ADVERTISEMENT

This area is available for advertisement. Please contact for details.

Arnivang
Get Adobe Flash player

BJP National Executive amai along kacheparai alamthe

Diphu, Chiti 27: Prime Minister Narendra Modi kejalin BJP ratpangri (Government) kachingthur asai keklem abidi heihui kemesen ajok rat atum aning kachethe lapen kacheto dun aphai batpik lo. BJP ratpangri pen pirthe adang India anong kapatheji, choki-chokam ahin kapachingthur lapen rat ale aphan la-an sose kachipidetji aphan matha bom lo.
Terrorism & separatism, social justice, foreign affairs, arlosomar atum man-peng kedo achethe kelongji lapen kadure det kapaphihup atum ale aphan choki-chokam kapaprangji aphanta bidi deng bom lo.
Prime Minister kejalin kemesen lapen det adang asontin ahin ta kapachingthur aphan keklem angthek penang akeme klang lo pusi national executive amai along klang.
Prime Minister Narendra Modi kejalin BJP ratpangri atum kedeng kapachun tang asai ajahak kejong ke kachingthur asai keklem along kachechar dak (Transparent) parjap lo.
Kapanglim lapen black money aphuthak rat aphan kachechak ateng BJP ratpangri atum klem lo. Laso aphuthak rat atum ningkangsam angthek kedamtang tangka kelar ahut rat atum cheto dun.
La isivet kedeng kethedung alamrai ajoine det arlo black market lapen black money kachibihup atum aphan amui arbung inglok lo.
Laso ajoine kangthirjir, MNREGA heihui scheme along digital asai pen tangka pi long lo, anam kijum pen gas, scholarship, pension lapen kaprek-kaprek hamphang kachingthur asai chechar dak pen kelong athek long lo. Lapuson aron ateng sai keklem ajok income tax ahin det arlo thedung kachelar thek long lo.
GST: isi adet- isi amedu, ajir dingklui det along akemang BJP kachari a ratpangri atum pen papleng lo.  Tangka kelar aphi isi kethedung akelar ke, GST kapachun hen lo. Laso ajok det arlo beha klembang atum akisung pen penang an jok longlo. La-an chot kali beha klembang atum aphan akejoi asaisi klempilo, arni ke-en ahormu along kipi nangji amedu arpu parjang lo.
Ok chumpran lapen kachethakjam aphuthak PM Narendra Modi kejalin BJP ratpangri kachari kecheng penta ardipisi sai deng lo. Klempar aphuthak sapso ta kachechakche abidisi kecheng ahut pen BJP atum deng lo.
Jammu & Kashmir along PM Narendra Modi lang kanglum akisung pen kapajokji lapen kachingthur scheme kedeng ardi pilo. Jammu & Kashmir along kachingthur asai kedengji aphan sika core suri 80 development package pangdak lo, AIIMS hini, IIM, IIT, medical college pho lapen engineering college kikimji aphan chechak lo. Lahai scheme kelong pen Jammu & Kashmir arat atum ta PM Modi aphan ning kachethe dolo.
Rat aphan kerap asai kedeng bom ahut klempar atum aphan kangjinso kave asaita deng lo. Prime Minister kabor-i ajoine pirthe along kedo klempar aphan asapso katora dolo.
Arlosomar atum man-peng kelong achethe aphuthakta non kedo bom BJP ratpangri atum pen penang an klem lo. Laso ahut Beti Bachao-Beti Padhao, Sukanya, Samaridhi Yojana lapen Ujjwala Yojana heihui a project kedeng pen ajok det adang bang crore 3 sose arlosomar atum ale longlo.
Arlosomar atum sai keklem adim along kedo-kethak mesenji lapen oso kachopathe atum aphan ta mesen a scheme deng lo. MUDRA scheme pen ajokta arlosomar atum penang ale long lo.
Non kedo bom a ratpangri atum supreme court athengno triple talaq aphuthak sai kedeng apot national executive atum pen kurvangthu pajir long lo.
Triple Talaq alamrai kedeng apot muslim akhei arlosomar atum pen danglok akheitin arlosomar atum pen kurvangthu nang pajir.
Saikatiki atum ale kelongji aphan ta ratpangri atum bor-i si Soil Health Card & Crop insurance heihui asai deng pen agricultural production batlo lapen hako pen keklem bom asai aron aber nangsun lo. Kedamtang 2015 aningkan pen Prime Minister’s Irrigation Scheme dengsi sika crore suri 50 ningkan pho apharman deng lo.
Det kikim-kerangji aphan Ok-Karjang (Youth) kapachingthur pu akemang pen kedamtang 125 Swami Vivekananda’ amahang kethek ahut Chicago along kaningje ateng ratpangri atum alam ningje chotchesi new education policy kedeng anparta amethang akeng pen kapacharjap thekji aphan sai deng bom lo. Laso apharman National Skill Development Mission, New National Policies on Skill Development & Entrepreneurship lapen PM Skill Development Scheme aphuthak kaprek-kaprek ariso-okorjan atum aphan deng et lo. MUDRA scheme kedeng asonsi ok-karjang apharman loan kapapiji aphan det arlo kedo 125 lakh a branch pen loan papisi chokamar anghoi kapaklangji aphan klem lo. Laso ahut SC-1, ST-1 lapen 1 Women entrepreneur isi ale klangpo.
Doklam alamki aphuthak ingsamjin pen lamrai kedeng, kedamtang Vosik chiklo India lapen China angbong Doklam alamki klanglo. Lason kedo ke isi kamatha thek aratchari lapen ihin asai pen langdam lote kehai angthek lo.
Doklam akisung ahut Bhutan pen kachingki-chethan asai keklem ke India atum tebok-terai adet pen jirpo kachibiji aphan ning kehang pu angthek kachepaklang lo.
BRICS along India katangkring aphuthak national executive amai along chingvaisi pirthe apum along kaprek-kaprek akisung pen kachedanji aphan Prime Minister Narendra Modi pen 10-point agenda kapaklang dun alamta klang lo.
Lashkar e Taiba, Jaish e Mohammad, Taliban & Haqqani atum tebok-terai adet along kangtangkring pu alam ta mai along klang.
International angdeng along kado kave pen kachepamesen akachelang BJP ratpangri laso ateng sai klemsi Nepal along chikli kahijuk ahut, Maldives lang kadure ahut, Sri Lanka along lang kanglum lapen Myanmar along swine flu kangdang ahut India pen cherap-cheto dun lo.
Rohingya Refugees atum apharman monit hijan kachinghon angthek chepaklangsi Bangladesh along kerap pi dun lo. La-an chot kali Indian amonit atum aphan Yemen, Kerala nurses atum aphan middle east, Father Alex Prem Kumar aphan Afghanistan, Father Tom aphan Yemen pen Kolkata asor Zudit Dsouza aphan Kabul along kenep chek ahut pajok dun lo.
Kachingthur along kenangsot ahormu kapatangji aphan ratpangri pen akimi asai kedengji aphan aban keklem bom asai an kapatang serakji aphan klem lo. Laso ateng Narmada alangroi along kedeng Sardar Sarovar project angdung kiti asai deng lo. India lapen Japan chelangpet “Bullet Train” project, kedeng bom aphuthan national executive atum kurvangthu pajir.
Ratchari aron karkan ke, democracy aphan isi ahoron, pu pen kedamtang chiklo jon krepli angbong bang 14 karyakarta atum aphan apran karmut aphuthak national executive committtee atum pinrem. Democracy a det India along lapuson pherangke atum aphan apran karmut aphuthak national executive atum sodak pen pinrem.
Backward class atum a constitutional right alam aphuthak BJP ratpangri mathasi Sabka Saath-Sabka Vikas akemang pensi sai klem lo. Laso aphuthak Constitutional amendment bill kedengji aphan lok sabha along bor-i lo seta Congress atum Rajya Sabha along OBC aphan kekroi asai kedeng ajok chun un-eh det lo.
National Executive amai along Pt. Deen Dayal Upadhyay ningkan pharo isi amahang aningkan katalon amen pen kapaphihup arat apharman kaprek-kaprek kachingthur a scheme kedeng. Laso ahut, national president Amit Shah pen Deen Dayal Vistarak Yojana kapangcheng Ladakh pen Lakshadweep adang aphan lakh 4 alomso Vistarak kapapale lapen bang suri 4 sose ajir kiding aphan Vistaraks peksi det adang pachetang lo. Lason thakthak BJP ratchari asong angbong kaprek-kaprek asai kedeng alam ta mai along klang lo.
New India – Sankalp Se Siddhi dengsi non kevangji 2022 mate India ningkan 75 kepleng ahut anke akimi India kaselamji aphan Prime Minister Narendra Modi mang lo. Laso along jongsi India along kedo Crore 125 det amonit atum chetong dun pulote madu ta India kimi keman along nang khang dun un-eh lo. Akimi India along son trok a seme do. Laso a seme ke kadure pen kejokvang a India, kangthir et a India, klempar pen kejokvan a India, casteism pen kejokvan a India, khei angbong kachelang selet pen kejokvan a India, kechopanglim pen kejokvan a India, mai along Prime Minister Narendra Modi pen akimi a India aphan amang kaheman apot national executive pen kurvangthu pajir. National Executive pen Prime Minister kedeng rat kachesong “Sankalp se Siddhi” lapen kadure, kechopanglim, ok chumpran, casteism lapen communalism kapavirji pu along chedon dun lo.
Laso along India along kedo Crore 125 monit atum do-an kengkam kachejor rappet aphan BJP atum choningri. Kado kave klem rappet dam rappetsi PM Modi keheman aman ahok kapaplangji aphan klem lonang puta BJP choningri.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives