ADVERTISEMENT

This area is available for advertisement. Please contact for details.

Arnivang
Get Adobe Flash player

Ha-ih, Long Teron, Jeksai, Waisong, Thongnokbe lapen Rongpharpi Rongbe araje mumang khei atiri

–– Baroi Thare Bapuram Timung

Kadure ajoine phurkimo jong jung si nangplang chot lo. Lasi raje mumang abang ke ave det lo. Ilitum pini angbong chethek longlo, ilitum angbong setame kethek kere do lo. Ilitum aphurkimo mate toklang ahin pen pusetame penang an paklang pon thek bom lo. Mesen mesen aphurkimo pen lunjir-lamjir nangdo lo. Lasi ilitum aphurkimo amelur akar themuchot lo lapen atur chtang muchot ason si chethek long lo.Bonseta non abang phurkimu amelur atok-ano lepo pu me. Athe non ovekimi bangphu-bangphi atum tame jutang-jubat atur kecho-eh mate atur ke-eh ponji aphansi si chesik theklong lo. Lasi ilitum along baroi basim (Sculpture) mate arjan kehi (Painter) abangphu-bangphi setame do bom lo. Alanglitum mumang kasonse pen dang lok alir-acham kipi akam angdeng ta klem pame si paklang pon bom nangpo. Ilitum araje mumang pachini paklar dak thek pulote kevangji ovekimi atum aphan isi joike khei kangthur atovar kepan pi tekang ason po mate khei ajutang-jubat kasonse paklar dak pen ingthur pon thekji isi angthek cheman po.
    Lasi ilitum akhei setame bang bang kethak kere akhei atum ason aphurkimo pen araje mumang arjan kasonse pon pen paklang pon thekji aphan si bor-i nangpo. Lason thak thak si phurkimo arjan angthek ahisap pudam lote- Lachit Borphukan, Rudra Singha alanglitum arjan lo pusi aphurkimo pen arjan pen pachini lo. Julaso ahut ke (Canera, Vedio Cemara) pule kedo ta kali. Seta alanglitum arje mumang setame phurkimo pen lason lo pu si chikimo long lo lapen ke araje mumang setame chini dun lo. Lachit Borphukan araje mumang nahok arjan le thek long setame ilitum chini joike lo.
    Lasi non abang ke madu abangphu setame Lachit Barphukan lapen Rudra Singha aphan ke ning hang aling ke sonse thap long le det lo. Athe, alanglitum alir-acham pen kedang lok abang arpum an setame ri-tarlip pame, sik pame et pen si araje mumang sonse lo. Lasi pini arni setame araje tekang si bi thip lo lapen bisar alam arnam arjan kasonse lason thak thk si Brahma, Bishnu, lapen Lakhi heihui ta julaso ahut ke Cemera pen aharchi kenep pu kali setame mumang ta kethek kere atum mo pajoikeji aphan  bi tekang amat do thip lo.
    Lasi arnam arjan dothip ajoine Brahma arjan setame madu ta theklok aling ta chini lo. Athe ke Braham ke Golape amir athak si kedo tangho. Lasi ilitum Brahama arjan ke nahok le thek long setame chiniji lapen Lakhi ke Padum amir athak si kangni theklongji. Athe julaso ahut pen sonse pame et lapen alir -acham  pen dang lok alun aporom heihui anta.
    Lasi ilitum Karbi akhei setame Braham lapen Bishnu arnam mate Lachit araje amumang asonsi ilitum phurkimo Sarpi-Sarpo atum aphan setame ri-tarlip pame et pen arjan kasonse pen pen lok alir-acham heihui sir pon nangpo. Kala pulote ilitum siu chepeng pet pen arjan chingvai-chingsai chedon sar pen labangso araje mumang setame sik pame si sonse pon nangkok po. Athema non ovekimi kethek kere atum pusetame ilitum khei along nangklang bom lo, lasi lason le Hai-ih, Long Teron, Jeksai, Waisong, Thongnokbe lapen Rongpharpi Rongbe alanglitum aphan seta  ri-tarlip pen chingvai-chingsai pon pen mohor pi tekang nangkok po. Athe ilitum non pusetame chechini pame puke ave lang. Lasi Hai-ih amohor hampur ason lone chinine det lo. Lason thak thak si Thong Teron ke araje mesen pu chini chot.
    Lasi non abang ke ilitum alanglitum aphan mohor pi pen pindeng-sumpot alir-acham pi pon pen sonse si isi pathik vet nang po. Madu le thek long seta lake Hai-ih arjan, Thongnokbe arjan pu chinihur po. Kapindeng-sumpot seta sik pame sonse pame pen pindeng nangpo.
    Ilitum ove suri le vang setame lahui aphurkimo mate araje mumang chelar jokphlotji lapen klar dak pen arjan langrai seta chini joike po. Non ilitum akhei angbong seta aphai nang ongbom lo. Jongsi non pen sik pon pe pulote mo arnisi ke sungkrung po. Lapen ovekimi atum ke mo Hai-ih araje mumang pusetame Cenema arloso arjan ason si sonse dun det tahai po.
    Athema, ilitum Karbi angbong nongnam kachethang nei phurkimo Sarpi-Sarpo ke Hai-ih, Long Teron, Jeksai, Waisong, Thongnokbe lapen Rongpharpi Ronbgbe heihui hen lo.Lasi alanglitum henlo khei lapen jutang-jubat along setame atiri pule puta me. Lasi alanglitum araje sonse pen paklang thek pon bomji aphan si abangphu-bangphi tin ta mathahur pen khei atiri paman pon pen nong isi angthek pen van thek po.

Leave a Reply

Your email address will not be published. Required fields are marked *

October 2017
M T W T F S S
« Sep    
 1
2345678
9101112131415
16171819202122
23242526272829
3031  
Archives