ADVERTISEMENT

This area is available for advertisement. Please contact for details.

Arnivang
Get Adobe Flash player

Jirpo jirpi kachibi ta kenang sot, setame jirpo jirpi cheratsi ongmunakji

Robin Bey, Den Arong
Pirthe along anutin abangphu bangphi akai seta apei along pen amahang nangthekdet aphit pen ningkan isi arta an nangplenglo pulote madu tame, arloso non pinso non jirpo, jirpi chiri vek lapen chibi vek. Athe jirpo, jirpi kachibi kenangsot thetan binong. Madu abangphu bangphi akai setame a oso angko mate kebihek arta ahut kejui, kedam, kepathu, kekan, kelun ning hangpikpik lapen kebihek arta ahut aningkarong, aning ke oi chiputhekthe chenam binong. Labangso arta ahut, jirpo mate jirpi pensi juidamji lapen damji, laso arta ahut jirpo mate jirpi tame do-ohji, bonsitame aning keprek jam mate aning kechichor chedet ajoine, halaso arta ahut pen setame ajirpo mate ajirpi pen kachibohong abaitai ke, do-oh anji. Ilitum chilakha damji pusitame chilakha dam un-eh det asonsi doji. Munit akai along jirpo lapen jirpi kachibi kenangsot thetan binong, riso ahut lapen saru- sarhang apor ahut sitame anut kaprek pen jirpo kachibi dovek, lapen nimsomer setame jirpi kachibi dovek nangkok binong. Aning kachechor mate aning kamatha kacheton thek abangphu bangphi pensi jirpo lapen jirpi tame chibithekchot asonsi neli matha dam mate theklong lo, mate kali ma?
Kemesen abangphu lapen abangphi ke ajirpo mate ajirpi jongsi kesung binong pulo tangte, alangli halaso ahut kesung pumatha dunsi alangli phan, ave det sitame asapso kerap dunji aphan bor-ihji lapen alangli rap dun vekji, alangli jirpo mate jirpi aphan rapdun det aphit pen alangli kerap dun vek abangphu bangphi ke alangli phan jirpo mate jirpi pumatha the detsi alangli phan abirta tame en-eh detji. Jirpo mate jirpi Cherat, pulo tangte alangli phan ke aning apok ta matha dun dedetsi alangli phan ke pangkreve pen rapdun thek the detji lapen thilo ahut sitame alangli phan abangke me-an kepi ahut an sitame alangli kerap dunji kali malom so kachitong dunji aphan antame apor chi-en detji, lapen dunthek thedetsi alangli dunde det chinamji.
Jirpo mate jirpi cherat pulo tangte ajirpo, ajirpi aphan aleh kecho enji aphan loksi kematha pon, kaike tame doji. Lapen ajirpo, jirpi aphan mesen ason si chikrongji, alangli chinghon oh asontame chiparjan ponji bonsitame alangli jirpo, jirpi aphan alecho endor lo. Pulo tangte alangli phan panungkukji lapen alangli phanke abirta anta en-eh detsi aning apok tame alangli phan matha the det khangjang ason doji. Hithi kulat haihui along chitong thulok pulo tangte alangli phan masap so apor chi ensi alangli phan aleh kecho enji aphan matha thuji. Bonsitame hethi kulat along pen chikukdak aphit kemesen abangphu bangphi abangke alangli phan kechingkey thu ingtungduk pen phone setame alangli jirpo mate jirpi aphan ke call ji aphan bonsitame alangli phan malomso kachingkeyji aphan antame apor chi en-eh detsi alangli aphan chingkey detji, alangli phan kerap dunji ke aphit alam lo. Lason henlo jirpo, jirpi chirap pulo tangte mate kali ma ? Bonsitame kemesen abangphu, bangphi pulo tangte a ot adur tame mesen ason si thek longji lapen jirpo mate jirpi angbong chot takali hemsi angbong pentame kaiketa mesen mephun pensi kacherap kachitoh ason theklongji mate hem isi kemesenji aphan alangli ke kaike tame kematha ason doverji.
Rat along lapen mai alongsitame kemesen abangphu pulo tangte rat aphan kaike tame kepa mesenji aphan, rat aphan thanji lapen kemesen alamthe haihui si pachiniji. kemesen abanghu a ot adur ke jirpo, jirpi along setame mesenverji asitin asai keklem along sitame alangli, kai ke tame mesen pen matha si alangli jirpo mate jirpi aphan tame rap pajirji. Jirpo, jirpi cherat abangphu, bangphi pulo tangte alangli tum kaike tame enut aphan ke matha pon thip ason thek longle, kaike tame alanglitum aot adur aleh aphan loklok si matha ponver asonsi aning angthin arlo setame doverji. Lason kematha thek chot abanghu, bangphi ke jirpo mate jirpi cherat pusi hok pon po, alanglitum ke mongve pi asonsi anutin abangphu, bangphi aphan tame matha pon. Lasi puson abangphu abangphi aphan ke mongvepi aloh ban pule hokpon det sitame heno ne lo. Athe jirpo mate jirpi cherat ke mongve kevang alingsi chingbe dunji, lapen aning angthin setame thirtip thedetsi asonsidoji. Bonsitame, lapuan chot kematha ardi ke pirthe along kemesen angthek kali lapen longri aphan kesen angthik kali, lason thak thaksi Karbi Anglong Autonomous Council sitame angkur kethirthip kave det asonsi kai amat tame linglangcho asonsi theklong lo penang an arat abangphu bangphi anke. Lason thak thaksi elitum Karbi Anglong alongri arlo mongve kevang aling ehi jap phit, ehi jap phit ason kedovel ajoine non anta HEMPREK long dun thek thedet binonglo. Bang bang alongri along, Meghalaya, Manipur, Nagaland, Arunachal Pradesh ason aning kachiparong, asai kachingthur ason, lang lapen mei hai hui asitin along setame matha jokplot, bonsitame elitum Karbi Anglong arlo ke non anta asitin along tame katora nang asai saide saida pu alam ke elitum methangsi chimatha meme, ning-oi meme lapen ning duk meme binonglo.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives