ADVERTISEMENT

This area is available for advertisement. Please contact for details.

Arnivang
Get Adobe Flash player

Longle kacheraikomji aphan cheroktoksi donangji

Meghalaya asor ahoi nangkepet, Nagaland asor longle nangkacherai pu helo arnivang abirta along kaporhi lapen karju long. Arnisi bakta Karbi Anglong ahoi lapen alongle nangkepet pen nangkacherai pu abirta karju longle arni ave. Birta aloh pen karju longchot alam kali bonta ahok alam pinak. Naga atum nangpetchot, Meghalaya asor nangpetchot lapen Nagaon district ahin pen Muslim, Bengali lapen Bihari atum nangpetchot amat Karbi Anglong ajam (area) ke non chekom bomlo. Bonta bangso aphan kekhang dunji sorkar lapen KAAC penta thangnat abidi lapen asai dengthekthe. Aphrang-phrang Karbi ajalin atum kamatha kaparsik thekthe, kachechar dam kahelole ajok District Conucil pen amatsi angtan aso atum aphan ladak kapavang longji avarsai pidet. Lake langteng lang ketho asonsi cheplang lo. District Council pen thangnat abidi kedeng ponpedet ajok angtan aso pen keche atum aninghang aling, un-an ladak nanglut longlok lo. Lasi 1965-75 aningkan angbong Karbi Anglong armu aphai kechan phant 78 an nangbat krak lo. Bangso aphant nang karlu krakke Karbi lapen ladak khei barim atum armu le la-an nang kechen varet lapu kali. Bonta angtan pen keche atum nang kilut ke-ong pik apot. Bangso ajok pini arni anke Karbi Anglong arlo Karbi atum aphan keche atumsi aphai nang-ong munak lo. 1950-60 India General Cencus angthek ateng pulote Karbi Anglong Karbi atumsi phai-ong (majority). Phant 15 athak ke Karbi atum pusi haladak angthek paklang lo. Bonta nonke Karbi atum phant 38-40 anbaksi dochot pusi non jonghet Cencus angthek along paklang lo. Ningkan  trokkep angbong Karbi atum armu aphai phant thomkep nangsuntuk lo. Aphrang pen akaprek a-inglong alongri along ason khei barim atum alongle-phelang kerai aron lapen abidi ingtangklong do asonte keche atum aning hang aling nanglut pen longle-phelang cherai longledetsi ladak kedo kachepathirji atum ing-ar detpo. Lason klemthek asonte pini arni Karbi atum methang alongri arlo phant 70-80 athak dokoksi keche atum aphan la-an phere nangnedetji apot lo. Ning kiduk meme alam abangke Sixth Scheduled ajakong kelongtang ningkan troksikep plengdet aphi anta Karbi atumke longle a patta anta kelongle atumsi ke-ong lang bonta non jonghet kevang keche atumke longle a patta do-et. Bangso aphuthak ilitum ajalin atum aphan sorsa lapen akoi piveret puta chokche. Ilitum Karbi rat atumta kechokche thedung. Karbi atum methang amatsi keche atum aphanta longle chejor  lapen pivaret. Mo aphi methang sung detna pu mathadam vangvesi amethang atum arong akung kalite rong arlo, tebok terei alongle keche atum aphan akejoi kalite anam kijum pen pi-et titi. Lason asai rong asar atum amethang atum ale aphan keche atum aphan long kechajor alam kaita arju longver lapen komatne rong lapen havar angkang thekmuchot lapen jalin kachekrong atum ta methang ale aphan bang angtan aso atum aphan longle kachojorpu abirta long dunver. Lahai akam ke khei kachipavirji akamsi keklem lo. Ladak longle-phelang nang kelong joike apotsi angtan aso vang pen nangcherai thip lo. Bangso ajok nonke ratchari ajakongta bang aridengsi dokok lo. Lasi angtan aso aphan longle kejor ingtonte pulote Karbi akhei methang alongri along amatsi adim chelong dunde detpo. Lasi KAAC pen khei barim atum a longle-phelang keraikomji aphan ingtangrak abidi (policy) deng serak nangji. Lapen Karbi atum bangso aphuthak cheroktok pensi donangji. Arongtin arong amekar, rong asar lapen hamphang asong atum aphan angtan pen kevang atum aphan longle kapapi longledetji aphan than pare nangji. Sorkar lapen rat angbong klem rappet lote non kedo-an alongle ilitum cheraikom thekpo anke mo aphi a-ove atum aphanta longle-phelang thik pitekang thekpo.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives