ADVERTISEMENT

This area is available for advertisement. Please contact for details.

Arnivang
Get Adobe Flash player

Kachepate amo along Karbi a-osomar atum kapaphi dun

Non akaike kachepate akai (competitive age) pusi kipu. Hajat asonta joike pen longle. Keklem kachepaduk lapen kachepate pensi hajat asonta kelong. Loh kacharli amo, beha-bepar amo lapen chokamar kelongji aphan hajat asonta chepate dunvek nangkok lapen kachepate along undunvek nangji. Pini arni hajat ason tame kachepate along kapaphrang un akhei atumsi chingthur unchot. Kachepate along ki-un dunde mate kapaphi dun akhei atum bang atum aphiphisi donangkok. Karbi ariso-nimso atum det adang (national level) ason-ason kachepate along ki-un dunde lapen kapaphi dun aphuthaksi Thekar kaporhi akorte-ingjr atum pen kachethan ji ninghang. Loh kethek a Karbi ariso-nimso atum jatsimetke chokamar (Jobs) kachori ahut kachepate along paphi dun-o lang. Bangso ajoine loh kethek ariso-nimso atum chokamar kave atum aphai nangbat bom lo. Loh kethek atum aphai nangbatbom seta chokamar avarsaike nang-ing-ar bom. Kedamtang anke KAAC along kedo asaikam along nangkeklang an achokamar anghoi aphansi choton dingchot. Bonta KAAC asaikam along anta chokamar anghoi pipleng etlo. Mentune kesar pen kesang kalite kithi ajok isi-hini anghoi nangklangchot. Karbi Anglong isi a state pu kalidet ajok chokamar anghoi kaselamji aphan jakong avedet. Puthot, KAAC kachari ajalin atumta KAAC ajakong pen chokamar anghoi kaselamji aphan ta kabor-i dam thek longle. Puthot, kedo-an anghoi ta methang amonit aphan kachipiji aphan keklem pon puta theklong le. Karbi ariso-nimso atum lasonsi kisung pho nangkok lo. Sorkar along chokamar ave puta ilitum alongri thedungdung a kor (Industries) puta avedet ajok nonke loh kethek atum chokamar kelongji adim amatsi avedet asonlo. Lasi loh kethek ariso-nimso atum aphrang-phrang ason KAAC aphan chotonding dedet ra longri angtan damsi chokamar chori dun thek nangpo. Thekser lapen cheroktok atum aphanke chokamar kadure ave pusi bang atum ningjehur. Alamta ahoklo. Kethekser atum India arlo chot kali akaprek adet damsi chokamar kachoklemdam atum a million-million do. Bangso along Karbi atum avedet pule pudam seta hengnone. Ahok pet alam abangke loh theklo puseta thek pameme lote longri angtan chokamar apharman kachepathe dunji aphan akisung dokok lo. Lasi kacharli pamesi  matric pen chenglok kangtui angdeng anta satlang angthek chepamesen nangji ansi chepathe along dun unji. Longri lapen det (state and national level) along Karbi ariso-nimso atum kachepathe dun un atum non amat ing-ar pik lang. Lake kacharli ahut satlang angthek kachepame dun un-e apot lo. Satlang angthek kememe ajok kachepathe dunji aphan kamatha ta haihedet atum dopik. Klemkle ako pen un-e pu kamatha apotsi keklem dun haihe. Lason kamatha parlin (negative attitude) avedet nangji. Klemte un, bor-i te un pu kamatha aning dolote hajat asonta klem un. Nonke Karbi ariso-nimso atumta kamatha parlin mate nengkibi (negative attitude) chevar nangpo lapen klem bor-i lote un lapen klem un pu aning (positive attitude) do nangpo. An lote kacharli alongta satlang angthek keme chepalongdun unpo anke longri lapen det adang alongle kachepate dun un chotji kali bonta det angtan anta chokamar kachoklem dunji kachepate dunji aphan phere lapen therak re lo. Non penang aningkan aphrang anta Assam alongri pen det adang chokamar aphan kachepate dun along kapaphi dun alam chethansei lo. Bonta non ke det along kachepate ki-un dun atum aningkan vang nangbat asonsi thek long lo. Lake aphrang ason ningkibi chevar pen klemte un pu aning kamatha ajok lo. Karbi ariso-nmso atum Matric asatlang pen chenglok ajat-jat asatlang angthek along angthek kemesen kelong dun un atum ing-ar detlang. Laso ajoksi loh thek lo puseta kachepate along paphi dun nangkok lo. Ilitum angbongta amethang atum keklem kabor-i pen satlang tin angthek kachepame dun thek atum ke chokamar kelongle pu atum ave. Kacharli kachepaduk pen aparke kaprek atovar avelo.

Leave a Reply

Your email address will not be published. Required fields are marked *

September 2017
M T W T F S S
« Aug    
 123
45678910
11121314151617
18192021222324
252627282930  
Archives