ADVERTISEMENT

This area is available for advertisement. Please contact for details.

Arnivang
Get Adobe Flash player

Risim ase karkli aphuthak police commissioner along KMSS lamhoi kipi

Sarbananda Sonowal cherap dunsi Sangha pen kacherap asong atum risim asai klem bom lo

GUWAHATI, Pre 2: Kedamtang Chiti niphai 30 arni Guwahati Lalganesh Bhairavtula pu along aklim-angphar atum aphan rim ponsi risim ase karkli asai kedeng aphuthak Pre niphai isi arni Krishak Mukti Sangram Samiti (KMSS) atum Guwahati police commissioner along lamhoi pidam det lo. Assam along non hetjong RSS Viswa Hindu Parishad pen Bajarang Dal a Durga abitung atum risim asai keklem aphuthak pangton nangji puta KMSS atum hang. Pachetak aloh pen KMSS a meiphu Raju Bora lapen jabang atum Bhasko D Saikia, Dhorjya Kunwar lapen Mukut Deka atum kapangdak ateng ke RSS pen danglok Sangha aro-arim do-an mate kacherap asong atum Assam along nonhetjong risim asai keklem bom ke democratic aron aphan kether det kali Assam aphan ta isi kether ason lo. RSS atum Assam along risim aseke pisi risim ke-ot abitung kaparjapji aphansi klem bom lo. Assam along bang 1 crore 90 lakh Bangladeshi kevanji pu along, langroi keteng lapen jangthu alamki heihui along RSS atum cherap dunsi Assam arat atum lahai aphuthak kekroikre ason along kekhamkhe dun atum lo. Halahai aphuthak Assam arat atum kachesongji pu along kekhamkhe dunji aphansi BJP-RSS atum seke kipitang risim ke-ot abitung atum aphan kaparjap dunji aphansi kachisik. Sarbananda Sonowal kacherap dun pen non Assam along RSS lapen aro-arim atum rat thekprong risim asai keklem pangcheng bom lo. Laso asai keklem ke amethang kacheraikomji aphan pu Chief Minister Sarbanada Sonowal ningje lo setame Sonowal laso along kerai dun abang ke KMSS pen ke mantune ta deng thekthe lapen kroithek thekthe puta pachetak aloh along pangdak. Halapu Assam police aphan ta KMSS jabang atum sodak pinremsi kapangdak ateng ke police atum constitution aron ateng pensi amethang arpu cheklem nangji apot lo, setame lapuson klemklesi non ke Sonowal ratpangri kopima ketoi laso atengsi klem varet. ADGP Mukesh Sahai ta amethang amat ta RSS atum risim asai keklem along kerai dunji aphansi sun dun plung lo. Mukesh Sahai ke ADGP kali RSS atum a professor atengsi sai keklem dun. Bang 1 croe 90 lakh Assam along Bangladeshi kevanji pu along khamkhesi Assamese akhei keraiji aphan kenangsot pulote risim otji pu kipu ajoine Akhil Gogoi aphan det ahotur pu akoi pisi nep chek lo. Assamese akhei alam eki keraikomji aphan risim otji pu ajoine inut abangphu aphan kangnang lapen RSS pen chenglok aro-arim Sangha kacherap atum risim asai keklem along kerai dun pen amatsi Sarbananda Sonowal ratpangri pen Assam police atum a-ot adur rat athengno cheklang dak lo.
Jongdam Me KMSS atum laso aprang ta Hojai along kedo RSS asaihem along Bajarang Dal Durga abitung atum risim aseke kipi aphuthak police aphan pachini lo setame police atum laso thang asai ta dengde det lo. Assam police atum jongsi lapuson ratpangri ahukum ateng pen RSS lapen kaprek-kaprek Sangha atoi asong atum aphan risim asai paklem bom pulote Assam police aphuthak ta kachesong dengji pusi pachetak aloh along pen KMSS ther.

Leave a Reply

Your email address will not be published. Required fields are marked *

October 2017
M T W T F S S
« Sep    
 1
2345678
9101112131415
16171819202122
23242526272829
3031  
Archives