ADVERTISEMENT

This area is available for advertisement. Please contact for details.

Arnivang
Get Adobe Flash player

Ex-UPDS Welfare Society chunbang Ananda Terang arong chevoi et lo

UntitledDIPHU, Chiti13: Ex-UPDS Welfare society a chunbang UPDS Ananda Terang penang an keso pangji det aphi Chephongsajir amethang ahem along the-ang prinprele porphai 3 apor arong chevoi jui lo.
Kedamtang penang ajirkiding pen Terang asanghao diabetic akeso cholongsi kaprek kaprek a hospital along seh chelang bom lo, todap apor anke kado kave aphan che-oh tekangsi chom rongme chevoi jui lo. Alangli arong kachevui ahut arta 56 pleng lo.
Kedamtang 2011 aningkan MoS alamdon kachetok ahut UPDS ahin pen alangli tai nut ridak kachipi dunvek abangphu lo.
Pinpurme, kedamtang 1961 aningkan Golaghat District Koronga (Phulbari) along Kt. Bordoloi Terang lapen Kachep Rongpipi atum ahemtun alongsi karlitang Ananda Terang amahang thek lo.
Kedamtang 1976 aning pen alangli Diphu, Union Christian English School alongsi loh Untitledcharli dun lo. Alangli Assam riffle along kedo bom ahut alangli inut kemesen boxer laso ajoine alangli Assam along pen National Coach anta man lo.
Laso aphi 1986 aningkan Karbi Anglong arlo Autonomous State Demand Committee atum pen Autonomous State kachesong bom ahut 1994 aningkan pen risim kangtang pen kachesongji aphan klempar asong hini Karbi People’s Front (KPF) lapen Karbi National Volunteers (KNV) amahang pathek lo. Seta 1999 aningkan hini klempar asong chingrumsi kangtangkring klempar asong UPDS amahang pathek lo.
UPDS asong along kt. Terang sangho kecheng Defense Secretary arpu deng dun lo, la-an chot kali Jt. Secretary, Chief-in-Commander lapen Home Secretary heihui arpu ta UPDS asong along alangli deng dun lo.
Laso aphi UPDS atum ari chirungsi government pen MoS alamdon chetok lo, laso alongta alangli inut ridak kachipi dun abangphu man lo. Ex-UPDS Welfare Society alongta Kt. Terang sangho sankur chunbang arpu deng lo. Laso arpu kedo bom ahutsi alangli chom chevoi lo.
Pini alangli arong kachevoi pu abirta longsi KAAC Chairman lapen UPDS chunbang barim Horensing Bey ahem along an damsi kapadusi chepadi dam lo. Alangli arong kachevoi jui ke, hamphang aphan akanahok thetan khangjang lo. Lasi alangli kaheman tekang keplengple lang amang kapachunji aphan MoS alamdon pachun nangpo pusi KAAC chairman Horen Sing Bey ningje.
Kt. Ananda Terang aphan City Baptist Church athiri alongsi penap pip dampo puta ahem asor atum than.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives