ADVERTISEMENT

This area is available for advertisement. Please contact for details.

Arnivang
Get Adobe Flash player

Ganja araki pen gari kevek ajok bang pho apran karmut; bang 20 aphan areng kapaso

UntitledDiphu, Chiti 27: Truck vekbang abang ganja ingsip pame araki pen gari kevek ajoine bang pho kachongdat atum aphan apran karmut.
Kedamtang Chiti 25 arni Borpathar police station angkang Garampani a ingnam malom National Highway 39 along chongdat abangphu-phi atum aphan Deithor sai keklem adim along kepon bom AS 01 BC 2352 a truck kachingkoi ajoine bang pho atum apran kedam lapen bang 20 atum ahir ingtangrak areng keso pusi Diphu Civil Hospital along seh kechelang bom atum chethan.
Pinpurme, Deithor along kikim-kerang asai kapaklemji aphan pusi Chiti 25 adap Diphu pen bang 25 chongdat abangphu-phi atum aphan truck arne pon lo. Laso kedam bom ahut Birla malom pen kevek abang ganja nam pon pusi ganja kenam pi damvek abangphu Akash Gowala than.
Laso aphi dam bomsi Silonijan along pale lo. Truck along kachethap dun kachongdat atum kahurisai ajoine gari kevek abang kado kave aphan ingchek lo. Laso aphi kado kave atum Silonijan along singara choponsi adim along an kapaleji aphan barthu lo. Laso kebar ahut truck driver abang ganja kemon ling ajoine aning hangtik truck pachat lo. Kapachat thetik a truck a kongtelong men-men kanghangdak ajoine truck ajakong khangsi aphi kachethap bang 25 chongdat atum aphan hijik phak lo. Laso kahijik ahir kangtangpik ajoine bang kethom ke adim along amat apran damjui lo lapen bang hini atum Golaghat hospital along apran dam lo. Kedolang bang 20 atum ta areng keso ahir kangtang pikpik ajoine aphir-aphar chechinesi Golaghat hospital along le dun lo.
Bang 20 atum angbong pen bang 7 Karbi atum ta ahir ingtangrak arengso dun lo. Non amat ajahak atum aphan ahem asor atum Golaghat pen che-en damsi Diphu Civil Hospital along seh lang bom lo.
Truck vekbang Gobinda Sankar aphan police atum nep ingnang etlo puta areng keso abangphu Joysing Ingti than. Bang 25 chongdat bangphu-phi atum aphan inut Raju pu head mistri si karne pon lapen komatne Yakup Ali pu amonit asai alongsi kachongdat dunji aphan kidun puta areng keso dun abangphu Akash Guwala than.
Areng keso atum Samelangso asor Gautom Teron, Semson Ingti, Joysing Ingti lapen Dokmoka Phongbirik asor Dhoni Terang lapen areng keso dun Prem Ingti, Longki Ingti anparta Akash Gowala atum aphan konat asor lone patini thekthe lang.
Areng keso ahir kangtangpikpik ajoine kedamtang Chiti 25 arni kepho ahut aphir-aphar kachepangbo pen pini Chiti 27 arni Diphu Civil Hospital along ansi ajahak atum aphir kachevang thu lang.
Thikedar lapen contractor atum kachelang dunde det aphuthak kachongdat atum ningduk chepaklang. Ajahak atum aphan non amat Golaghat hospital alongsi seh lang bom lang puta than.
Bang 5 kithi angbong pinso bang 4 lapen arloso inut pusi kachingkoi along areng keso dun atum than.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives