ADVERTISEMENT

This area is available for advertisement. Please contact for details.

Arnivang
Get Adobe Flash player

CEM kerap atangka Babu Teron arideng pen mek kave Martin Ingti aphan kapajir

Babu Teron amethang jongjung penta sika suri kep bat dun thu

UntitledHAMREN Chiti 23: West Karbi Anglong arlo kedo Meghalaya ahoi kedai Socheng MAC Constituency kaparlo Langhemphi Ondrowel Timung amekar Orivel Ingti pen Seriesbon Hansepi asopo Martin Ingti amek kave det abangphu aphan Karbi Anglong Autonomous Council a CEM Tuliram Ronghang sika 20,000 kerap kipi dun atangka atumi Hamren hithi ban Market Complex along Babu Teron arideng pen pipajir lo.
CEM kerap kipi atangka sika 20,000 along Babu Teron amethang jongjung pen ta sika 10,000 atangka bat dun thusi kado kave sika 30,000 atangka amek kave abangphu Martin Ingti arideng hodai lo.
Martin Ingti aphan Babu Teron tangka kahodai amai along Hamren Town Committee (HTC) chairman barim Humson Kro, MAC barim Chandrasing Ronghang lapen jabang Ronghang atum ta Karbi poho pen Martin Ingti aphan archo dun lo.
Pinpurme, Martin Ingti alangli inut kedukdet ahem alongsi amahang kethek lapen kopai kelangno ningkan hini arta ahut aphu along karpong pu ingthum kelong lok pen kelang dun thekthe det ajok pirthe along amek chechar dun longle det lo.
Hamren Parish Priest atum ingjinsosi Martin aphan Guwhati pondetsi Narangi along kedo amek kave a school Jyoti Niketan along Ingdeng Kg I pen V an loh pacharli lo. Laso aphi Khanapara Mont Ford School along loh charli dun thusi CBSE pensi kep angdeng Hindi Medium pen phan 72 longsi satlang un dun lo.
Kep angdeng un det aphi Delhi Mukherjeenagar Govt. Boys Higher Secondary School alongsi HS angdeng charli dun lo. Seta HS asatlang undet aphi alangli hem kachevang pen puthot Delhi kachedam thuji aphan akisung kedo kok ajoine Karbi Anglong Autonomous Council CEM Tuliram Ronghang along kerap kelongji aphan choningri dam lo. Laso ateng CEM Tuliram Ronghang aning keme pen sika 20,000 kerap pi dun lapen laso along Babu Teron sika 10,000 bat dun thusi kado kave sika 30,000 atangka pen Martin Ingti pini Delhi kachepaleji aphan bar po.
Alangli “Brail” pu amek kave atum kacharli ason mesen pen kacharli thek apotsi kanghon-kangjinso long bom pen kangtui angdeng charli dun longbom lo pusi chethan. Martin Ingti, alangli loh kacharli kethek asonsi, Casio- Keyboard, Tabla, Electric Drumset kethip ketheng ta thek. Laso ajoine Delhi arongsopi along rat athengno ta penang adim peklang dun longlo puta chethan.
Martin Ingti akai alamo kachethan lapen kevangji arni alangli keklemji aphan akemang alam kachethan ahut mai along kachetong dun arat atum kangjinso amekri buprup asonsi dolo.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives