ADVERTISEMENT

This area is available for advertisement. Please contact for details.

Arnivang
Get Adobe Flash player

Bonglongvai ansi pirthe tinkok

Karbi angbong kacharli atum aphai ke nangkam tanglo seta aphai le nangkam setame kacharli atum jongsi kethek ave pulote avesi chethek longji. Non malon ke India detpi adang det kali pirthe amonit atum pensi chebai nangji.
    Punjab asor mate Punjabi atum aphan alanglitum akuru Guru Nanak kai alamlo le chethan sinang – Guru Nanak kai ason si arong-arong dam pen monit atum aphan khei lapen khei angbong kangtui-kangdai ave pu alam kethan kapachethang dam ahut alangli long banghini kacharli dun atum dun lo.
    Erong along kele pen rong asor atum kangton-kangthi lapen methan kapati dun. Guru Nanak pen alangli long kacharli dun atum laso arong pen apran chepajoksi kekat ha ingnam ajo si sang dam lo. Ingnam ajo kesang ahut Guru Nanak mek jangje aprang Arnam kardom ahut ningje lo “Laso arong dak amat pado ra peplang-paphi nang” pu. Lason Arnam kardom thekdun longsi kacharli dun atum manghu ding seta akuru pu amat thang ta pupe detlo.
    Puthot adap alanglitum erong phothu lilo. Laso arong asor atum kethek long pen konat amonit loma lapen kevang nang ajok lak pik lobo pu karju hei-hui pen ardom-kardi si arne lo. Alanglitum aphan chinglu-chinthi avarsai pilo lapen ru-thai si kecho ahormu ta pilo. Laso arni aningve ke rong si sang lo. Puthot adap Guru Nanak pen alangli long kacharli dun atum dambom dambom pen isi angnam alongsi sang nanglo lapen ajo sangse aprang Guru Nanak abang Arnam kardom ahut laso arong asor pirthe pachetakjam si arong pave det nang pulo. La-an ke kacharlidun atum chekhang un-e si arju lo “Aprang arong ke ilitum aphan nangkarphlung, seta nangli hirjumesi pi tekang. Non nangkiru-nangkethai atum aphan le nangli kopi apotsi hirjuno pi tekang rong lo?”. Akuru abang thak dun lo “Aprang arong asor le pirthe chetakjam lo pulote pirthe amonit atum katora dokok po, athe ke latum a-ot, adur kemesen kali. Aphithu arong asor ke a-ot-adur mesen lasi latum le pirthe chetak jam lo pulote pirthe amonit atum aphan lam keme loksi than po” pusi thak dun lo.
    Ilitum Karbi angbong laso alam pen ale penang doji. Athe ilitum kai amat ta dak amat si kedoverji aphansi kamatha. Kethek-kere pen pirthe kachetakjamji pu alam mathathe.
Lasi kacharli atum aphan api-apo jongsi lason alam thanthe pulote charlita charli nak. Charli det pen hemsi nangchele lipo anke English asarlamthe asonsi langtuk achongho ke langtuk arlo pen sining kethek long bonglongvai ansi pirthe chot tinkok pu asonsi ilitum ke mandet.
    Ilitum ta pirthe chetakjamsi bang pen kachepachini kenangsot. Kalite Guru Nanak kipu arong asonsi dak amat mahangthek po lapen dak amatsi thi po. Lason ke marat-mareng akai an chot si mandet po.    
    Ilitum angbong non malon chethek long bom lo. Sai isi kedengji aphan song seng det ta, isi vet asai aphan lethot puthot song sengthu lipo. La hei keklem ke ilitum angbong kaprek adim kedam thekthe lapen bang akengtong kelang ver ajok lo. Jongsi bang akengtong langle ra amena asai che-ot lok pulote do-an ta chingthur rep po lapen hong do dam pen ilitum aning ta kethe chethek long po.

Leave a Reply

Your email address will not be published. Required fields are marked *

September 2017
M T W T F S S
« Aug    
 123
45678910
11121314151617
18192021222324
252627282930  
Archives