kangkir ajutang abang ke pherangke atum ta kapachethangthe detsi
kemeji athe kangkir jongsi dobom pulote kachingthur ta avelo lapen kaprek-kaprek akisung chetong nang po. Lasi laso along jasemetpet ke pherangke atum ta arpu thepik. Kalardak alam long ansi ajat abirta ta pachethang nangji pusi ningje. Karbi Anglong a SSP Dr. Dr. G.V Prasad ta police lapen pherangke angbong kacherap nangji lapen pherangke atum keklem amo aphuthak jai. KCS a meiphu Chandrasing Kro kejaike, hamphang along arleng kere mate intellectual pu kehot ke pherangke atum aphan hen lo. Lasi hamphang kapamesenji aphan ke pherangke atum arpu the pik. Ningkan ingkoi jutang kapachingthur ahin neli long Diphu apherangke atum nangkarjap dun lapen nangkacherapnangkacheto dunthek aphuthak chorolo pusi ningje. Thekar chapbang mate JAFA state a meiphu lapen Association of Small & Madium Newspaper of India sikdang chunbang Longsing Teron kejai ke, pherangke ahamphang along ta ketok kachere nangji do. Pherangke along jung-jungsi chepaduk nang po lapen kerengji aphan ta chiri pon nang po, bonta ahut pen ke kacheparengji aphan ta akisung do. Karbi Anglong along anutin ta kachopanglim alam ningje hur setame komalo kachopanglim alam kaningje hai puta alangli ningjesi adviertisement le ave pulote paper ta kereng sungkrung. Pherangke atum bainongle long oh-eh setame rat apharman mathasi paklang bom lo. Soluk-sodak apor ahut administration pen law & order atum kapangsamji aphan kabor-i along kosonsi kacherap kacheto dun nangjima isi apor ahut chetong nang lo puta alangli ningjesi sai langno keklem atum kiduk-kelak arat avi kachongsip asai kapavirji along pherangke atum administration along kacherap dun kenangsot. DC Adil Khan lapen SSP Dr. G.V Prasad atum ladak asai nangketang pen ke Karbi Anglong along kangkir ajutang ta nangjum lo puta ningjesi ilitum hamphang kapamesenji aphan arpu thedung lasi ilitum angdi isi do nangji pusi ningje. Lason thakthaksi kachetong dun pherangke abarim Nogen Bora lapen Pabitra Bora atum ta pherangke atum keklem-kedam amoton lapen a-ot adur aphuthak ningjesi hamphang kapachingthurji along keklem kedam nangji aphuthak ningje. DPCKA sankur chunbang Danielson Bey mai alamthe kejai along alohi aman pen KAAC MAC Mongolsing Timung, Ramsing Timung, SP Dr. G.V Sivaprasad, pherangke abarim Nogen Bora, Mukul Bora, Pabitra Bora atum pen danglok ongdung pherangke along kacherapdun abangphu bangphi atum chetong dun. Adap apor DPCK ameiphu Kiri Ronghang lama ingthur det aphi puthot kachikimo asai angdeng along bidisar Sanju Bora melur kai jalinsi DPCK ningkan isi kepleng ahim ingthangsi mahang kethek katalon asai pachun.

Leave a Reply

Your email address will not be published. Required fields are marked *

February 2018
M T W T F S S
« Oct    
 1234
567891011
12131415161718
19202122232425
262728  
Archives