ADVERTISEMENT

This area is available for advertisement. Please contact for details.

Arnivang
Get Adobe Flash player

Raki kirim pen kachepaheloji aphuthak KSA armu kachejeng

MUB along Anti-Drugs & Rule of Students aphuthak cheroktok amai pangni

UntitledHAMREN Chiti 23: Karbi Loh Charli Asong (Karbi Students Association-KSA) Hamren Head Branch patirpisi pini Hamren angkang school loh kacharli osomar atum pen-pen raki ahormu kecho kekhangji aphan akemang pen armu kachejeng.
Todap porphai 10 apor Hamren hithi barim Rongbong Ronghang pathu aklam along Hamren angkang school osomar atum cheto dunsi raki kecho kekhangji aphan Hamren Rongsopi arlo “No Drugs, Stop Drugs” pu hang sarlangsi Untitledpachethang.
Laso aphi Hamren Multi Utility Building school loh kacharli klimsomar atum aphan raki ahormu kecho pen kanahok alam heihui than pachini dun.
Armu kachejeng along Church of God English High School, Hamren Govt. Higher Secondary School, Rongkarbi English ME/High School, Presbyterian Mission School, Divine Spark English Academy, Residential English ME/High School, Jirsong English ME/High School, Hamren Girls High School, PKBA Mission School lapen Don Bosco School pen kado kave bang suri isi sose osomar atum armu cheto dun.
Hamren Multi Utility Building, Conference Hall along Anti-Drugs kecho kekhangji aphan cheroktok amai pangni. KSA, Hamren Head Branch a meiphu Prosanto Ingti kachepahemphu amai along chunbang Balison Bey si mai kepha alamthe kejai lapen alohi kapachini apor en.
Cheroktok amai along lam kethan dunji ahan Donkammukam Community Health Center (CHC) Deputy Superintendent Dr. Clement Teron pen Dr. Mirdalin Teronpi atum chetong dun.
Hamren Town Club ameiphu Paul Ingti pen kechenglok KSA Hamren Regional Committee ameiphu Probin Timung, KSA HRC sankur chunbang Babul Tokbi, KUYA Hamren Sub-Division Committee dihin rimbang Robinson Hanse atum chetong dun.
HTC ameiphu Paul Ingti kejai ke, Karbi Anglong arlo kedo akhei atum drugs kecho pen kechenglok, arnivang ason-ason akaheno nang kele kecho kijun kachekhang dun thekthe pen kevirji angring thetan.
Pini pen akeme ajirpo, akitap akeme chongvai pen Karbi Anglong anong keme kevanji aphan kabor-iji aphan choningri.
“Self Control is the best control” pu Swami Vivekananda kepu asonsi keme kaheno ason do-o pu setame amethang kemesenji aphan emethangsi chere dun nangji, kecho-kijun mate jirpi/po akaheno atum pen chepahelo thek nang po pusi KSA HRC ameiphu Probin Timung jai.
Dr.Clement Teron kejai ke, tobacco, drugs lapen kaheno dak araki kecho pen amethang akanahok along api/po, tebok-terai, rong-rup, hamphang aphan kapavir thedung. Araki kecho atum aphan aprang kemesenji aphan ning kachethe athai ave pusi jai.
KSA, Hamren Head Branch pen non kevangji Ingdeng 25 Zonal Karbi Youth Festival (ZKYF) Sertalin katalon along araki kecho, aronre pen kedo atum aphan pangtheksi sodak pen ingsaiji aphan mai along cheperai.
ZKYF katalon along Karbi apindeng chingthangsi alir-alon kipi dunji aphan ta choningri dunsi ingsamjin pen mai pachekak lo.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives