ADVERTISEMENT

This area is available for advertisement. Please contact for details.

Arnivang
Get Adobe Flash player

KAAC along Engineer atum nang cherap dunvek nangji: CEM

KEGEF atum Engineers Day katalon

UntitledDiphu, Chiti 15: Karbi Employed Graduate Engineer’s Forum atum patirpisi pini Diphu Joysing Doloi Terang Auditorium hall along Engineers Day katalon.
Doctor atum rat aphan aning kehang ateng rap un seta netum Engineer’s atum ke ning kehang ateng rat aphan rap un-eh. Ajahak adim along kerapji ning kehang do seta Administrative Approval ave pulote rap thakthe. Athe AA ave pulote Sika 50 pen abat tangka kapadam dokok pulote netum aphan tangka kapanok pu aron ateng pen bail kelongle a lamhoi pen jail ta nangthap un pusi mai along PWD Engineer Jowel Timung jai.
UntitledKaprek kaprek asaikam along kedo Engineer atum angbong kachingki chethanji lapen bidi sore kachepachoiji aphan pusi Karbi Employed Graduate Engineers’ Forum cheseng lo. Laso atengsi kado kave Engineer atum an ahut pen ahut mai ingnisi lam heihui chepachoi bom lo puta Jowel Timung jai.
Jowel Timung KEGEF aphuthak thandet aphi Rongplimplam along kedo a club atum pen mai along nimso kirung jutang akekan paklang.  Laso aphi Dr. Medalson Ronghang pen kosonsi kijun alang kapangthir lapen pherememe a chemical heihui pen kapajok thekjima phuthak katarlip ahut kelong ateng mai along than. Laso ahut Nitrate kedo alang akethe atum kijun thangthe det tahai seta osomarso atum aphan kapajun ke pherememe lapen keso cholongvekji puta Dr. Ronghang than.
Karbi Anglong Autonomous Council Chief Executive Member Tuliram Ronghang pen KEGEF atum aphan kachoro pajir lapen Dr. Medalson Ronghang aphan lapuson Karbi Anglong arat aphan akenangsot alam mai along klardak pen kethan apotta choro.
Mahamaya lapen Korkanthi Constituency angkang chloride dopik lasi lapuson kachethan kachimum ke kenangsot lo puta CEM Tuliram Ronghang jai.
Karbi Anglong arlo netum sai keklem ajutang kapathirji lapen monsam kapado pen Karbi Anglong angkang kapachingthurji aphansi bor-i bom lo, lasi engineer atumta nang kacheto dun kenangsot. Angkang pen kapachingthurji aphan kado kave ning isipet dosi klem nangpo puta alangli jai.
Alangli kejai thuke, Karbi Anglong arlo engineer dopik lo, ‘KUEA atum alongta bang 100 sose engineer do. Alanglitum aphan voreng avarsai KAAC pen kipiji ninghang seta pithekthe det lo athe KAAC atum APSC asatlang ke-en longle, lahai atum aphan kepekji anghoi anke APSC satlang ateng pensi pi-un chot’.
KAAC kaparlo asaikam PHE, Irrigation, flood control pen chenglok kaprek kaprek asaikam along ongdung ke Karbi engineer atum aphansi pek lo. Seta ajahak kamatha thekthe arat atum methang a engineer atum aphan kachinghonji kali, RTI amen pen tangka kehang asai klemsi chenek lo. Ajahak class x pass pe abangphu atum Engineer atum keklem asai along khamkhe dunsi chokche pu jong dun lo. Lapuson asai kamatha thekthe atumsi jasemetpet keklem, kethekser lapen komatne engineer atum lapuson klemkle puta CEM Tuliram Ronghang mai along jai.
Kado kave ta kachingthur aphan ke kar-i lapen hemprek aphanta ar-i, lasi ning isipet dosi hemprek aphanta chesong bom lonang. Hemprek apharman ke dojoi nangne lapen kerem chekrong nangne longle tik chesong bom nangji. Seta kedamtang 1986 kachesong asong khei angbong chesorsar nangne lapen che boycott nangne lo, kado kave chelangpetsi chesong nangpo. Non kedo bom a chairman ta dihu isi hemprek apharman risim kangtang pen chesongsi, ratchari akechun ke hele amu pen chotji pusi kaningje atum lo seta alangli kachesongta chunchesi hemprek longle det lo. Alangli MoS kachetok pen Karbi Anglong aphan thedung kachelar vangpo puta CEM Tuliram Ronghang mai along jai.
Pini Engineers Day katalon asaimek lunsepo Prasanjit Phangcho kejalin Engineer adilung atum Chandra Kanta Terang kasonse ‘ri pajap pajap’ pu alun kilun pensi mai pangchenglo.
Mai jutdet aphi Diphu angkang kedo Diphu Govt. Boys Higher secondary school, Diphu Govt. Girls Higher secondary school, DAV Higher Secondary school, Binapani High school, Chandra Sing High school, Sister Nivedita Govt. High school, Klirdap High school, Raton Kro High school lapen Sonai Rongchehon High school school atum angbong quiz pachepate lo.
Mai along KAAC chairman Horen Sing Bey, EM Amar Tisso, MAC Longki Timung, MAC Mongal Sing Timung, MAC Richard Tokbi, Lunsing Teron, MAC Prabhat Chandra Taro lapen kaprek kaprek atum chetong dun.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives