ADVERTISEMENT

This area is available for advertisement. Please contact for details.

Arnivang
Get Adobe Flash player

Toklang aklam along Thanbang, Pipo lapen Charlibang akam

––– Purno Ronghang

(1) Toklang along Pipo atum akam: Toklang alongklam along Pipo atum akam kethedung lapen kenangsot khangjang. Osomar aphan education pi pameji mate pi pameme ke Pipo atum arideng si do. Inut oso pirthe along amahang nangthek tanglo pulote aphrangsi ke Pipo atum along lam-lun charlidun po. Lam-lun kethan ahut Pipo atum mesen-mesen alam  lun si than mum nangji. Inut oso aphan mesen educationist pamanji pulote toklang aklam along toidunde aphrang Pipo atum toklang ador (Education value) abang kapachini nangji kenangsot khangjang. Pipo alam ke osomar bihek ako ke Pipo atum henlo alangtum Arnam arjan mate murti (idols) lo. Lasi Osomar atum ke Pipo atum ason si man kangtung. Komatne api-apo jongsi Thanbang pulote asomar ta Thangbang si man ingtungpo. Sekelang abangphu/bangphi (Doctor) pulote asomar ta sekelang abangphu/bangphi si mandun ingtung po lapen si osomar atumke ninghangdnpo mate methang ta chelang, chekrong ingtupo. Pipo atum abangke asomar aphan alanglitum ke-un dunde angdeng longsi bad dun kangtung, Pipo atum osomar kemang along alanglitum osomar aphan kerap lapen aningka pathedun abang toklang aklam along kepidun nangji kenangsot. Pipo atum osomar angno kachekortu, kachebohong, ase kethe pen kachingchek lapuosn alanglitum a-ot adur (behaviour) osomar tarlok (brain) lapen kamatha along kaheno thepik khangjang. Thengpi-thengprang aphan le kapakeng aphan archok kenangsot lapuson thak-thak si inut oso aphan kai along kemesen aloti along kevanji aphan Pipo atum bidi suri abang kenangsot, atheke osomar atum aphanta thengpi-thengprang aklimso ason si mo kethe ahut ke pakeng dun un-eh detji. Pipo akam ke bidi kipi anle kangton pu kali. Pipo akam ke osomar akengkam kechokche aling kengkam kechoklim lapen loti kemesen nathu kevan henlo Pipo akam akethe nai lo. Lasi Pipo atum akam osomar kacharli lapen toklang along ke kethedung khangjang.
Toklang aklam along Thanbang akam: Pipo aphi ke Thanbang atum henlo osomar atum akai loti keme anthu kevanji abang, Thanbang jongsi than, pare ahin chelang pameme le pute osomar atum akai kevirji angkang abang thedung khangjangpo. Akehai Aristotle ihut apor ningje lo; “Komatne abangphu jongsi osomar aphan matha pame pen education pi pulote alangli aphan ke manpeng kepi Pipo athek sonsi nangji, Pipo ke kai si pichot, alangli ke mindar lapen kai along osomar aphan mesen aloti si paklang”.
    John Locke; “School Thanbang atum kaiketa osomar’ (future) abang alangli amek angno munthi paklar thek nangji”.
    Rousseau; “Thengpi-thengprang ke tiki pensi theding, monit ke education toklang pen”
    Thangbang aphan ke osomar nepame pisen po pusi abangphutin Pipo ta ning chethe dam. Lasi inut Thanbang pulote a-ok-pran, kamatha, a-ot adur, keklem-kedam lapen kethan ahin abang mesen nangji. Komatne abangphu jongsi mesen thanbang man ingtung pulote la aber ketok ajakong abang kedo kedo kenangsot;
(1) Thanbang kethan athepi (subject matter) kachichini kenangsot. (He must have the knowledge of instruction).
(2) Osomar tarlok (brain) along alangli kethan athepi kapachebithek abang henlo kechoklim Thanbanglo (Perfect Thanbang).
(3) Thanbang amethang angchok (descipline) kachebi kenangsot, Thanbang methang angthek kachebi ajakong do nangji.
(4) Inut kechoklim Thanbang osomar kamatha, a-ot adur lapen keklem-kedam kachini nangji kenangsot.
(5) Thanbang osomar aphan kanghon lapen kazinso do nangji, lamthe lamdok pensi than pare nangji.
    Lahai ajakong ke osomar aphan loh kethan ahut kenangsot. Longri lapen khei kapachingthur akam ke kevangjo ove keme atum arideng si do lapen ove keme aphan kemesen aloti along kengpak kachebi kethanji abang ke Thanbang atum henlo. Lasi Thanbang akam (role) toklang along ke thedung khangjang.
(3) Toklang aklam along Charlibang akam: “Education is a tripolar process” inut areng kelok educationist kaningje. Education aklam along ke Pipo, Thanbang lapen charlibang atum kachetonte do tanglo pulote charlibang thek un-eh. Arnam ke abangphutin aphanta isivet kethek ajakong kepi ke homan. Kethek unji ajakong ke abangtin ta isivet lo. Apor lapen tangka mahang si labangso kethek mate kachingthur ajakong aphan kapaprekchot. kamatha ke toklang ahin thek-o ta thek, komatne ke kilun-kekan, komatne ke kethip-ketheng anathu thekrong ta thek. Lasi labangso kethek ajakong aphan kamunthi dam adim-an mate kangthur nangji adim an paleng nangji pulote charlibang methang ta kabor-i pu ason abang do nangji.
     Charlibang kabor-i adun mesen hamphang atomon, mesen thanbang, Pipo lapen mesen kacharli ahem kenangsot. Charlibang kachichine nangji lahenlo je M.K Gandhi, Alexander the great, Nepoleon, APJ Abdul Kalam, W.Shakespear, Robindranath Tagore, Akehai SWir Rongbong Terang ason-son amonit atum aphan ta la 24 hours vet lo arnisi along kelong ke. Kapaprekji ke charlibang kopuson si apor kerimji ma. Apor ke anotin aphan ta kenangsot. Apor ephong dam  tanglo pulote nangchelanglilo aphi ke. Apor aphan manpeng kepi pei, kerim thekthe abangphu ke mophi (future) ta akai along kachingthurdun varetji pu akrong abangke theklongrim. Lasi charlibang jongsi a minute aphan rimthek lote, a minutes amethang amtsi ahour aphan cherim chebi po. Kachini nangji kenangsot. Toklang henlo kamangbong, kisungnei lapen kacharli apor nang kechonei, seta nangthek tanglo te pirthe along reng mesen pen dimklong longdun lapen pherere pin pen phu chingthur dun long.
    Kijutsi, Ove kimi atum henlo khei amehlur lo pu ke anotin ta ningje ba chini lasi labangso amehlur Karbi akhei aphan mo loti kangting along keponji mate ekepaja ponji aphan pura ilitum labangso amehlur aphan mongve langno pen keterek kenangsot.

Leave a Reply

Your email address will not be published. Required fields are marked *

September 2017
M T W T F S S
« Aug    
 123
45678910
11121314151617
18192021222324
252627282930  
Archives