ADVERTISEMENT

This area is available for advertisement. Please contact for details.

Arnivang
Get Adobe Flash player

Karbi akhei kisung apor ahut KSA kachetonte, police atum saihem kanghap dam

Bidisar pen meiphu kechokche saihem kanghap: Saihem chunbang

Diphu, Chiti 6: Karbi Students Association (Meh thengtom) atum angbong kedamtang penang arni pen lamki kedokok ajoine pini arnitili apor malom KSA (Meh thengtom) asaihem police atum inghap dam chek.
Kedamtang penang an achiklo aprang West Karbi Anglong district along KSA (Meh thengtom) Hamren District Committee atum KSA tiri atum aphan athak arlu pen kedobom adhoc committee pri pen amethang amat keplenglim (fullfledge) cheselam det.
Laso aphuthak KSA tiri atum pen show cause notice heihui aloh pale lapen kachingvai chingsaiji aphan ta hang lo. KSA Hamren District Committee along inut bang hini atum pen laso alam aphi-ong angtang the-ong ajoine Chiti achiklo kechengsi arui angbong KSA tiri amei along anta kachetonte dokok lo. Laso kachetonte ang-ang kilit plot ajoine kedamtang arui malom latum angbong abang anta chepaphosi police along lamhoi chepiseroi lo. Lamhoi kelong ateng la-an sose kacharvo kapave detji aphan pusi pini arnikangsam apor police atum inghap dam chek lo. Khei kisung apor ahut KSA (Meh thengtom) atum angbong lapuson angthek keklang ke kemesen angthek kali.
Pinpurme, kedamtang KSA (inglongpho) atum kachethak varet ta lapuson KSA angbong kachetonte lapen kachehonthe thap kedopik ajoinesi KSA Inglongpho ta kethom an dokok lo. Halaso ahut kado kave KSA pho kedokok ajoine Karbi akhei aphan isi katherak meme asonsi dolo.
Non apor KSA (Meh thengtom) atum KSA (Inglongpho) atum atemo along kerui dunsi kemanji angring dokok lo. Lasi non khei kisung apor ahut KSA atum matha parsik pame pensi ajat alamrai seta deng nangji pusi ajahak kacheroktok arat atum choningri. 
Pinpur thume, kevangji Pre achiklo KSA krungsai amai kangniji aphan ta apor hot etlo seta
chiklo ejon anta ajahak atum kanghong un-eh det ajoine KSA angbong lapuson nongno chejo lo.
Laso aphuthak kedamtang Paipai chiklo niphai 8 arni Thekar Birta along klang etlo. Halaso atengsi KSA (Meh thengtom) atum angbong kachetonte ajoine law & order atum saihem inghap dam chek lo.  Kedamtang arni CPI(ML) along kedo a KSA lapen regional ratchari along kedo KSA angbong kachetonte detji angring thetan pusi paklang. Pini saihem kanghap chek aphuthak CPI(ML) pen kevang Laichan Ingleng pen Simeon Rongphar atum aphansi akechokche pu kejong.
KSA tiri asaihem law & order atum kanghap dam chek ke meiphu Simeon Rongphar pen KSA bidisar Laichan Ingleng  atum kechokche ajoine pusi KSA atum chejong. Latum bang hini KSA aphan amethang jongjung akhi kapingchongji kamatha dokok. Isi asong along meiphu pen bidisar pulote kado kave aphan kelang pachingbar nangji seta Rongphar pen Ingleng atum lapuson klemklesi amethang jongjung ale kelongji aphan klem rong pusi KSA atum chejong pusi saihem chunbang Raju Tisso birta nangpale.
Birta along kejong, alanglitum bang hini ta CPI(ML), HPC heihui along non puta arpu do. KSA alongle kachojor kanghu, KSA along kedo pen gari-motor kachenam alam aphuthak aphong-aphong klembang amai along chingvai lo seta alangli karjuji aning hanghe. Laso ajok KSA do-an atum ning kangsamse dokoklo. Lahai alam pen kachepajokji aphansi kalili kalang-lang asai alangli klem lo puta akoipi.
KSA chethakthe lapen mononphit ta chethakthe lo, seta KSA along kedo pen me-heno asai keklem ke KSA aron kali. La-an chot kali lapuson asai langno keklem atum aphan kroi thekthe lapen Karbi arat do-anta kroi nangne pusi KSA atum jong puta saihem chunbang Raju Tisso birta pangdak aloh pen birta pachetak.

One Response to Karbi akhei kisung apor ahut KSA kachetonte, police atum saihem kanghap dam

Leave a Reply

Your email address will not be published. Required fields are marked *

September 2017
M T W T F S S
« Aug   Oct »
 123
45678910
11121314151617
18192021222324
252627282930  
Archives