ADVERTISEMENT

This area is available for advertisement. Please contact for details.

Arnivang
Get Adobe Flash player

Osomar aphai kapajum abidi ke, khei barim aphan kapavirji atovar

BJP sorkar Assam alongri armu aphai kebat kekhangji aphan isi abidi deng lo. Edon pen osomar bang hini apar pedo longle. Osomar bang hini abat kapedo atum aphan sorkar achokamar pipe,  Panchayat kilik  arjap dun longle pu aron (Act) Assam Assembly pen cheparai lo. India  monit aphai kebat phere meme anlo. Non pirthe adang  ingdeng hini (second) armu ke-ong nei adet lo. China adet aphan aphichot annat lo. Non ateng jongsi armu aphai nangchan bom pulote penang-an aningkan aphike China adet aphanta litdet po. Lasi armu aphai kapajum abidi aphrang-phrang penta Family Planning pu asai dengbom lo. Bonta India adet bangso sorkar pen kedeng pon asai chun-un-edet ajok armu aphai nang kijumji kali nangkechan litmuchotsi angthek klang lo. Armu ong-ong pulote longle-phelang, chokam amo kedorde, kachetangte dokokpo anke det kapangri sungdet po pusi sorkar kamatha dam lata ahok pet alam. Non amatta  India adet monit aphai ke-ong pik apotsi kecho-dorde, kijun-dorde. Longle-phelang kachetangte alam nang dobom lo. Lasi detpi adangpi alam matha dam pulote sorkar kamatha akam mesen lo pu dam meme. Bonta munthi dam parsik peme lote bangso abidi ke kheisomar atum aphan kapivirji abidi pinak. Assam alongri armu aphai nangchan piklo apotsi longle-phelang kachetangte lapen chokam amo katora do tanglo. Lata ahok alam binonglo. Bonta ladak kedo barim pulonang-Bodo, Karbi, Mishing, Tiwa, Assamese, Ahom heihui atum armu aphai nang kechanpik apotle lason keman kali. Bangladesh adet amonit aphai nangkechan pik apotsi pini arni Assam alongri la-an kisung-katora kepho nang lo. Non amat Bangladesh aso armu aphai aphant 35-40 (percent) ando etlo lapen arnivangsi suri-suri atum aronre pen vangbom lang. Non jonghet angthek kapaklang atengke phant 50 sose khei barim atum alongle lahai Bangladesh aso atumsi cheraidet lo. Kopi apot? Lake ladak khei barim atum armu aphai kijum apot. Armu aphai kijumhek ajok methang alongri arlo kedo pachetang thekthe. Ihin rikpron, ihin rik pron amat lakh-lakh ingnam alongle  achiri adang kethe pu-an bikok amat angtan pen kevang atum nangcherai joike lo. Ladak sorkar ta latum aphan kekhang dunji kali vote apuru (vote bank) kachobi aphan matha rong amat non aphu athak chiri arong kachi-e ason mandet lo. Latum armu aphai nangchan bom ratchari ajakongta nang ingtang bomlo. Bangladesh aso armu aphai kechanpik ajok  khei barim atum alongle-phelang vir bomlo lapen ratchari ajakongta nangvir bomlo pusi hangjolo lapen non amat Assam pen toi serak nangpo pusi kachesong kithurpak ahut Assam sorkar bangso abidi kirimke khei barim atum aphan kapivirji abidi lo. Khei barim atum armu aphai ke-ong-e apotsi angtan aso atum vangloklok lapen joike pen longle phelang nangcherai longbom lo. Non bangso abidi ke lo-kethek kheibarim atum chokamar longle detna pu kaphere atumsi deng chotji. Bonta lakh-lakh a Bangladesh aso atum sorkar a chokamar aphan ningkachethe penle ladak kedo kali. Latum angbong lo-kethek atum kijum pik ajok ongdung atum arta kave ako pensi penan do-et pen peso en-et titi. Lasi echor a Bangladesh asor kijumnei ta osomar bang pho chopathe vek po. Chor suri isi Bangladseh asor echor-chor bang pho a-osomar chibi lote ove isi bang suri pho armu nangchan tanglo. Bonta khei barim atum angbong bang suri hini natji. Lasonsi dak kedotang Bangladesh aso a-ove tinta suri-suri armu khei barim atum aphan nanglit bompo lapen arnivang kevangmi atumta  do-o lang. Jonghele sorkar bor-i seta  Bangladesh aso aphan ke phlung un-elo lapen aronre pen kevang atum aphanta khang un-e athema ratchari ajalin atum
lapen sorkar asaikhi atum tangka amek kethe ajok. Lasi Assam sorkar laso abidi kirimke Assamese atum armu pajum lonang lapen Bangladesh asor armu pachan lonang, Assam alongri pacheraidet lonang pu aphan chot lo. Khei barim atum aphan phere meme abidi binonglo.

Leave a Reply

Your email address will not be published. Required fields are marked *

October 2017
M T W T F S S
« Sep    
 1
2345678
9101112131415
16171819202122
23242526272829
3031  
Archives