ADVERTISEMENT

This area is available for advertisement. Please contact for details.

Arnivang
Get Adobe Flash player

Khei anujok kapangtang

Ihum ingtangklong apoki-dalan ahem kimji pulote a arlong-sangti, nujok-nujam, ingchin pen a thengpi heihui mesen pen ingtangklong nangji. Nujok-nujam ingdukvok lapen a-arlong-sangti heihui jongsi mesense pulote hem alingta ingtangklong kle detsi malomso aphi rurai po. Isi akhei jongsi ingtangklong mate jat amota chingthur dun thek nangji pulote bangso akhei amonit atum resoi, seletledei, tengkaijai nangji, khei-longri aphan kachinghon thek aning do nangji lapen jat akam arpule hodai seta methang asai kachepachun pame thekji aphan matha-e atum do-o nangji. Lasi pudet lote methang akhei kachingthur dunji lapen kangtangklong nangji aphan anujok-nujam, asangti-arlong, ingchin, cement, thengpi heihui ta ilitum helo. Ilitum jongsi methang asai chepachun pameme, seletthai, thang klemkle arni pen apor panahok tap varet lapen  methang apharman punon mate khei apharman punon ephan eketang arpu chelang pame thekthe pulote arlong-sangti kememe pen  thengpi kangduk pen kikim ahem le kiru dapprang asonsi ilitum akheita mo pejo-pejo pen thivin-thivansi virdetji. Pudet lote, ilitum chepaseletle dei, klem alingta pherere pin pen klemdet hai, methang aphan arpu nangketang anta mesen pen kaita kapachun ponji aning jongsi do pulote ilitum Karbi akheita bang atum ason kapaprang dunde detji alam amatsi ave. Pini arni pirthe adang langdam pamelo lote thek longji la athak kaparno tang a-ot adur kedo akhei atumsi pirthe along hajat amota chingthur chot lapen pirthe dongthor cheplanglo. Karbi atum angbong lahai a-ot adur kedo atum ing-ar olang pule pudam seta kertangte detji pusi neli mathadam lapen lahai a-ot adur ilitum ta rim dun serakre te mo aphi seta ilitum paprang dun un-e detji pusi neli kroidam pime. Inut amonit jong-jung akai punon kopine mesen a-ot adur avete chingthur dun thekthe. Sonthotsi, khei aling seta penang-an kemesen a-ot adur kedo atum ongdung  avete kheita chingthur dun thekthe. Non anke ilitum Karbi atum angbong lason a-ok adur kave atum ke-ong munaklang ajoksi Karbi Anglong alongri ingnam, longle arlo athor lapen longle aphom keme pen sok-sang pen jat ahormu le chotiki-chonghoi seta me-o puthu voiphit seta paphi dun hup lo. Lasi akaprek akhei atum asonsi ilitum ta paprang dun nangji pulote lahai jong-jung kachingthur aphan lapen khei kachingthur aphan kenangsot a-ot adur heihui ilitum asomar aphan un-an pen than pachini veknangji. Non Karbi angbong ratchari asongja pen chokamar choklem bom atumke  malomso aphi lote a-ok apran pen ajakong nang ave bomsi khei longri aphan thangnat ta klempi-un-e detpo. Ahok alam pudam-et lote non kedobom asongja atumke non apar kopine thedung asai khei apharman klempi-unjilang puke un-e detpo tahai. Lasi khei longri apharman keklempiji arpuke non ove kimi atumsi cheparideng ponpo. Ovekimi atum angbong kaparnotang a-ot adur dotangsi non kedobom khei asongja atum keklem apar themuchot, prekmuchot lapen memuchot asai cheparideng pon unji. Lahai alam munthi dam pame pen ilitum asomar atum aphan mesen a-ot kapacharli aphuthak lahai a-ot adur kirim mate abe kachepadoji aphan api-apo atum bor-i pik nangji. Lahai a-ot adur pensi amethang solajong akaita paprang dun unji lapen amethang atum kapaprang alongsi khei-longri ta paprang dun po. Lake khei anujok kapharang asonlo.

Leave a Reply

Your email address will not be published. Required fields are marked *

October 2017
M T W T F S S
« Sep    
 1
2345678
9101112131415
16171819202122
23242526272829
3031  
Archives