ADVERTISEMENT

This area is available for advertisement. Please contact for details.

Arnivang
Get Adobe Flash player

Assamese alam arjan along anong kachethang klong kacheparjan bangphu Abdul Majzid arong chevoi tanglo

CM, Himanta, Ajmal atum ningduk chipi

UntitledGUWAHATI, Chiti 24: Assamese alam arjan along inut anong kachethang dun klong kacheparjan abangphu Abdul Mazjid todap adap porphai 9:30 apor Dispur GNRC Hospital along seh kachelangbom ahut arong chevoi jui lo. Aning akeso kachlong pen bangso apirthe pen sangtet cho-en damjuisi Assam arat atum aphan mekri-meklang ning hongduk bi tekang lo. Alangli arong kachevoi ahut arta ningkan 86 an pleng lo.
Pinpurme, karlitang Abdul Mazjid kedamtang 1931 aningkan Phaikuni achiklo niphai 16 arni Jorhat Purana Alibat pu alongsi amahang kethek. Jorhat goverment high school pen 1950 aningkan matric un dunsi haladak JB College along intermediate charli dun lo setame asarbura arong kachevoijui ajoine hemtun kachelanaji aphan sai jokje kacharli abang ke pangton nangkok lo. Kedamtang 1955 aningkan electricity asaikam along alangli chokamar keklem dun pangchengsi 1990 aningkan alangli asai arpu jut lo. Alangli chokamar keklem bom Untitledapor ahut kedamtang 1958 aningkan kapaklang Ronga Police pu alam arjan along alangli kechengsi mohor chepaklang dun lo. Laso alam arjan aphidet alangli kacheparjan dun alam arjan heihui ke “Tejimola”, “Samele Memsap”, “Upapath”, “Aporupa”, “Buwari”, “Hendur”, “Suraj” “Puja”, “Papori”, “”Ei desh mur desh”, “Anthony mur nam”, “Bhai-Bhai”, “Tathapio Nadi”, “Uttarkal”, “Rickshaw wala”, “Agnigarh”, “Devta”, “Priya oh Priya”, “Tumiye mur Kalpana”, “Jiban Nadi Duti par”, “Priya Milan”, “Junda Iman Gunda”, “Juman-Suman”, lapen Jue Pura Hun pu heihui alam arjan along cheparjan dunsi Assam lam arjan alongklam along penang an nong chethang dun lo. Alangli cheparjan det kali, lam arjan heihui ta semar lo, “Maram Trishna”, “Semeli Memsap”, “Ban hangha”, “Banjui”, “Punakan,” “Uttarkal” lapen “Sat number Sandhan” pu heihui ke alangli kaselam alam arjan lo. 1975 aningkan Sameli Memsap pu alam arjan aphan Assamese alam arjan pen kemenai pu hoksi national anong-eh long dun lang lapen laso alam arjan pensi lunsepo Dr. Bhupen Hazarika Assam alongri aphan nongme van lo. Laso lam arjan along Abdul Mazjid sah akhei Mogulu pu isi cheparjan dunsi kelang arat atum aphan aning pangsam lo. Karlitang Mazjid bihek ako pensi kacheparjan heihui aning kehang ajok 1950 aningkan arta ningkan 18 kepleng ahut arisangho atum pen Krishti Sangha Jorhat pu amen iris isi amei seng lo. 1953 aningkan alanglitum kabor-i ajoine pensi Jorhat along lam kan anatthu amahang pathek lo. Nuipa Baruah kasemar Ronga police alam arjan national film award long dun lo. Abdul Mazjid penang an kithihek alam arjan (Short film) ta ssmar lang. Halahaike Assam Putala nas pen Ajan Phokir, Bahadur gaoburha. Guwahati Durdarshan along alangli kachari Namgharia serial pensi penang an chethang-i lo. Lason thak thaksi alangli penang an serial, lam arjan along kacheparjan pen danglok kaselam along kacherap dun abangphu lo. Alangli arong kachevoi jui alam kangdang pen Assam Chief Minister Sarbananda Sonowal, health minister Dr. Hiamanta Biswa Sarma, AIUDF jabang Moulana Badruddin Ajmal lapen penang an aman kedo abangphu-bangphi atum ningduk chipi.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives