ADVERTISEMENT

This area is available for advertisement. Please contact for details.

Arnivang
Get Adobe Flash player

Jakong kachechinine, lapen kar-i ajok rat aphan karnu

Jabang pu a ot amethang along kave (Leader by birth) pen kachekrong ajoksi jabang pu kachepu mate kacheselam bor-i lapen amethang aphan kachemathalok ajok Karbi Anglong ajabang atum pen rat sung ipik lo. Athe Karbi Anglong ajabang atum ke phant 90 atum ke amethang aning kehang (Self interest) lapen ratpangri ajakong lapen ale aphan keklem chot ajok ahokpet longri kachingthur amo ke klem un eh det lo. Kaike amat kapanglim, amethang aphan kachepajokji pu pen bang aphan kekoi, amethang ke chokpik thekpik pu kachematha ajok rat kisung apor ahut kachingrai mate kachepongrai dun amo keklem ajok pini lahai ajabang ajok rat sung nang lo. Lahai ajabang atumsi Council ajakong anta pachirui lap lo, lake kethekthe apotsi achar kachechar damde pen kamatha thekthe apot lo. Amethang ale aphan kachematha chot-chot lo. Lake dak ilitum along ahokpet kangthir-et lapen kache-o pu ajabang kave apot lo, non ilitum along kedo ajabang atum ke arleng kethe cheman lote ahem asor lapen adon-arap aphansi kachelangchot, tangka kapathe, akhi kachepangcho aphansi chematha chot. Lasi lahai rat aphan kelang lapen kanghon puke dengrong chot alam binong lo. Latum ahokpet pu asonte ha Delhi pen scheme kachevan pen kangthur amo kedeng heihuisi klem po lapen lapu totlun amat bang chokamar anghoi pen tangka cho en dunsi kelongji vek aphan palonglesi tangka kipi atum aphansi pipo kalite ahem asor lapen adon-arap aphan chipi po. Tangte lapu anvet ke kopi ajabang lo? Lapu a phant (Percentage) cho en dun chot, contract pen supply anta amethang che en po kalite amethang amonit paklem po, lasonsi hala government pen nang kele konatne aphan kapanong a scheme ta aning kehang anat pon det titi chot ke majok ta thek lo. Seta hala kemang kimi (New Policy) lapen ha Delhi pen amatsi akeme lapen rat aphan ale kedo a scheme kachevan ke klem thekthesi kedotang asai anta klemklesi lapu amat a bill amokha en po, anke laso atangka pensi inghoi lapen jakong nam idam po. Lahai rat aphan aning aklong pen kachinghon penle ratchari along kisun kalidet ajok amethang aphan kachematha vong pen Council ajakong pi do, aron kopi pu heihui anta chininesi angsong high command aning kapangsam lapen amethang amat ta jakong ke-ot longverji aphan pu ajok kedotang Council ajakong hodai dambom po, anke hapadu moke non ke power ave pu po, seta komat lo adai kedo ke? Lahai kaike amat kenam-kejor lok apotsi manghu-mangha kilu ajat abidi ta ave lapen lam anta ningje dun thek abang ave. Lake kethekthe apot lo. Lasi lahai atum kamanghu ha bang amek kelangno tangho pu kakhinde pen kevartang tangka kapathe, jakong kachepathe pen akhi kapangcho heihui amek kethe a sadhu aphansi ardom dam pen amethang adhorom, aman-apeng chepangbo pen halahai akeng aber chibi dam lo. Lahai kachomatha ajok rat aphan lahai atovar keja pen pasung pon lo, patherak lo. Lasi rat pen amat aphi kivit dunkri abang ington ra thurpakpe bom langsi alam ningje chot pulote lake lahai atum aphan ardom dun pame amat akengpak aber do dunrong memu lo.

Leave a Reply

Your email address will not be published. Required fields are marked *

September 2017
M T W T F S S
« Aug    
 123
45678910
11121314151617
18192021222324
252627282930  
Archives