ADVERTISEMENT

This area is available for advertisement. Please contact for details.

Arnivang
Get Adobe Flash player

Ni kep cheng buruk kithip pen kumdengdong kerot aseke kapajut

UntitledDiphu, Chiti 22: Kedamtang Chiti 12 arni pen kecheng ni kep apharman ‘Karbi Traditional Musical Instruments cheng buruk kithip lapen kumdengdong kerot aseke pini Diphu Lorulangso Rangsina Sarpo Cultural Hall along kapajut amai pangni.
KAAC EM Rupsing Teron kachepahemphu amai along Cultural Affairs Deputy Director Hemari Tokbi mai kepha alamthe jai. Mai along KAAC EM Ratan Teron alohi Untitledsarpo aman pen chetong dun. Pha pangjang alohi aman pen EM barim Bidyasing Rongpi, KAAC Joint Secretary Dhaneswar Ingti, KCS ameiphu Chandra Sing Kro lapen Hemphu Mukrang Adorbar ameiphu Lunse Timung atum chetong dun. TCRO Rani Terangpi, Rasingja Asong ameiphi Kasang Beypi lapen ward commissioner barim Semson Terang atum ta mai along chetong dun.
Mai chengche aprang cheng buruk pen kumdengdong aseke ke-en dun abangphu-phi atum ni-kep seke-en ahut kacharli dun ason chepaklang rinti.
Karbi ajutang-jubat kevir rang-rang apor ahut Cultural Affairs asaikam matha parsik damsi non kithurmi a-ove atum aphan methang ajutang kachepangbobe detji aphan pura ason-ason jutang ahormu kithip-ketheng heihui aseke pi lo. Lasonsi Karbi ajutang-jubat chepangchoji aphan pura ni-kep, ni-krepho vet aseke kipi ke plenglim kalilang. Lasi KAAC kachari atum ardi pisi ni kep adim ningkan isi anbak seke-pi pi nangji, anparta Karbi animsopi atum malomso apor ahutsi methang apindeng chingthang chot. Seta ke-ongdung arni ke peh akang-arsi chingthang rong titisi thek long. Lahai asai along Karbi Anglong arlo kedo kaprek-kaprek so-arlo asong atum kelang pangching dun akanangsot. Anparta methang alamsi kechengsi ardi pinangji seta non ke English, Hindi, Assameses alamsi paprang rong. Karbi alam ke ingdeng 4 alongsi dokoklo. Bodo akhei atum amethang adim along methang alamsi ardi chipi pusi HMA ameiphu Lunse Timung jai.
Inglong aso akhei angbong Karbi akhei henlo amethang ajutang-jubat nim-rokom kangcho nai, seta akhei atum kilu-kelom det mate kheiso pu ajoine bang akhei ason paprang dun thekthe det. ST akhei pu ajoinesi pini Karbi akhei atum lapu an angdeng nangle lo. Lasi methang ajutang ahormu kirim kibi lapen kithurmi a-ove atum ardi kipi nangji apor lo. Karbi akhei atum kevirji anatsi dambom lo. Anparta hamphang a song angbong kachethak, kachesorsar ke ilitum akhei aphan kemesen angthek kali pusi KCS ameiphu Chandra Sing Kro jai.
Cultural pen dhorom angbong kacherap pavedet nangji, isi akhei angthek pulote pindeng-sumpot ta isi vet nangji. Athe jutang pulote lake riso-ejang atum aphan ning arong-aje aphan pusi KAAC joint secretary Dhaneswar Ingti jai.
Methang ajutang-jubat nim-rokom heihui charli dun pulote methang aphan ta ale do po lapen Karbi akhei aphan ta ale dopo. Lasi Karbi ajutang along kartang pu alamthe pavir nang po. Kemesenji aphanle ilitum bor-i lonang, sonsi kacharhe along so-arlo vek nangji pukali, sopinso atum ta kacharhe charli dun me. Athe lake kithitang atum aphan isi tovar kethan dun chot. Son thakthaksi jambili athon alun ta lun nangji seta kacharhe pen kali pusi EM barim Bidyasing Rongpi jai.
Karbi ajutang-jubat along kethek lapen kachini nangji ason dopik lang. Lasi lahei aphuthak along ilitum research nangji do-oh lang. Anparta lahai kithip-ketheng ase angtong along pusetame technical do nanglang. Seta non akai along arta kijumhek apor ahut piso-some ke-en asaisi chebai rong lapen hor kijun, kaselet abangsi Karbi akhei atum along dokok. Jongsi lahai asai pen chepajok dun thekthe pulote kevangji ove kimi akai kopi atovar lone kedamji pusi EM Raton Teron jai.
Pratap Ingleng, Dhansing Teron lapen Bidyasing Teron atumsi seke pi lo. Kado kave bang 40 sose ariso-ejang seke ke-en dun atum aphan seke-kepi anong-e alohi atum arideng pen pajir. Best discipline anong-e Rengsika Katharpi aphansi pajir lo.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives