ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi Anglong Rubber katiki kachihung

Rubber ke son-ni do, natural rubber pen synthetic rubber. Natural Rubber puke thengpi aphik pen kelong a rubber aphansi kipu lapen synthetic rubber puke petroleum pen kaselam a rubber aphansi kipu. Rubber a scientific amen ke Hevea brasiliensis lapen ke lapu dengrong ke-ir ke natural rubber pu lapen India rubber puta pu lapen caoutchouc puta pudet. Rubber pu ahormu ke South America alongsi kachini cheng (Keklang-discover). Pirthe adang along rubber ke South East Asia adangsi kelong ke-ong. Charles Marie de La Condamine hen lo rubber a sample Académie Royale des Sciences, France aphan 1736 aningkan kapaklang cheng abangphu lo. Asia along henlo natural rubber katiki lapen kelong ke-ongnai adim lo. Pangrumpet pirthe along kapaklang (Production) angbong pen phant 94% an long. Laso angbong pen det kethom rubber kelong ke-ong ke Thailand, Indonesia lapen Malaysia, la det thom pen amatsi pirthe adang keklang a rubber angbong pen phant 72% a natural rubber pi lo (Production) seta natural rubber keklangcheng adim South America along ke leaf blight lapen kaprek-kaprek rubber arong kapanahok akeso lapen api kedo-o ajok tiki nodak lo. India, arlo beha (commercial ) aphan natural rubber katiki asat kelang ke British atumsi 1873 aningkan Calcutta Botanical Gardens alongsi kecheng lapen beha aphan keklem pame ke 1902 aningkan Kerala arlo Thattekadu pu adim along hen lo. Non anta lasi India angkang pen rubber kelong ke-ongnai ke Kerala henlo. Laso aphi ke Tripura hen lo. Non kevangji ningkan 4-5 aphi ke Assam kilitji aphan angring klang lo athe Rubber Board a Chairman Sheela Thomas, IAS kapangdak ateng ke Tripura arlo 76,637 hect. adang rubber tikiji lapen Assam arlo ke 2 lac hect. tikiji pulo. Assam angbong pen Karbi Anglong arlo amatsi 1 lac hect. sose katiji aphan kacherap dunji aphan chisik ding lo athe North East angkang pen Karbi Anglong hen lo adang kethe katiki me Rubber Board penta pangthek lo. Non lapu an lo seta Karbi Anglong along non anta kithirkluk Rubber Board asaihem bibe lang. Lasi rubber kachitiki arat kejoike-kejoivan mate kenangsot bidi-sore pen danglok ason-ason akerap kelongjoikeji aphan rubber katiki arat do an chepeng pen Rubber Zonal lepupe seta Regional saihem anke bi un nangji athe Diphu along aprang ta Regional saihem bilo, bonta isi-hini kasiksak ajok bangso asaihem chepondet lo.
    Non Karbi Anglong angkang rubber katiki lapu an lo kachihung 2012 aningkan an ke 10,000 hect. lapen bang 4,000 sose atum tiki et lo lapen ajahak atum ke aphik ta ensi a rubber chojor longbom lo. Seta non ladak langdam pame pulote non la aphik ke en bom atum pen lam kelong ateng ke national average along hect. isi along aphik kelong ningkan isi (aphik ke en ke chiklo jon 10) along ke 1841 kg/hect. along ke chetondunde. Tripura along ante 1141 kg/hect anvet. Karbi Anglong along ke Tripura anta ledunde. Lasi rubber katiki atum kelang nangji ke achili hen lo akethenai lo (Most important). Achili jongsi meme pulote aphik longle. Laso aphi ke aphik kevak abang ta mesen nangji, kali pulote aphik nahok et po. Lasi non akethenai alam abangke Tripura along a rubber ke aphik longle, dak Karbi Anglong atum ke Tripura achili ke ensi ke-ong. Lasi achili abangke mesen mate Rubber Board pensi en nangji kalite latum kejong adim pensi en nangji athe latum kejong adim ke latum ke langpame adimsi nangjong piji.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives