ADVERTISEMENT

This area is available for advertisement. Please contact for details.

Arnivang
Get Adobe Flash player

25 angdeng ZKYF ruptalin katalon kecheng

UntitledDiphu, Chiti 27: Karbi Cultural Soceity kaparlo Kaprek kaprek KCS Zone atum patirpisi pini pen ingdeng 25 Zonal Karbi Youth Festival ruptalin pangcheng lo.
Singhason Zonal Committee patirpisi ZKYF ruptalin talon dun lo, lason ahut pini arnitili porphai 2 apor terank atum kevang kepangcheng, arnikang porphai 6 apor Horticulture a inspector Bidya Sing Ingti arideng boha ingpu lo,saimek ateng penap Chiti 28 arni adap porphai 7 apor Singhason KCS Zone ameiphu Jiren Teron arideng pensi KCS alama pachepur pensi sai angdeng pangchengpo.  Penap porphai 8apor EM Amarsing Tisso arideng pen “Semson Sing Ingti Arani lapen 25th Singhason Zonal Festival” ingpu po.
Rong aje katalon esek kaprek kaprek asaimek along Joysing Teron, MLA Sum Ronghang, Tokbang MLA barim Dhoromsing Teron, EM Rupsing Teron, MLA barim Hemsing Tisso, MLA barim Bidya Sing Ingleng, EM barim Prodip Singnar, Sarsing Timung, Daniel Teron, KAAC secretary Nirola Phangchopi lapen kaprek kaprek man kedo atum chetong dunji.
Hawraghat Zonal Committee atum alir alon pen rong aje katalon atumi Chiti 26 arni pen pangcheng lo. Hawraghat ZKYF Ruptalin asengkan katalon phurkimo apharchap along pado nang pu tiripi ahin mangsi lokimo paklang lo. Hawraghat Zonal Karbi Youth Festival katalon kecheng arni EM barim Ashok Teron arideng pensi lokimo pangpu lo. Laso ahut EM barim Ashok Teron pen rong aje katalon kachepatirpi atum aphan aning pathe tekang. La-an chot kali lahai alongsi pensi ove kimi atum Karbi akhei ajutang akekan kilun lapen lam temo heihui ta charli dun nangpo pusi jai tekang. Alangli pen KCS asongjapo atum aphan choro, athe, alanglitum kachepaduk ajoksi pini bangso Zonal Karbi Youth Festival pining aningkan ruptalin asengkan talon longlo pusi jai.
Hamren Constituency a MAC Mongal Sing Timung arideng pen ingpusi West Karbi Anglong along kedo Dongkamukam along katalon pangcheng lo.
Pini MAC Mongal Sing Timung ZKYF kangpu ahut kejai ke, ilitum Karbi ajutang ta ingcholim binong, seta ilitum kachirim-chibi dun thekthe ajok ilitum ajutang-jubat ko-an ma kacho nangji ingcho thekthe det lo. KCS pen kachepatirpi pon ajok non ilitum ajutang tame pirthe adang along cheklang dun bom lo. Lasi, ilitum Karbi ajutang pen chenglok lammet-lamchong lapen pindeng sumpot antame ansose si pachethang dun nangji pusi jai tekang. La-an chot kali Zonal Youth Festival ruptalin katalon ingsamjin kapachun thekji aphan arnam athengno hirjume hang pu jaisi ingpu tekang lo.
Borjan KCS patirpisi Hidipi Mirjeng pathu aklam along ingdeng 25 Zonal Karbi Youth Festival pini pen kachepate chenglo. Todap porphai 10 apor Karbi Kungnorpo 1980 abangphu Kt. Ramson Rongphar arani pamansi Hidipi Jirsong Club amaiphu barim Sing Timung (BA) arideng pen pangpusi saimek ateng ritnong chingdi, Keng dong dang kekat kachebai lapen krongchui kebut heihui chepate lo.
Pinpurme, pini rong aje kecheng arni arve kejang kave cheng ajok asapso katora dolo seta keklem kedam kachepaduk ajok kehottang lapen kejong arni apor atengsi ZKYA ruptalin pangcheng rinti lo.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives