ADVERTISEMENT

This area is available for advertisement. Please contact for details.

Arnivang
Get Adobe Flash player

Loh kethek ke khei apharman kachesong adai lo

––– Thomas Phangcho

Khei aphan ahok atovar japonji lapen khei angphun rapji pulote isi kejoi ke atovar ke kethek-kere kachepangcho asai henlo kemenei. Pirthe along majok abangphu mate akhei atum tame ekelangrem un-e, ili Karbi akhei ansose khei kapachan pen pachingthur nangji pulote non ove kimi riso-ejang atum charli ahin kachepathek nangji akenangsot. Non akai mate lapuson apor alongke kethek kedo henlo emena a risimlo, mate bida kedo henlo hele kaman a risim ason. Athema kethek-kere do pulote akaprek akhei atum nang kaphere do.Lasi thek nangji, re nangji. Ante koson asai kedengsi keme? Lapu apei-apo atum kacharli toi dunlo pura toi dun chot, langdun krang, puke chokche lo. Jongdam sinang- isi a noksa (example) komatne ahem-arit kachoklong apei-apo atum osomar aphan Guwahati kalite Shillong College padunlo, lapuson avarsai keme akehelo lapen kacharli kemesen kedenglong atum ke akopai kemelo. Bonta ilitum Karbi angbong penang ajirpi-jirpo atum ke lapu kali. Hadak dun pen asonse-asonse kam kaheno mate kaporhi abang ardi pipe detsi kijui aphan ardi pi munak lapuson do-o. Lapulote ili Karbi akhei ke non a-ove barim arni si Karbi Anglong pu chehang-che-ir long chot po. Mo ilitum ove kimi arni ke Karbi Anglong amen ke kopitong kachelar pone? Anparata non ateng pulote kachelar detji angring thetan. Lasi ili ove kimi atum khei longri-havar aphan kerai arpu anutin ta arpu thetan. Labangso arpu ke Karbi akhei angbong sopinso atum anchot tong arpu kedo ma? Kali, lake pinso arlosomar talo. Jasemet ke non ove kimi atum anke arpu do. Ladak so-arlo atum arpu do pu neli kepudam ke penang nimarli atum ke Karbi akhei aphan kachinghon ave det. Bida charli det aphi kopine- doctor, engineer, professor lapen akaprek sorkar asaikhi kethe man-peng det nang mandet aphi lote Karbi akhei aphan chetenedet titi. Lahelo khei angphun kacharchak dunde ke. Athema thekdet, redet aphi khei hejan aphan achor-arup kachebiji aning ave lo. Ha bang akhei aphansi ningchehang dunsi bang along dunjui. Lapuson Karbi nimarli atum do-o. Lason kamatha atum henlo khei aphan amoi kapabop asai kedeng atum. Lahai atum doctor, engineer, professor mandet aphi bang Keche (Kengsang) pen akhei kaprek aphan dokok ke khei aphan kanahok the-o. Lahenlo nimarli atum isi khei aphan amoi arbung kapabop asai lo, sonsi ilitum risomar atum ta khei amoi arbung kapabop asai kedeng atum do-o. Lahai ke lapu cheman pen chechok-chetheng veret lapu ke kali, seta emethang a-ot adur lapen emethang asai kedeng pen henlo. Khei aphan hotur atum ke kosonsi nang kapavir detji aphan ke aphrangsi lahai hotur atum jirpi-jirpo asonsi nang cheparjanji nangliphan jirpi-jirpo nang chebisi bidi kaheno atovar eja pon pangchengji, laso aphi ke ephan epa nahok detji lapuson pensi ili Karbi aphan bang Keche atum nang keklem pangcheng. Lahai atum bida kacharli ahin jasemet kakhamkhe pado nangji atheke bang Kona aso atum chini. Loh kethek pavir-un lote latum aphan itum (keche) khei barim mate Karbi aphan dongthip un-po pu alam chini pame. Laso ajok latum ili Karbi aphan ason-ason asai kedeng lapen cheparjan si nang kapahei, lapen nang kachongthui asai deng bomlo. Lasi rongsopi kedo charli osomar atum matha jadi pangchin si charli pameji aphan kabor-i kenangsot, jongsi ilitum angbong ACS, IAS, IPS, lapen dostro, engineer abangphu-bangphi saide pulote khei ta ingtangpo lapen khei aphanta bang kona aso atum nang phere po. Chinidam sinang bang Mizo, Hmar, Khasi lapen Kuki akhei atum aphan langdam sinang latum ke iliphan paphrang-o lo Mizo akhei lake emethang state do, bonta Kuki akhei ke state kalilo itum Karbi akhei atum kelongtang district pu anta Kuki akhei ke longle lang, seta aningkan vangta inut-banghini IAS, IPS nangchepa-un si nihang-nirep lapen Detpi ahavar arlo sorkar asaikhi akethe nangmansi khei aphan nongme lapen khei aphan archak padolo. Setame ili Karbi akhei ke inut bakta IAS, IPS satlang along kachepate dunji aphan kabor-i ave, lahai akhei kethek-o penle lahai kethedung arpu kachepa-un dun kali, bonta kabor-i ajoksi kachepa-un. Lasi ili Karbi atumta lapuson kabor-i ahin cheja pulote khei kacheraikom atovar, kejoi kedeng-i atovar lo  hala akaprek kaheno ajakong aphan ta la kolom sijahi (ink) ajakong henlo jakong kethenei atovar khei aphan kachesong a risim lo, anparata bida henlo emethang aphan kachebirti akhi-adat bang nang kachonghu un-e akhi-adat lo, lasi charli ahin kachehung akenangsot.

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives