ADVERTISEMENT

This area is available for advertisement. Please contact for details.

Arnivang
Get Adobe Flash player

Inghoi 5 akejoi do po, inghoi troksi chedan jokplot po, inghoi isi aphan chedan po

DGCSUS kilik along President anghoita pachedan nangji: ABVP

DGC Kilik

Diphu, Chiti 20: Aningkan vang ason 2017-18 aningkan apharman DGCSUS kilik kachedanji aphan Chiti 22 si arni hotlo. Lyngdoh Commission ateng klemsi pini nomination aloh kejok patang etlo. Lyngdoh Commission ateng Class attendance phant 75 dovek nangji, ki-un eh lang a subject (Arrear paper) kedo atum kilik arjap dun longle lapen arta ke-ong atum kilik chedan dun longle pu heihui ajok nomination aloh kejok dun jumhek lo.
Laso ajoine DGCSUS along kedo inghoi 13 angbong pen inghoi pho aphan ke nomination aloh jok abang ave det lo. Nomination aloh kejok abang kave det anghoi ke, vice president, athletic secretary, gymnasium secretary, boys’ rommon room secretary lapen social service secretary. Nomination kejok abang kave det ajoine lahai anghoi ke inghoi kejoi dokok po.
Kedolang nerkep anghoi angbong pen troksi anghoi along ke inut-nut nomination aloh jok chot lo. Laso ajoine general secretary, assistant general secretary, music & cultural secretary, major games secretary, minor games secretary, debating & symposia secretary lapen girls’ commom room secretary anghoi along ke chedan jokplot pensi hai et po.
Lasi non kedolang editor of college magazine & library anghoi aphan Anjana Beypi pen Fundar Teron atum angbongsi kevangji Chiti 22 arni kilik chedan chot po pusi birta long dun. Inghoi nerkep angbong pen troksi anghoi ke chedan jokplot (Uncontest) pen hailap lo. Non kachedan nangji ke editor of college megazine and literary secretary along chot po.
Lasi pining election ke editor of college megazine and literary secretary along Fundar Teron pen Anjana Beypi angbongsi chedan chot po lapen la isi anghoi ajoinesi kilik ta dochot po.
Pinpurme, kedamtang Chiti 18 arni Akhil Bharatiya Vidhyarthi Parishad (ABVP) Karbi Anglong Aro atum DGC a principal Nirab Kr. Sharma aphan chetong damsi DGCSUS kilik along president anghoi aphan kilik pado nangji pusi hang dam.
Lyngdo Committee ateng ke student body along thanbang atum inutnat ta do dun longle. Seta DGC atum kedamtang non anta kopi apotsi president anghoi aphan kilik pachedande det lo pusi ABVP atum DGC aphan arju. Lasi non kevangji Chiti a chiklo niphai 22 arni kapadoji kilik along president anghoi aphan ta kilik pachedan nangji pusi hang dam.
DGC kahurmi dam ABVP Karbi Anglong adilung along convenor atum Jiten Bey, ABVP West Karbi Anglong a convenor Waisong Tokbi lapen klembang Sachin Rongpi pen Robinson Kro atumsi Principal Nirab Kr. Sharma aphan kachetong dam lo.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives